~~~~~~~~⊰❂ Unicode Version ❂⊱~~~~~~~~

ထိုင်းနိုင်ငံအတွင်း တရားမဝင် ဝင်ရောက်ပြီး အမဲလိုက်သည့် KNU တပ်ဖွဲ့တစ်ဦးကို ဖမ်းမိ
********
ထိုင်းနိုင်ငံ၊ ဆန်ယော့အမျိုးသားဥယျာဉ်အတွင်း အမဲလိုက်သည့် KNU တပ်ဖွဲ့ဝင်တစ်ဦးကို တောရိုင်း တိရစ္ဆာန်၏အစိတ်အပိုင်းများ၊ လက်နက်ခဲယမ်းများနှင့်အတူ ဖမ်းမိထားကြောင်းသိရသည်။

အမျိုးသားဥယျာဉ်လုံခြုံရေးအဖွဲ့၊ နယ်စပ်လုံခြံုရေးတပ်ဖွဲ့များက နယ်စပ်သစ်တောဧရိယာအတွင်း စခန်းချနေသည့် KNU တပ်ဖွဲ့ဝင် (၃)ဦးကို ၂၀၁၉ ခုနှစ် မေလ (၂၂)ရက်နေ့ နေ့လယ် (၁)နာရီကျော်က တွေ့ရခြင်းဖြစ်ကြောင်း သိရသည်။

အဆိုပါ စခန်းချနေရာမှာ မြန်မာ - ထိုင်းနယ်စပ်မှ (၃)ကီလိုမီတာအကွာတွင်ရှိကြောင်း သိရသည်။
အမျိုးသားဥယျာဉ်အတွင်း စခန်းချ၍အမဲလိုက်သည့် KNU တပ်ဖွဲ့ဝင် (၃)ဦးအနက် (၁)ဦးကို ဖမ်းမိသော်လည်း ကျန်(၂)ဦးမှာ ထွက်ပြေးလွတ်မြောက်သွားကြောင်း သိရသည်။

ဖမ်းမိသည့် KNU တပ်ဖွဲ့ဝင်နှင့်အတူ ကျပ်တင်ထားသည့် ဝက်ဝံအစိတ်အပိုင်း (၂၁)ခုနှင့် မျောက်အစိတ်အပိုင်း (၂၄)ခုတို့ကို သိမ်းဆည်းရမိထားကြောင်း သိရသည်။

စခန်းချထားသည့်တဲအတွင်းမှ ရိုင်ဖယ်မျိုးစုံ (၃)လက်နှင့် ကျည်များကိုလည်းတွေ့ရပြီး အဆိုပါ KNU တပ်ဖွဲ့ဝင်များက မေလ (၂၁)ရက်နေ့က ထိုင်းနိုင်ငံတွင်း တရားမဝင် ဝင်ရောက်လာပြီး အမဲလိုက်ကြခြင်းဖြစ်ကြောင်း သိရသည်။

ဖမ်းဆီးရမိသည့် KNU တပ်ဖွဲ့ဝင်ကို တရားမဝင် ဝင်ရောက်မှုအပြင် လက်နက်များနှင့်ဖမ်းဆီးရမိမှု၊ တားမြစ်ထားသည့်နေရာတွင် အမဲလိုက်မှုနှင့် တောရိုင်းတိရစ္ဆာန်အစိတ်အပိုင်းများကို လက်ဝယ်တွေ့ရှိမှုတို့ဖြင့် တရားစွဲဆိုထားကြောင်း သိရသည်။

Tachileik News Agency
Ref: Bangkok Post