~~~~~~~~⊰❂ Unicode Version ❂⊱~~~~~~~~

ထိုင်းနိုင်ငံရောက် မြန်မာလုပ်သားများကို ခြိမ်းခြောက်ငွေညှစ်တောင်းခံနေသည့် မြန်မာအဖွဲ့ကိုဖမ်းဆီးရမိပြီး တစ်ဦးလွတ်မြောက်
************
ထိုင်းနိုင်ငံတွင်းမှ မြန်မာရွှေ့ပြောင်းလုပ်သားများကို ခြိမ်းခြောက်ငွေညှစ်တောင်းခံနေသည့် မြန်မာအဖွဲ့မှခေါင်းဆောင်တစ်ဦးနှင့် အပေါင်းအပါများကို ထိုင်းနိုင်ငံ၊ ဘန်ကောက် ပတ်တူနမ်ဒေသရှိ အဆောက်အဦတစ်လုံးတွင် ရဲတပ်ဖွဲ့က ဝင်ရောက်စီးနင်းဖမ်းဆီးလိုက်ကြောင်း သိရသည်။

ပြည်တွင်းလုံခြုံရေးစီမံချက်မှ သက်ဆိုင်ရာအရာရှိများပါဝင်သည့် ပူးပေါင်းအဖွဲ့သည် ၂၀၁၉ ခုနှစ်၊ ဇွန်လ (၁၈)ရက်နေ့က ဝင်ရောက်ဖမ်းဆီးမှုအတွင်း မြန်မာလုပ်သားများထံမှ ငွေညှစ်တောင်းခံနေသည့် ခေါင်းဆောင်နှစ်ဦးဖြစ်သည့် မြန်မာနိုင်ငံသား အန်းကူနှင့် ဆန်းဂျေတို့ကို အဓိကထားရှာဖွေဖမ်းဆီးခြင်းဖြစ်သော်လည်း ဆန်းဂျေက ဇွန်လ (၁၇)ရက်နေ့က မြန်မာနိုင်ငံသို့ ပြန်သွားသဖြင့် အန်းကူနှင့် အပေါင်းအပါများကိုသာ ဖမ်းဆီးရမိခဲ့ခြင်းဖြစ်ကြောင်း သိရသည်။

အဆိုပါ ခြိမ်းခြောက်ငွေညှစ်တောင်းခံသည့်အဖွဲ့က ရွှေ့ပြောင်းမြန်မာလုပ်သားများအား ကာကွယ်စောင့်ရှောက်ခအဖြစ် လစဉ်ကြေး ဘတ် (၄၇၀၀)တောင်းခံလေ့ရှိပြီး တရားဝင်အလုပ်လုပ်ကိုင်သူ မြန်မာလုပ်သား (၂၀)ခန့်မှာလည်း အဆိုပါအဖွဲ့၏ ခြိမ်းခြောက်ငွေတောင်းခံမှုများကို ပေးဆောင်ခဲ့ကြရကြောင်း သိရသည်။

လက်ရှိတွင် လွတ်မြောက်သွားသည့် ဆန်းဂျေဆိုသူက ထိုင်းခရီးသွားရဲတပ်ဖွဲ့အမှတ်တံဆိပ်ပါသည့် တီရှပ်ဝတ်ဆင်လေ့ရှိပြီး ၎င်းကခရီးသွားရဲတပ်ဖွဲ့အတွက် အလုပ်လုပ်ပေးနေသူဟု ပြောဆိုလေ့ရှိကြောင်း သိရသည်။

၎င်းတို့အဖွဲ့အား လစဉ်ကြေးမပေးပါက မြန်မာရွှေ့ပြောင်းလုပ်သားများ အလုပ်ရှင်ပြောင်းရွှေ့ခြင်း၊ အထောက်အထားမပြည့်စုံခြင်းများကို ရဲတပ်ဖွဲ့ထံ သတင်းပေးမည်ဟု ခြိမ်းခြောက်လေ့ရှိကြောင်း သိရသည်။

လက်ရှိဖမ်းဆီးရမိထားသူများကို ရဲတပ်ဖွဲ့က စစ်ဆေးနေပြီး စုံစမ်းဖေါ်ထုတ်မှုများ ဆက်လက်လုပ်ဆောင်နေကြောင်း သိရသည်။

Tachileik News Agency
Ref: Bangkok Post