~~~~~~~~⊰❂ Unicode Version ❂⊱~~~~~~~~

သတ်မှတ်ချိန်ကျော်လွန်ဖွင့်လှစ်သည့် ဘားနှစ်ခုကို စစ်ဆေးတွေ့ရသဖြင့် ပတ္တယားမှ အကြီးတန်းရဲအရာရှိ (၅)ဦးကို ပြောင်းရွှေ့မိန့်ထုတ်
**************
ထိုင်းနိုင်ငံ ပတ္တယားတွင် မူးယစ်ဆေးများ၊ မူးယစ်ဆေးသုံးသည့်ပစ္စည်းများနှင့် မူးယစ်ဆေး သုံးစွဲထားသူရာနှင့်ချီ၍ ဖမ်းမိသည့် ဘားနှစ်ခုမှာ သတ်မှတ်ချိန်ကျော်လွန်ဖွင့်လှစ်ကြောင်း စစ်ဆေးတွေ့ရှိရသဖြင့် ပတ္တယားရဲတပ်ဖွဲ့မှ အကြီးတန်းရဲအရာရှိ (၅)ဦးကို ပြောင်းရွှေ့မိန့်ထုတ်လိုက်ပြီဖြစ်ကြောင်း သိရသည်။

အဆိုပါ ရဲအရာရှိများကို ချောင်ဘူရီရဲဌာနချုပ်သို့ ပြောင်းရွှေ့ပေးလိုက်ခြင်းဖြစ်ပြီး ရက်ပေါင်း (၃၀)အတွင်း ရွှေ့ပြောင်းရမည်ဖြစ်ကာ စုံစမ်းစစ်ဆေးမှုနှင့်လည်း ရင်ဆိုင်ရမည်ဖြစ်ကြောင်း သိရသည်။

ပတ္တယားရှိ ဘရာဇီးပတ္တယားနှင့် 90 Bar တို့အား တပ်နှင့်သက်ဆိုင်ရာတာဝန်ရှိသူများပါဝင်သည့် ပြည်နယ်စီမံခန့်ခွဲရေးအဖွဲ့က ၂၀၁၉ ခုနှစ် ဇွန်လ (၁)ရက်နေ့ နံနက် (၄)နာရီက ရှောင်တခါင် ဝင်ရောက်စစ်ဆေးရာ တရားဝင်ဖွင့်လှစ်ခွင့်ပြုထားသည့်အချိန်ထက်ကျော်လွန်၍ ဖွင့်လှစ်နေသည်ကို စစ်ဆေးတွေ့ရှိရခြင်းဖြစ်ကြောင်း သိရသည်။

ဘရာဇီးပတ္တယားဘားကို စစ်ဆေးခဲ့စဉ်က သေနတ်တစ်လက်၊ ဓါးတစ်ချောင်း၊ အက်တဆီ၊ ကတ်တမင်းနှင့် စိတ်ကြွဆေးများကိုတွေ့ရပြီး ဘားအတွင်းရှိ လူပေါင်း (၃၀၀)ကျော်အနက် ထက်ဝက်ခန့်မှာ မူးယစ်ဆေးသုံးထားသည်ကို စစ်ဆေးတွေ့ရှိရသည့်အပြင် အသက်မပြည့်သေးသူ (၄)ဦးကိုပါ တွေ့ရခြင်းဖြစ်ကြောင်း သိရသည်။

90 Bar ကိုစစ်ဆေးခဲ့စဉ်က မူးယစ်ဆေးသုံးထားသူ (၁၄)ဦးကို တွေ့ရကြောင်း သိရပြီး အဆိုပါ ဘားနှစ်ခုမှ မန်နေဂျာများမှာ ပုဒ်မများစွာဖြင့် ရင်ဆိုင်နေရကာ ဘားနှစ်ခုလုံးကိုလည်း (၅)နှစ်ပိတ်သိမ်းအရေးယူထားကြောငး် သိရသည်။

ထိုင်းဥပဒေအရ အသက် (၂၀)အောက်ငယ်ရွယ်သူများကို ဘားများတွင် ဝင်ရောက်ခွင့်ကို တားမြစ်ထားခြင်းဖြစ်သည်။

Tachileik News Agency
Ref: The Nation