~~~~~~~~⊰❂ Unicode Version ❂⊱~~~~~~~~

မယ်ဆိုင်ဘက်မှနေ၍ သုံးဘီးဆိုင်ကယ် (၂)စီးဖြင့် မြန်မာ - ထိုင်းချစ်ကြည်ရေးတံတားအမှတ်(၁)မှနေ၍ ထိန်းချုပ်ဓာတုပစ္စည်းများဖြစ်သည့် ဟိုက်ဒရိုကလိုရစ်အက်ဆစ် (၅) ဂါလံပုံးပေါင်း (၁၁၅)ပုံး သယ်လာသည်ကို ၂၀၁၉ ခုနှစ်၊ စက်တင်ဘာလ(၉)ရက်နေ့ ညနေပိုင်းက တာချီလိတ်ဘက်ခြမ်းတွင် ဖမ်းမိလိုက်ပြီးနောက် ဆန်ဆိုင်း(ခ)ရပ်ကွက်အတွင်းရှိ နေအိမ်ခြံဝန်းအတွင်း သိမ်းဆည်းထားသည့် ဟိုက်ဒရို ကလိုရစ် အက်ဆစ်များကိုပါ ဖော်ထုတ်နိုင်ခဲ့ခြင်းဖြစ်ပြီး စုစုပေါင်း အလေးချိန် ဂါလံ (၂၀၇၀) ကို သယ်ဆောင်လာသူ (၃)ဦးနှင့်အတူ ဖမ်းမိခဲ့ခြင်းဖြစ်သည်။

တာချီလိတ်တွင်ဖမ်းဆီးရမိမှု၏ ကွင်းဆက်ဖော်ထုတ်ချက်ကို မြန်မာမူးယစ်ရဲတပ်ဖွဲ့က ထိုင်းနိုင်ငံဘက်သို့ ချိတ်ဆက်ပြီး ဆက်လက်ဖော်ထုတ်ရာမှ မယ်ဆိုင်မြို့ရှိ နေအိမ်တစ်လုံးတွင် ဟိုက်ဒရိုကလိုရစ်အက်ဆစ် ဂါလံပေါင်း (၄၂၉၂) ကို တရုတ်နိုင်ငံသား အမျိုးသားတစ်ဦး၊ ထိုင်းနိုင်ငံသူ အမျိုးသမီးတစ်ဦးတို့နှင့်အတူ စက်တင်ဘာလ (၁၀)ရက်နေ့တွင် ထပ်မံ ဖမ်းမိခဲ့ခြင်းဖြစ်သည်။

အဆိုပါ ဟိုက်ဒရိုကလိုရစ်အက်ဆစ်မှာ မူးယစ်ဆေးထုတ်လုပ်ရာတွင် အသုံးပြုနိုင်သည့် ဓာတုပစ္စည်းဖြစ်၍ မြန်မာနှင့် ထိုင်းနှစ်နိုင်ငံလုံးတွင် ထိန်းချုပ်ဓာတုပစ္စည်းများအဖြစ် သတ်မှတ်ထားခြင်းဖြစ်ပြီး အဆိုပါ အက်ဆစ်များအား စိတ်ကြွဆေးပြားထုတ်လုပ်ရာတွင်လည်း အသုံးပြုနိုင်သလို ရာဘာလုပ်ငန်းတွင်လည်း အသုံးပြုနိုင်သည့်အပြင် အခြားလုပ်ငန်းများတွင်လည်း အသုံးပြုနိုင်ကြောင်း သိရသည်။

Tachileik News Agency
Photo: MAESAIPRESS၊ Peeradet Visetsri