~~~~~~~~⊰❂ Unicode Version ❂⊱~~~~~~~~

ဝန်ကြီးဌာန (၆)ခုက အမည်ပျက်စာရင်းသွင်းလိုက်သည့်ဆောက်လုပ်ရေးကုမ္ပဏီ (၄၂)ခုတွင် ကျန်းမာရေးနှင့် အားကစားဝန်ကြီးဌာနမှ တင်သွင်းသည့် ကုမ္ပဏီထက်ဝက်ပါဝင်
*************
တည်ဆောက်ရေးလုပ်ငန်းများနှင့် ပတ်သက်၍ ပြည်ထောင်စုဝန်ကြီးဌာန (၆)ခုက အမည်ပျက်စာရင်း သွင်းထားသည့် ကုမ္ပဏီ (၄၂)ခုကို ထုတ်ပြန်လိုက်ရာ ကျန်းမာရေးနှင့် အားကစားဝန်ကြီးဌာနက အမည်ပျက်စာရင်းတင်သည့်ကုမ္ပဏီ (၂၀)ဖြင့် အများဆုံးဖြစ်သည်ကို တေ့ွရသည်။

တည်ဆောက်ရေးလုပ်ငန်းများနှင့် ပတ်သက်၍ အမည်ပျက်စာရင်းသွင်းခံရသော ကုမ္ပဏီများကို ဆောက်လုပ်ရေးဝန်ကြီးဌာန၏ Website တွင် ကြေညာမည်ဖြစ်ကြောင်း လွှတ်တော်၌ ဖြေကြားပြီး (၈)လအကြာဖြစ်သည့် ၂၀၁၉ ခုနှစ်၊ ဧပြီလ (၂၃)ရက်နေ့က အမည်ပျက်စာရင်းဝင် ကုမ္ပဏီ (၄၂)ခုကို ဆောက်လုပ်ရေးဝန်ကြီးဌာနက ထုတ်ပြန်ကြေညာလိုက်သည်။

ထုတ်ပြန်ထားသည့်စာရင်းတွင် နယ်စပ်ရေးရာဝန်ကြီးဌာနက ကုမ္ပဏီ(၁)ခု၊ ပို့ဆောင်ရေးနှင့် ဆက်သွယ်ရေးဝန်ကြီးဌာနက ကုမ္ပဏီ (၂)ခု၊ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနက ကုမ္ပဏီ(၁)ခု၊ လျှပ်စစ်နှင့် စွမ်းအင်ဝန်ကြီးဌာနက ကုမ္ပဏီ(၅)ခု၊ ပညာရေးဝန်ကြီးဌာနက ကုမ္ပဏီ(၁၃)ခု၊ ကျန်းမာရေးနှင့် အားကစားဝန်ကြီးဌာနက ကုမ္ပဏီ (၂၀)ခုတို့ကို အမည်ပျက်စာရင်း သွင်းလိုက်ခြင်းဖြစ်သည်။

ဆောက်လုပ်ရေးလုပ်ငန်းဆောင်ရွက်ရာတွင် အရည်အသွေးမပြည့်မီသဖြင့် ပြည်ထောင်စုဝန်ကြီးဌာန၊ တိုင်းဒေသကြီးနှင့် ပြည်နယ်အစိုးရအသီးသီးက အမည်ပျက်စာရင်းသွင်းထားသည့်ကုမ္ပဏီများစာရင်းကို ဆောက်လုပ်ရေးဝန်ကြီးဌာနက တောင်းယူပြီး ကုမ္ပဏီအမည်စာရင်းများနှင့်အတူ တာဝန်ခံသည့် အင်ဂျင်နီယာ အမည်စာရင်း၊ အမည်ပျက်စာရင်းသွင်းခံရသည့် ကုမ္ပဏီများစာရင်းကို လုပ်ငန်းဆိုင်းရမည့် ကာလသတ်မှတ်ချက်တို့ကို အပြည့်အစုံဖေါ်ပြသွားမည်ကြောင်း ဆောက်လုပ်ရေးဝန်ကြီးဌာန ဒုတိယဝန်ကြီး ဦးကျော်လင်းက ၂၀၁၈ ခုနှစ်၊ စက်တင်ဘာလ (၇)ရက်နေ့က ပြည်သူ့လွှတ်တော်တွင် မေးခွန်းဖြေကြားထားခြင်းဖြစ်သည်။

ကုမ္ပဏီများအား အမည်ပျက်စာရင်းသွင်းခြင်းနှင့် အရေးယူခြင်းကို ကုမ္ပဏီများဥပဒေတွင် ပြဌာန်းချက် မပါတော့သဖြင့် ၂၀၁၃ ခုနှစ်မှစ၍ အဆိုပါလုပ်ဆောင်ချက်များကို ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှု ဦးစီးဌာနအနေဖြင့် ဆောင်ရွက်ခြင်း မပြုတော့သဖြင့် အမည်ပျက်စာရင်းဝင်ကုမ္ပဏီများကို ၎င်းတို့ လုပ်ငန်းဆောင်ရွက်ရန်သဘောတူစာချုပ်ပါ စည်းမျဉ်း စည်းကမ်းများနှင့်အညီ အရေးယူရမည် ဖြစ်ကြောင်း သိရသည်။

အမည်ပျက်စာရင်းဝင်ကုမ္ပဏီများအနေဖြင့်  အမည်ပျက် စာရင်းသွင်းခံထားရသည့် ကာလအတွင်း လုပ်ငန်းများ ဝင်ရောက် ယှဉ်ပြိုင်ခွင့် ရပ်စဲခံထားရမည်ဖြစ်ကြောင်း သိရသည်။

အမည်ပျက်စာရင်းသွင်းခံရသည့်ကုမ္ပဏီများစာရင်းတွင် ရွှေတောင်ဦးကုမ္ပဏီ၊ ဦးစန်းမြင့်ထွေး၊ Heavy Metal World၊ လရောင်ဘိုကုမ္ပဏီ၊ Trillion၊ Archi Aroma၊ Bright New Vision Trading၊ ဦးအေးကိုကို၊ Wide River Limited ၊ ရွှေဇာတာ၊ ကော့သောင်းသရီးစတား၊ စေတနာအားမာန်၊ မိုးမြင့်ဇော်၊ ဝတီရွှေမြေ၊ No Two၊ GEMP၊ Prime City၊ ရွှေလဝိုင်း၊ တံခွန်မင်း၊ United MMT၊ သစ္စာကျော်၊ မြင့်ထက်ဝန်း၊ သာထက်သာ ဆောက်လုပ်ရေး၊ ရွှေဟံသာဆောက်လုပ်ရေး၊ Dream Come True၊ အောင်ခိုင်မင်းဆောက်လုပ်ရေး၊ Great Grace ဆောက်လုပ်ရေး၊ ရွှေမိုးစွေဆောက်လုပ်ရေး၊ TKT ဆောက်လုပ်ရေး၊ ပိုင်ပြည့်ဖြိုးဆောက်လုပ်ရေး၊ ယွန်းနဒီဆောက်လုပ်ရေး၊ ရဲတိုက်မြို့တော်၊ မိုးသကြား၊ K Ruby Co.,Ltd ၊ အိသဇင်ကုမ္ပဏီ၊ ဈာန်မိုးဆောက်လုပ်ရေး၊ ဝတီရွှေမြေဆောက်လုပ်ရေး၊ Aung Kyaw Zaw Association Service Co.,Ltd၊ ကမ္ဘာ့ဘုရင်အပြည်ပြည်ဆိုင်ရာဆောက်လုပ်ရေးကုမ္ပဏီ၊ Win Myanmar Together၊ KMC ဆောက်လုပ်ရေးနှင့် Alfra Co.,Ltdတို့ပါဝင်သည်ကို တွေ့ရသည်။

Tachileik News Agency