~~~~~~~~⊰❂ Unicode Version ❂⊱~~~~~~~~

ဧဝရက်တောင်တက်သူများပြားသဖြင့် တောင်ထိပ်တက်ရန် တန်းစီစောင့်ဆိုင်းနေရပြီး သေဆုံးသူ (၁၁)ဦးအထိ တိုးလာ
************
ဧဝရက်တောင်ထိပ်တက်ရန် တန်းစီစောင့်ဆို်င်းနေရသည်အထိ တောင်တက်သူများပြားသည့် ၂၀၁၉ ခုနှစ်အတွင်း တောင်ထိပ်တွင်သေဆုံးသူ (၁၁)ဦးအထိရှိလာနေပြီဖြစ်ကြောင်း သိရသည်။

နီပေါဘက်မှ ဧဝရက်တောင်ထိပ်တက်သွားသည့် အမေရိကန်ရှေ့နေတစ်ဦးဖြစ်သည့် အသက်(၆၂)နှစ်အရွယ် ခရစ္စတိုဖာဂျွန်ကူးလစ်ရှ်သည် တောင်ထိပ်တွင် ၂၀၁၉ ခုနှစ် မေလ (၂၇)ရက်နေ့က သေဆုံးသွားခဲ့ကြောင်း နီပေါခရီးသွားလုပ်ငန်းဌာနမှ ညွန်ကြားရေးမှူးက CNN သို့ ပြောကြားခဲ့ကြောင်း သိရသည်။

ခရစ္စတိုဖာကူးလစ်ရှ်သည် အမြင့်ပေ (၂၅၉၁၈)သို့ အောင်မြင်စွာရောက်သွားခဲ့ပြီး ကျန်းမာရေးအခြေအနေကောင်းမွန်နေရာမှ မေလ (၂၇)ရက်နေ့ ညနေပိုင်းက သေဆုံးသွားကြောင်း သိရသည်။

ဧဝရက်တောင်တက်သူများမှ သြစတီးယားနို်င်ငံမှ အသက် (၆၄)နှစ်အရွယ် အားနက်စ်လင်းဂရက်ဖ်မှာလည်း မေလ (၂၃)ရက်နေ့က သေဆုံးခဲ့ကြောင်း သိရသည်။

ယခုနှစ် တောင်တက်ရာသီအတွင်း ဧဝရက်တောင်၏ အမြင့်ပေ (၂၆၂၄၇)တွင် မေလ (၂၀)ရက်နေ့မှစ၍ တောင်ထိပ်တက်မည့်သူများ တန်းစီနေရပြီး တောင်တက်လမ်းတလျှောက် လူတန်းရှည်ကို စောင့်ဆိုင်းရခြင်းက အထူးသဖြင့် ကျွမ်းကျင်မှုမရှိသူများအတွက် အန္တရာယ်များကြောင်း ကျွမ်းကျင်သူများက မှတ်ချက်ပြုသည်။

ဧဝရက်တောင်၏ အမြင့်ဆုံးတောင်ထိပ်အမြင့်ပေ (၂၉၀၂၉)ပေသို့ တက်သူများသည် အောက်ဆီဂျင်ဗူးမပါဘဲ မိနစ်အနည်းငယ်သာ နေနိုင်ခြင်းဖြစ်ရာ လူတန်းရှည်စောင့်ဆိုင်းနေရခြင်းက အန္တရာယ်ရှိဇုန်ဖြစ်နေကြောင်း သုံးသပ်ကြသည်။

ဧဝရက်တောင်တွင် တောင်တက်သူများပြားနေသဖြင့် အချို့သော တောင်တက်မည့်သူများက အချိန်ရွှေ့ဆိုင်းမှုများလည်း ရှိနေကြောင်း သိရသည်။

ကမ္ဘာ့အမြင့်ဆုံးတောင်ထိပ်ဖြစ်သည့် ဧဝရက်တောင်ထိပ်သို့ နီပေါနိုင်ငံဘက်ခြမ်းရှိ တောင်ခြေမှစ၍ တက်ရောက်ကြပြီး ကမ္ဘာတလွှားရှိ တောင်တက်သမားအများအပြား နီပေါသို့ နှစ်စဉ်လာရောက်ကြခြင်းဖြစ်သည်။

Tachileik News Agency
Ref: CNN