~~~~~~~~⊰❂ Unicode Version ❂⊱~~~~~~~~

ပါဝါအိတ်ဇောတပ်ဆိုင်ကယ်များကို ဖမ်းမိပါက ဖြုတ်သိမ်းပြီး ဆိုင်ကယ်အပိုပစ္စည်းအရောင်းဆိုင်များတွင် ရောင်းချနေသည်ကို စစ်ဆေးတွေ့ရှိပါက ပစ္စည်းများသိမ်းဆည်းသွားမည်ဖြစ်ပြီး ဝန်ခံကတိလက်မှတ်ရေးထိုးခိုင်းမည်ဖြစ်ကြောင်း သိရသည်။

“အဖွဲ့တွေနဲ့ စုပြီးတော့ လမ်းမတစ်လျှောက်မှာရှိတဲ့ ဆိုင်တွေရော၊ နောက်အတွင်းထဲမှာရှိတဲ့ ဆိုင်ကယ်ပစ္စည်းရောင်းတဲ့ဆိုင်တွေကို ရှာဖွေစစ်ဆေးမယ်။ စစ်ဆေးပြီးတော့ တကယ်လို့ ပါဝါအိတ်ဇောတွေရောင်းတာတွေ့ရင် ပထမဆုံးအနေနဲ့ ရဲမှတ်တမ်းထိုးမယ်။ ပစ္စည်းတွေကိုသိမ်းဆည်းမယ်"ဟု တာချီလိတ်မြို့နယ်အုပ်ချုပ်ရေးမှူး ဦးချမ်းမြေ့စောက တာချီလိတ်သတင်းအေဂျင်စီသို့ ပြောသည်။

သင်္ကြန်ကာလမတိုင်မီတွင် တာချီလိတ်မြို့ ရှမ်းရိုးမကွင်းအတွင်း၌ အများပြည်သူများ သိရှိမြင်သာနိုင်ရန် ဆိုင်ကယ်ပါဝါအိတ်ဇောများ ဖျက်ဆီးခြင်း အခမ်းအနားကိုလည်း ပြုလုပ်သွားရန် စီစဉ်ထားကြောင်း သိရသည်။

"အရင်နှစ်တွေက ဖမ်းထားတဲ့ ပါဝါအိတ်ဇောတွေရော၊ ဆယ်တန်းစာမေးပွဲကာလမှာ ဖမ်းခဲ့တဲ့ အိတ်ဇောတွေရော ရှမ်းရိုးမကွင်းထဲမှာ စုပြီးတော့ ဖျက်ဆီးတဲ့ အခမ်းအနားလေးရှိပါတယ်ဗျ။ သင်္ကြန်တွင်းမှာလည်း ဆက်လက်ပြီးတော့ ပါဝါအိတ်ဇောတွေ တပ်တဲ့ ဆိုင်ကယ်တွေကို အရှိန်အဟုန်မြှင့်ပြီး ဆက်လက်ဖမ်းဆီး ဆောင်ရွက်သွားဖို့ ရှိပါတယ်"ဟု တာချီလိတ်မြို့နယ်အုပ်ချုပ်ရေးမှူးက ပြောသည်။

သင်္ကြန်ကာလအတွင်း ပါဝါအိပ်ဇောတပ်ဆိုင်ကယ်များကို အရှိန်အဟုန်မြှင့် ဖမ်းဆီးသွားမည်ဖြစ်သည့်အပြင် တရားရုံးဒဏ်ကြေးတိုးမြှင့်ထားသည့်အပြင် ထောင်ဒဏ် (၁) လအထိ အရေးယူသွားမည်ဖြစ်ကြောင်း သိရသည်။

သတင်း - ဟန်စိုးထိုက်
ဓာတ်ပုံ - ကျော်ဇင်ဟိန်း