~~~~~~~~⊰❂ Unicode Version ❂⊱~~~~~~~~

အိုင်ဗရီကို့စ်နိုင်ငံတွင် ၂၀၁၉ ခုနှစ်၊ ဧပြီလ (၁၇)ရက်နေ့က စားသုံးရန်မသင့်ဟုဆိုကာ ဖျက်ဆီးလိုက်သည့် မြန်မာ့ဆန်တန်ချိန် (၁၈,ဝဝဝ)မှာ မြန်မာကုမ္ပဏီ(၃)ခုက ရောင်းချထားခြင်းဖြစ်ပြီး ရန်ကုန်အခြေစိုက် စင်္ကာပူကုမ္ပဏီတစ်ခုက အာဖရိကနိုင်ငံ ဂီနီသို့ တင်ပို့စဉ် ကီလိုမပြည့်၍ လက်မခံသဖြင့် မြန်မာနိုင်ငံသို့ ပြန်လည်တင်ပို့ခွင့်ပေးထားသည့် ဆန်များဖြစ်ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ဒုတိယဝန်ကြီးဦးအောင်ထူးထံမှ သိရသည်။

“ဖြစ်ရပ်အမှန်ကို ဆန်းစစ်မယ်။ ဘယ်သူရဲ့ အားနည်းချက်လဲ၊ သက်ဆိုင်ရာတင်ပို့တဲ့ ကုမ္ပဏီတွေလား၊ ပွဲစားလုပ်တဲ့ ကုမ္ပဏီလား၊ Inspection Agency တွေလား၊ စီးပွားကူးသန်းအနေနဲ့က ဘာလုပ်ပေးနိုင်မလဲ။ ဒီဖြစ်ရပ်ဟာ မြန်မာနိုင်ငံဆန်တင်ပို့သူများအတွက် Wake-up Call ပဲ ဖြစ်ပါတယ်။ ဆန်တင်ပို့မှု တစ်ခုလုံးကို ပြန်လည်ဆန်းစစ်ရမယ့် အချိန်ကျလို့နေပါပြီ”ဟု စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ဒုတိယဝန်ကြီးဦးအောင်ထူးက ၂၀၁၉ ခုနှစ်၊ ဧပြီလ (၁၉)ရက်နေ့တွင် ထုတ်ဖော်ပြောထားထားသည်။

အဆိုပါ ဆန်များမှာ မြန်မာနိုင်ငံက ကုမ္ပဏီ(၃)ခုဖြစ်သည့် ရွှေဝါရောင်ကုမ္ပဏီက မက်ထရစ် တန် (၁၃၅၀၀)၊ MEC ( မှ မက်ထရစ်တန် (၈၀၀၀)နှင့် ဧရာဟင်္သာကုမ္ပဏီမှ မက်ထရစ်တန် (၅၀၀)ကို ရန်ကုန်အခြေစိုက် စင်ကာပူကုမ္ပဏီတစ်ခုဖြစ်သည့် Olam International Co. Ltd. က ဝယ်ယူကာ အာဖရိကတိုက်ရှိ ဂီနီနိုင်ငံသို့ တင်ပို့ခဲ့ခြင်းဖြစ်ကြောင်း သိရသည်။

မရောင်းရသည့်ဆန်များအား မြန်မာသို့ပြန်သယ်ရန် ကုမ္ပဏီက ခွင့်တောင်းသည်ကို မြန်မာတာဝန်ရှိသူတို့က ခွင့်ပြုခဲ့သော်လည်း သင်္ဘောပြန်ဝင်လာခြင်းမရှိဘဲ ကုမ္ပဏီက အာဖရိကနိုင်ငံများတွင် ရောင်းချနိုင်လိုက်ကြောင်း သိရပြီးနောက် အိုင်ဗရီကို့စ်နိုင်ငံတွင် အရည်အသွေးမမီသည့် မြန်မာ့ဆန်များ ဖျက်ဆီးခံရသည့်သတင်း ထွက်ပေါ်လာခြင်းဖြစ်ကြောင်း သိရသည်။

“ သင်္ဘောက မြန်မာပြည်ပြန်လာဖို့ ဒေါက်တင်ပြင်ဆင်မှဖြစ်မယ်ဆိုပြီး အိုင်ဗရီကို့စ်ဆိပ်ကမ်းကို ကပ်ခဲ့တယ်လို့ ဆိုပါတယ်။ သင်္ဘောမှာ ဆန်တွေပါတော့ ဆိပ်ကမ်းက ဆန်တွေချခွင့်ပြုခဲ့ပါတယ်။ ဆန်တွေက မြန်မာနိုင်ငံမှာ သင်္ဘောတင်ချိန်နဲ့ သင်္ဘောပေါ်မှာ ရေငွေ့ဝင်ခဲ့ပုံရပါတယ်။ သင်္ဘောပေါ်မှာ (၈)လကျော်ကြာသွားတယ်။ ဒီတော့သင်္ဘောက ချချိန်မှာ ဆန်ပျက်ဖြစ်နေပုံရပါတယ်။ ဒါကြောင့် သက်ဆိုင်ရာ အာဏာပိုင်တွေက ဖျက်ဆီးခဲ့ပုံပဲ”ဟု စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ဒုတိယဝန်ကြီးဦးအောင်ထူးက ပြောသည်။

မြန်မာနိုင်ငံသည် ကမ္ဘာ့ဆန်ဈေးကွက်တွင် ၂၀၁၈ ခုနှစ်အတွင်း ပဉ္စမမြောက်အများဆုံးတင်ပို့သည့်နိုင်ငံအဖြစ် ဈေးကွက်ရခဲ့ခြင်းဖြစ်ပြီး ထိပ်တန်းဆန်တင်ပို့သည့်နိုင်ငံဖြစ်စေရန် စိုက်ပျိုးသူ၊ သိုလှောင်ကြိတ်ခွဲသူ၊ ကုန်သည်များ၊ မြန်မာနိုင်ငံဆန်စပါးအသင်းချုပ်၊ ပြည်ပတင်ပို့သည့် ကုမ္ပဏီများ၊ တစ်ဆင့်ခံရောင်းဝယ်သူများ၊ မြန်မာနိုင်ငံ ကုန်သည်နှင့် စက်မှုလုပ်ငန်းရှင်များအသင်းချုပ်၊ သက်ဆိုင်ရာဝန်ကြီးဌာနများ တက်ညီလက်ညီ ပူးပေါင်းအဖြေရှာသင့်သည်ဟု ဒုတိယဝန်ကြီးက တိုက်တွန်းထားသည်။

Tachileik News Agency
Photo: AFP