~~~~~~~~⊰❂ Unicode Version ❂⊱~~~~~~~~

မီးခိုးမြူကြောင့် လေထုညစ်ညမ်းမှုအဆိုးဆုံးအခြေအနေနှင့် ရင်ဆိုင်နေရသည့် ထိုင်းနိုင်ငံတွင် N 95 နှာခေါင်းစည်းများ မျှဝေလှူဒါန်းမှု ကျုယ်ကျယ်ပြန့်ပြန့်လုပ်ဆောင်လာ
*************
မီးခိုးမြူများဖုံးလွှမ်းမှုကြောင့် လေထုညစ်ညမ်းမှုအဆိုးဆုံးအခြေအနေနှင့် ရင်ဆိုင်နေရသည့် ထိုင်းနိုင်ငံ ချင်းမိုင်၊ ချင်းရိုင်းနှင့် မယ်ဟောင်ဆောင်တို့တွင် N 95 နှာခေါင်းစည်းများ စုပေါင်းလှူဒါန်းမှုကို လူထုက ကျယ်ကျယ်ပြန့်ပြန့် လုပ်ဆောင်လာကြသည်ကို တွေ့ရသည်။

“”ကျွန်တော်တို့တွေ တစ်ယောက် တစ်ယောက် မသိကြပါဘူး။ ဒါပေမဲ့ လူ့အဖွဲ့အစည်းအတွက် အကျိုးပြုတဲ့အလုပ်တွေကို အတူလက်တွဲလုပ်ကြဖို့ အဆင်သင့်ပါပဲ။ N 95 နှာခေါင်းစည်းပေါင်း တစ်သောင်းလောက်ရအောင် ဝိုင်းဝန်းကူညီကြတာကို ကျေးဇူးတင်ပါတယ်”ဟု ထိုင်းလူငယ်တစ်ဦးက Facebook တွင် N 95 လှူဒါန်းကြရန်လှုံ့ဆော်မှုနှင့်အတူ ရေးသားထားသည်ကို တွေ့ရသည်။

ချင်းမိုင်၊ ချင်းရိုင်းနှင့် မယ်ဟောင်ဆောင်တို့တွင် လေထုအတွင်း အမှုန်ပါဝင်မှုများပြားနေပြီး လေထုညစ်ညမ်းမှုကို ချက်ချင်းဖြေရှင်းနိုင်ဖွယ်မရှိသေးသည့်အတွက် လူထုက N 95 နှာခေါင်းစည်းများ မျှဝေကြရန် လုပ်ဆောင်လာကြသည်ကို တွေ့ရခြင်းဖြစ်သည်။

ချင်းမိုင်အုပ်ချုပ်ရေးမှူးကလည်း ဒေသတွင်း မီးခိုးမြူ ကင်းစင်သည့် အများပြည်သူ ယာယီခိုလှုံနိုင်မည့်နေရာများ အလျင်အမြန်ပြုလုပ်ကြရန် ညွှန်ကြားထားသော်လည်း အဆိုပါ ယာယီခိုလုံရာနေရာများရှိ လေထုအရည်အသွေးမှာလည်း စိတ်ချရသည့်အနေအထားတွင် မရှိကြောင်း သိရသည်။

ချင်းမိုင်တွင် လေထုညစ်ညမ်းမှုနှင့်ပတ်သက်၍ လက်ရှိကြုံတွေ့နေရသည့် အဓိကပြဿနာမှာ အဆောက်အဦများတွင် လေသန့်စင်သည့်စနစ်ကို ထည့်သွင်းထားခြင်းမရှိခြင်းဖြစ်ကြောင်း သိရသည်။

တောမီးအများအပြားလောင်ကျွမ်းနေသည့်် ထိုင်းနိုင်ငံမြောက်ပိုင်းဒေသတွင် မီးခိုးထူထပ်သည့်ဘေးဒဏ်သင့်ဇုန်အဖြစ် ကြေညာလုပ်ဆောင်ရန် တောင်းဆိုမှုများ ပို၍များပြားလာနေရာ လက်ရှိ တောမီးငြိမ်းသတ်ခြင်းအပြင် ရဟတ်ယာဉ်အသုံးပြု၍ မီးငြိမ်းသတ်သွားရန်လည်း လုပ်ဆောင်နေကြောင်း သိရသည်။

လက်ရှိတွင် မှိုအပါအဝင် သစ်တောထွက်ပစ္စည်းများအား ရှာဖွေသူများကြောင့် တောမီးလောင်မှုလျော့နည်းစေရန် သစ်တောထွက်စားသောက်ကုန်များကို ရောင်းချခြင်း၊ ဝယ်ယူခြင်းကိုလည်း ရှောင်ရှားလာကြကြောင်း သိရသည်။

Tachileik News Agency
Ref: The Nation