~~~~~~~~⊰❂ Unicode Version ❂⊱~~~~~~~~

မလေးရှားသို့ ခိုးဝင်ရန် ထိုင်းနိုင်ငံတောထဲတွင် (၅)ရက်ကြာအစာမစားရဘဲ ပုန်းအောင်းနေသည့် မြန်မာ (၂၇)ဦးကို လူကုန်ကူးသူနှင့်အတူ ဖမ်းဆီးရမိ
***********
မလေးရှားသို့ ခိုးဝင်ရန်အတွက် ထိုင်းနိုင်ငံ၊ ဟတ်ရိုင်ဂေါက်ကွင်းအနီးတောထဲတွင် (၅)ရက်ကြာအစာမစားရဘဲ ပုန်းအောင်းနေခဲ့သည့် တရားမဝင် မြန်မာလုပ်သား (၂၇)ဦးနှင့် လူကုန်ကူးသူဟုသံသယရှိသူတစ်ဦးတို့ကို  ၂၀၁၉ ခုနှစ်၊ မေလ (၁၁)ရက်နေ့က ဖမ်းဆီးရမိလိုက်ကြောင်း သိရသည်။

ထိုင်းလူကုန်ကူးမှုတားဆီးရေးရဲတပ်ဖွဲ့၊ နယ်ခြားစောင့်ရဲတပ်ဖွဲ့၊ လူဝင်မှုကြီးကြပ်ရေးနှင့် စစ်တပ်တို့ပူးပေါင်းပါဝင်သည့်အဖွဲ့က မေလ (၁၁)ရက်နေ့ နံနက်အစောပိုင်းတွင်  ဖမ်းဆီးမိခြင်းဖြစ်ကြောင်း သိရသည်။

လူကုန်ကူးသူက ပုန်းအောင်းနေသည့်လုပ်သားများ တောထဲမှထွက်လာရန် လက်ဝှေ့ယမ်း၍ အချက်ပြလိုက်ရာ ပုန်းအောင်းနေသူများက ရဲတပ်ဖွဲ့ကို သတိမထားမိဘဲ ထွက်လာခဲ့ကြပြီးနောက် အားလုံးကိုဖမ်းဆီးနိုင်ခဲ့ခြင်းဖြစ်ကြောင်း သိရသည်။

အမျိုးသား (၂၇)ဦးကို မလေးရှားသို့ ပို့ဆောင်ပေးရန်အတွက် လူကုန်ကူးသည့်အဖွဲ့က ရန်ကုန်မှ ထိုင်းနိုင်ငံတွင်း ရနောင်းနယ်စပ်မှ ခရီးသည်တင်ယာဉ်လိုင်းဖြင့် ခေါ်ဆောင်လာခဲ့ပြီးနောက် ထရပ်ကားတစ်စီးဖြင့် ယခုပုန်းအောင်းနေသည့်နေရာသို့ ပို့ဆောင်ခဲ့ကာ ပုန်းအောင်းနေစေခဲ့ခြင်းဖြစ်ကြောင်း သိရသည်။

အဆိုပါ မြန်မာလုပ်သားများမှာ တောထဲတွင် တိတ်ဆိတ်စွာ ပုန်းအောင်းနေခဲ့ရပြီး လာမခေါ်မီ (၅)ရက်ခန့်အလိုကတည်းက ရေမှလွဲ၍ အစားအစာမရှိဘဲ ပုန်းအောင်းနေခဲ့ကြရခြင်းဖြစ်ကြောင်း သိရသည်။

မြန်မာ (၂၇)ဦးမှာ နိုင်ငံတွင်း တရားမဝင် ဝင်ရောက်မှုဖြင့်အရေးယူခံရမည်ဖြစ်ပြီး နေရပ်ပြန်ပို့မည်ဖြစ်ကြောင်း သိရသည်။

လူကုန်ကူးသူ၏အမည်ကို ရဲတပ်ဖွဲ့က ထုတ်ဖေါ်ခြင်းမရှိသေးဘဲ အမှုကွင်းဆက် ဖေါ်ထုတ်နေဆဲဖြစ်ကြောင်း သိရသည်။

Tachileik News Agency
Ref: Bangkok Post