Ref:Bangkokpost

~~~~~~~~⊰❂ Unicode Version ❂⊱~~~~~~~~

ထိုင်းနိုင်ငံ၏ ပုဂ္ဂလိကဆေးရုံထက်ဝက်ကျော်မှာ ဆေးနှင့်ကုသစရိတ်များကို ပိုမိုတောင်းခံနေသဖြင့် ဈေးနှုန်းများ ပြန်လည်လျှော့ချပေးရမည်
**********
ထိုင်းနိုင်ငံတွင် ပုဂ္ဂလိကဆေးရုံထက်ဝက်ကျော်မှာ ဆေးနှင့် ကုသစရိတ်များကို ပိုမိုတောင်းခံနေသဖြင့် ဆေးရုံများ၏ငွေကြေးတောင်းခံမှုများကို ပြန်လည်ပြင်ဆင်ရန် ကြီးကြပ်ဆောင်ရွက်သွားမည်ဖြစ်ကြောင်း ကူးသန်းရောင်းဝယ်ရေးဝန်ကြီးဌာနက သတင်းထုတ်ပြန်သည်။

ဆေးနှင့် ကျန်းမာရေးဆိုင်ရာဝန်ဆောင်မှုများအတွက် ကုန်ကျစရိတ်ဆိုင်ရာအချက်အလက်များကို အချက်အလက်များစစ်ဆေးရေးအလုပ်အဖွဲ့ထံတင်ပြစေရာ နိုင်ငံအတွင်း ပုဂ္ဂလိကဆေးရုံပေါင်း (၃၅၃)ခုအနက် (၂၉၅)ခုက အချက်အလက်များကို တင်ပြထားသည်ကို  စစ်ဆေးသည့်အဖွဲ့ဥက္ကဌဖြစ်သူ  ပြည်တွင်းကုန်သွယ်ရေးဌာန၏ တာဝန်ရှိသူက ယင်းကဲ့သို့ထုတ်ဖေါ်ပြောဆိုလိုက်ခြင်းဖြစ်သည်။

ပုဂ္ဂလိကဆေးရုံများအနေဖြင့် ၂၀၁၉ ခုနှစ်၊ ဧပြီလ (၄)ရက်နေ့နောက်ဆုံးထား၍ အချက်အလက်များတင်ပြရန် အစိုးရက တောင်းဆိုထားခြင်းဖြစ်ပြီး လက်ရှိတွင် အချက်အလက်တင်ပြန်ရန် ဆေးရုံ(၅၈)ခု ကျန်နေဆဲဖြစ်ကာ အများစုမှာ ဆေးရုံငယ်များဖြစ်ကြောင်း သိရသည်။

ဆေးရုံများအနေဖြင့် ယင်းကဲ့သို့အချက်အလက်များ တင်ပြခြင်းမပြုပါက ထောင်ဒဏ် (၃)လ သို့မဟုတ် ဒဏ်ငွေဘတ် (၅၀၀၀) သို့မဟုတ် ဒဏ်နှစ်ရပ်လုံးကျခံရနိုင်ကြောင်း သိရသည်။

အချက်အလက်များစစ်ဆေးရေးအလုပ်အဖွဲ့အနေဖြင့် ပုဂ္ဂလိကဆေးရုံများ၏ ဆေးနှင့် ကုသစရိတ်များ တောင်းခံမှုနှင့်ပတ်သက်၍ ကြပ်မတ်သွားမည်ဖြစ်ပြီး ဈေးနှုန်းလျှော့ချရန် မလိုက်နာသည့်ဆေးရုံများရှိပါက အဆိုပါဆေးရုံများတွင် ကုသမှုခံယူနေသည့်လူနာများ သို့မဟုတ် ကုန်ကျစရိတ်များပြားစွာကုန်ကျခဲ့သဖြင့် တိုင်ကြားလိုသူများထံမှ အထောက်အထားများဖြင့် ဥပဒေအရ အရေးယူနိုင်ရန်ဆောင်ရွက်သွားမည်ဖြစ်ကြောင်း သိရသည်။

Tachileik News Agency
Ref:Bangkokpost