~~~~~~~~⊰❂ Unicode Version ❂⊱~~~~~~~~

ရွေးကောက်ပွဲရလဒ် မကြေညာနိုင်သေးသည့် ထိုင်းရွေးကောက်ပွဲကော်မရှင်ကို မဲဆန္ဒနယ် (၂) နေရာ၌ ရွေးကောက်ပွဲ ပြန်လည်ကျင်းပပေးရန် ပါတီနှစ်ခုက တောင်းဆိုထား
*************
ဖွေထိုင်းပါတီနှင့် Future Forward (FFP)ပါတီတို့က ဘန်ကောက်ရှိ မဲဆန္ဒနယ် (၂) ခုတွင် ရွေးကောက်ပွဲပြန်လည်ကျင်းပပေးရန် ရွေးကောက်ပွဲကော်မရှင်ကို တောင်းဆိုထားကြောင်း ၂၀၁၉ ခုနှစ် မတ်လ (၂၉)ရက်နေ့ ထိုင်းနိုင်ငံသတင်းများတွင် ဖေါ်ပြထားသည်။

မဲဆန္နယ် (၁၃)နှင့် မဲဆန္နယ် (၆)တို့တွင် ဖလမ်ဖရာချရတ်ပါတီက အနိုင်ရနေသည်ဟု ရွေးကောက်ပွဲကော်မရှင်၏ အတည်မပြုသေးသည့်သတင်းများ ထွက်ပေါ်နေခြင်းဖြစ်ပြီး အဆိုပါ မဲဆန္ဒနယ်များတွင် မဲမသမာမှုကို အထောက်အထားနှင့်တွေ့ရသည်ဟု ဖွေထိုင်းနှင့် FFP ပါတီတို့မှ ဝင်ရောက်ယှဉ်ပြိုင်သည့် ကိုယ်စားလှယ်လောင်းများက ဆိုသည်။

မဲဆန္နနယ်(၁၃)တွင် မဲရေတွက်ချိန်တွင် အငြင်းပွားဖွယ်ရာများရှိနေသည့်အပြင် ဆန္ဒမဲများကို ဘတ်(၅၀၀)ဖြင့် ဝယ်ယူသည့်သတင်းများလည်း ရရှိထားကြောင်း သိရပြီး မဲဆန္ဒနယ်(၆)တွင်လည်း အလားတူပြဿနာများ ကြုံနေရကြောင်း သိရသည်။

“မဲပြားကို ဆန္ဒပြုတဲ့နေရာမှာ  စစ်သားတစ်ယောက်က ကြည့်နေတော့ မဲဆန္ဒရှင်တွေမှာ လျှို့ဝှက်မဲပေးလို့ရတဲ့ အခြေအနေ မရှိပါဘူး။ တစ်ချို့မဲတွေက နှစ်ခေါက်ပြန်ရေတွက်နေတာလည်း ရှိတယ်။ တစ်ချို့မဲရုံတွေက မဲထည့်ခွင့်ရှိသူစာရင်းတွေ မမှန်မကန်လုပ်ထားတယ်”ဟု မဲဆန္ဒနယ်(၆)တွင် ဝင်ပြိုင်သည့် FFP ပါတီမှ ကိုယ်စားလှယ်လောင်းက ပြောသည်။

ထိုင်းနိုင်ငံတွင် ၂၀၁၄ ခုနှစ် အာဏာရပါတီထံမှ စစ်တပ်အာဏာသိမ်းပြီးနောက် ပထမဆုံးအကြိမ် ကျင်းပသည့်ရွေးကောက်ပွဲမှာ ၂၀၁၉ ခုနှစ် မတ်လ (၂၄)ရက်နေ့က ရွေးကောက်ပွဲကျင်းပပြီး သွားခဲ့သော်လည်း ရွေးကောက်ပွဲကော်မရှင်က မဲရလဒ်များကို အပြီးသတ်ကြေညာနိုင်ခြင်းမရှိသေးဘဲ အငြင်းပွားမှုများ ဖြစ်နေခြင်းဖြစ်သည်။

ရွေးကောက်ပွဲကော်မရှင်က မတ်လ(၂၇)ရက်နေ့က ထုတ်ပြန်သည့် မဲရလဒ်တွင် စစ်အစိုးရထောက်ခံသည့် ဖလမ်ဖရာချရတ်ပါတီက လူထုထောက်ခံမဲ (၈.၄)သန်းရရှိပြီး သက်ဆင်ထောက်ခံထားသည့် ဖွေထိုင်းပါတီက လူထုထောက်ခံမဲ (၇.၉)သန်း ရရှိကြောင်း ကြေညာထားသည်။

အဆိုပါမဲရလဒ်များကို ကြေညာပြီးနောက် ဆန္ဒမဲပေးပိုင်ခွင့်ရှိသူစာရင်း မှားယွင်းကြေညာမိသည်ဟု ဆိုကာ ပြင်ဆင်ချက်ထပ်မံထွက်ပေါ်ခဲ့ခြင်းဖြစ်သည်။

Tachileik News Agency
Ref: Bangkok Post