~~~~~~~~⊰❂ Unicode Version ❂⊱~~~~~~~~

အမေရိကန်ပြည်ထောင်စုသို့ ကုန်တင်သင်္ဘောဖြင့်သယ်လာသည့် ကိုကင်း (၁၆)တန်ခွဲ ဖမ်းဆီးရမိ
**************
အမေရိကန်ပြည်ထောင်စု ပန်ဆယ်ဗေးနီးယားပြည်နယ် ဖီလာဒဲဖီးယားဆိပ်ကမ်းတွင် ဆိုက်ကပ်ထားသည့် ကုန်တင်သင်္ဘောတွင် ကိုကင်း (၁၆)တန်ခွဲကို ၂၀၁၉ ခုနှစ်၊ ဇွန်လ(၁၈)ရက်နေ့ နေ့လယ်ပိုင်းက ဖမ်းဆီးရမိသဖြင့် ပြည်နယ်တွင်း ပမာဏအများဆုံးဖမ်းဆီးရမိမှုဖြစ်ကြောင်း သိရသည်။

အဆိုပါ MSC Gayane ကုန်တင်သင်္ဘောဝန်ထမ်းအဖွဲ့အား ဖမ်းဆီးထားပြီး စုံစမ်းစစ်ဆေးမှုများ လုပ်ဆောင်နေကြောင်း သိရသည်။

ကိုကင်းများကို ကုန်တင်သင်္ဘောပေါ်ရှိ ကွန်တိန်နာ (၇)လုံးတွင် ထည့်သွင်းထားသည်ကို အနံ့ခံခွေးများအကူအညီဖြင့် စစ်ဆေးတွေ့ရှိရခြင်းဖြစ်ပြီး ခန့်မှန်းတန်ဖိုးမှာ အမေရိကန်ဒေါ်လာ (၁)ဘီလီယံရှိမည်ဖြစ်ကြောင်း သိရသည်။

ကိုကင်းများကို သင်္ဘောဝန်ထမ်းအချို့၏အကူအညီဖြင့် ပနားမားနှင့် ကော်ရိုနယ်ကြား ခုတ်မောင်းနေစဉ် သင်္ဘောငယ် (၆)စီးဖြင့် လည်းကောင်း၊ ကော်ရိုနယ်၊ ပီရူးနှင့် ပနားမားကြားခုတ်မောင်းစဉ် သင်္ဘောငယ် (၈)စီးဖြင့်လည်းကောင်း ညပိုင်းအချိန်များတွင် ချဉ်းကပ်တင်ဆောင်ခဲ့ခြင်းဖြစ်သည်ဟု သင်္ဘောဝန်ထမ်းတစ်ဦးက ထွက်ဆိုထားကြောင်း သိရသည်။

လိုက်ဘီးယားအလံလွှင့်တင်ထားသည့် အဆိုပါ ကုန်တင်သင်္ဘောသည် မေလ(၁၉)ရက်နေ့က ကိုလမ်ဘီယာ၊ မေလ (၂၄)ရက်နေ့က ပီရူး၊ ဇွန်လ (၉)ရက်နေ့က ပနားမားနှင့် ဇွန်လ (၁၃)ရက်နေ့တွင် ဘဟားမားဆိပ်ကမ်းများကို ဆိုက်ကပ်ခဲ့ပြီး ဖီလာဒဲဖီးယားဆိပ်ကမ်းသို့ ဇွန်လ (၁၇)ရက်နေ့ နံနက်(၅)နာရီက ဆိုက်ကပ်ခြင်းဖြစ်ကြောင်း သိရသည်။

Tachileik News Agency
Ref: AP News, NBC News, abc News