~~~~~~~~⊰❂ Unicode Version ❂⊱~~~~~~~~

အလှကုန်များ၊ ပိန်ဆေးများကို လှည့်ဖျားကြော်ငြာမှုဖြင့် မင်းသား၊မင်းသမီးများနှင့် ဆိုရှယ်မီဒီယာမှ နာမည်ကျော် (၃၇)ဦးကို FDA က တရားစွဲဆို
**********
ထိုင်းနိုင်ငံတွင် အလှကုန်ပစ္စည်းများနှင့် ပိန်ဆေးများကို လှည့်ဖျားကြော်ငြာFDA က တရားစွဲဆိုခံထားရသည့် ရုပ်ရှင်မင်းသား၊ မင်းသမီးများနှင့် ဆိုရှယ်မီဒီယာ၌ လူကြည့်များသူ စုစုပေါင်း (၃၇)ဦးတွင်ပါဝင်သည့် မင်းသမီး Kwan နှင့် အဆိုတော်သရုပ်ဆောင် Typhoon တို့ကို ၂၀၁၉ ခုနှစ်၊ ဇွန်လ (၁၁)ရက်နေ့တွင် ကြားနာကြောင်း သိရသည်။

မင်းသမီးအနေဖြင့် Magic Skin ကုမ္ပဏီထုတ်အလှကုန်များကို ကြော်ငြာရာတွင်  ထိုင်းနိုင်ငံ၏ ၂၀၁၅ ခုနှစ် အလှကုန်အက်ဥပဒေကို ချိုးဖေါက်နေသဖြင့် ထောင်ဒဏ်တစ်နှစ် သို့မဟုတ် ဒဏ်ကြေးငွေ ဘတ်တစ်သိန်း သို့မဟုတ် ဒဏ်နှစ်ရပ်လုံး ကျခံရနိုင်ဖွယ်ရှိပြီး မင်းသမီးက ရှေ့နေဖြင့် အမှုရင်ဆိုင်နေကြောင်း သိရသည်။

အဆိုတော်သရုပ်ဆောင်မင်းသား၏ အဆီချဆေးကြော်ငြာမှာလည်း ၁၉၇၉ ခုနှစ် အစားအသောက် အက်ဥပဒေကို ချိုးဖေါက်နေသဖြင့် ထောင်ဒဏ်သုံးနှစ် သို့မဟုတ် ငွေဒဏ် ဘတ်သုံးသောင်း သို့မဟုတ် ဒဏ်နှစ်ရပ်လုံးကျခံရနိုင်ဖွယ်ရှိကြောင်း သိရသည်။

၎င်းအနေဖြင့် ရဲတပ်ဖွဲ့၏စုံစမ်းစစ်ဆေးအရေးယူမှုကို ပူးပေါင်းဆောင်ရွက်နေပြီး ဆေးများကို ကြော်ငြာလက်မခံမီက FDA ရရှိထားခြင်းရှိမရှိ စစ်ဆေးလက်ခံခဲ့ခြင်းဖြစ်သော်လည်း ထုတ်ကုန်မှာ ဥပဒေနှင့်မညီသည်ကို တွေ့လာရခြင်းဖြစ်သည်ဟု တရားရင်ဆိုင်နေသည့် မင်းသားကဆိုသည်။

Magic Skin ကုမ္ပဏီထုတ်အလှကုန်ပစ္စည်းများကို အလွန်အမင်း လှည့်ဖျားကြေငြာခြင်းနှင့် ပိန်ဆေးများကြော်ငြာခြင်းတို့ကြောင့် ထိုင်းသရုပ်ဆောင် မင်းသား၊ မင်းသမီးနှင့် လူမှုကွန်ယက်တွင် လူကြည့်များသူ စုစုပေါင်း (၅၄)ဦးကို စုံစမ်းစစ်ဆေးခဲ့ပြီးနောက် (၁၇)ဦးမှာ ထိုင်းဘတ်ငွေ (၅၀၀၀)စီ ဒဏ်ကြေးပေးဆောင်စေခြင်းဖြင့် အရေးယူထားကြောင်း သိရသည်။

ယင်းတို့အနက် (၁၃)ဦးမှာ အလှကုန်ပစ္စည်းအား အလွန်အကျွံလိမ်ညာကြော်ငြာမှုဖြင့် ထောင်ဒဏ်များဖြင့် ရင်ဆိုင်ရဖွယ်ရှိကြောင်း သိရသည်။

ထိုင်းနိုင်ငံတွင် အဆီကျပိန်ဆေးများကြော်ငြာခြင်းနှင့် အလှကုန်များ၏ သက်ရောက်မှုကို အလွန်အမင်းယုံကြည်စေရန် ကြော်ငြာခြင်းများကို တားမြစ်ထားခြင်းဖြစ်သည်။

Tachileik News Agency
Ref: Bangkok Post