~~~~~~~~⊰❂ Unicode Version ❂⊱~~~~~~~~

တာချီလိတ်မြို့နယ်အတွင်း လေဘေးသင့် ဘာသာရေးအဆောက်အဦးများအပါအဝင် အိမ်ခြေ (၃၇) လုံးအတွက် ထောက်ပံ့ငွေပေးအပ်
*************
ရှမ်းပြည်နယ်အရှေ့ပိုင်း၊ တာချီလိတ်မြို့နယ်တွင် ၂၀၁၉ ခုနှစ်၊ ဧပြီလ (၂၃) ရက်နေ့ ညနေပိုင်းက လေပြင်းတိုက်ခတ်မှုနှင့် မိုးသီးကြွေကျမှုကြောင့် အမိုးလန်သွားသည့် ဘာသာရေးအဆောက်အဦး (၂) လုံးအပါအဝင် အမိုးလန်ပျက်စီး၊ ပြိုကျသွားသည့် အိမ်ခြေ (၃၇) လုံးအတွက် ဧပြီလ (၂၇) ရက်နေ့ နံနက်ပိုင်းတွင် ထောက်ပံ့ငွေပေးအပ်သည်။

 "လူလုပ်တာမဟုတ်ဘဲနဲ့ သဘာဝဘေးအန္တရာယ်ဖြစ်တာ ဖြစ်တဲ့အတွက် ဖြစ်လာပြီဆိုရင် နိုင်ငံတော်ကနေပြီးတော့မှ တစ်နိုင်ငံလုံးအတိုင်းအတာနဲ့ ပေးနေတာရှိပါတယ်။ ဆုံးရူံးမှုအတိုင်းအတာ ပမာဏအပြည့်အဝပေးချင်မှလည်း ပေးနိုင်မယ်။ တစ်နိုင်ငံလုံးအတိုင်းအတာနဲ့ဖြစ်တဲ့ နိုင်ငံတော်က ကြည့်ရှုစောင့်ရှောက်ပေးတာ ဖြစ်ပါတယ်"ဟု တာချီလိတ်ခရိုင်အုပ်ချုပ်ရေးမှူး ဦးမြင့်နိုင်က တာချီလိတ်သတင်းအေဂျင်စီသို့ ပြောသည်။

လေဘေးသင့်အိမ်ထောင်စုများအား သဘာဝဘေးစီမံခန့်ခွဲရေးကော်မတီက ထောက်ပံ့ငွေနှင့်အတူ အိမ်ထောင်စုသုံးပစ္စည်း (၁၆) မျိုးပါသည့်ပုံး(၁)ပုံးဆီကို လွယ်တော်ခမ်းအုပ်ချုပ်ရေးမှူရုံးခန်း၌ ပေးအပ်ခြင်းဖြစ်သည်။

တာချီလိတ်ခရိုင်အတွင်းမှ လေပြင်းနှင့်မိုးသီးကျသည့်ဒဏ်ကြောင့် ပျက်စီးခဲ့သည့် ဘာသာရေးအဆောက်အဦး (၂) လုံးနှင့် အမိုးလန်အိမ်ခြေ (၁၃) လုံးအတွက် တစ်အိမ်လျှင် အိမ်ဆောက်ပစ္စည်းဖိုးထောက်ပံ့ငွေ ကျပ် တစ်သိန်းနှုန်း၊ ပြိုလဲသွားသည့် အိမ်ခြေ (၂၂) လုံးအတွက် အိမ်ဆောက်ပစ္စည်းဖိုးထောက်ပံ့ငွေ ကျပ်တစ်သိန်းနှင့် အိမ်ထောင်စုသုံးပစ္စည်း (၁၆) မျိုးပါ ပုံးတစ်ပုံးစီကို ထောက်ပံ့ပေးအပ်ခဲ့ခြင်းဖြစ်သည်။

"လူကယ်ပြန်ဝန်ကြီးဌာနအနေနဲ့ ဘေးအန္တရာယ်တွေဖြစ်လာလို့ရှိရင် သဘာဝဘေးကြောင့်ပဲဖြစ်ဖြစ်၊ လူမှုရေးပဋိပက္ခကြောင့်ပဲဖြစ်ဖြစ် ကြုံတွေ့ခံစားရတဲ့ပြည်သူတွေကို ကယ်ဆယ်ရေးပစ္စည်းတွေ ထောက်ပံ့ပေးတယ်။ ကယ်ဆယ်ရေးရန်ပုံငွေတွေ ထောက်ပံ့ပေးလေ့ရှိပါတယ်။ ထွေအုပ်ကနေတက်လာတဲ့ စာရင်းဇယားတွေကိုကြည့်ပြီးတော့ အတည်ပြုပြီးတော့ ထောက်ပံ့ပေးလေ့ရှိပါတယ်"ဟု တာချီလိတ်မြို့ ဘေးအန္တရာယ်ဆိုင်ရာ စီမံခန့်ခွဲမှုဦးစီးဌာနမှ ဒုတိယဦးစီးမှူး ဒေါ်နန်းမွှေးမွှေးခင်က တာချီလိတ်သတင်း အေဂျင်စီသို့ ပြောသည်။

၂၀၁၉ ခုနှစ်၊ ဧပြီလ (၂၃) ရက်နေ့ ညနေ (၅) နာရီခန့်တွင် တာချီလိတ်မြို့နယ်အတွင်း လေပြင်းတိုက်ခတ်မှုနှင့် မိုးသီးကြွေကျမှုကြောင့် လွယ်တော်ခမ်းကျေးရွာအုပ်စုရှိ စန်းလု(အထက်)ရွာ၊ ဂျောပရွာ၊ ဟွေဟုန်ရွာ၊ ဖတ်ဟိ(အထက်)ရွာနှင့် ပါသားရွာတို့တွင် ထရံကာ/ သက်ကယ်မိုး၊ ထရံကာ/သွပ်မိုးအိမ် (၂၄) လုံးပြိုကျခဲ့သည့်အပြင် မူလွန်ကျောင်းတစ်ကျာင်းအပါအဝင် လူနေအိမ်များ အမိုးလန်ပျက်စီးခဲ့ပြီး ဝမ်ကောင်းရပ်ကွက်၊ ပုန်းထွန်ရပ်ကွက်၊ မကာဟိုခမ်းရပ်ကွက်နှင့် မိုင်းဖုန်း(က) ကျေးရွာအုပ်စုတို့တွင်လည်း ဘုန်းကြီးကျောင်း (၁) ကျောင်းနှင့် လူနေအိမ်များမှ သွပ်မိုးများ၊ အုတ်ကြွပ်မိုးများ ကွာကျခဲ့ကြောင်း သိရသည်။

သတင်း #ဟန်စိုးထိုက်
ဓါတ်ပုံ #ကျော်ဇင်ဟိန်း