ရှမ်းပြည်နယ်အရှေ့ပိုင်းဒေသအတွင်း ကျိုင်းတုံ - တောင်ကြီးသွားလမ်း ကျိုင်းဖောင်းအနီးတွင် ဇန်နဝါရီလ(၂၉)ရက်နေ့ ညပိုင်းက ယာဉ်မတော်တဆမှုဖြစ်ပြီး (၁)ဦးဆုံးမှု ဖြစ်ပွားကြောင်း သိရသည်။

ယာဉ်တိုက်မှုနှင့် ပတ်သက်၍ မည်သို့ ဖြစ်ပွားသည်ကို မသိရသော်လည်း ဖြတ်သန်းသွားလာသူများက ဆိုင်ကယ်လဲပြီး လူတစ်ဦး လဲနေသည်ကို တွေ့၍ သက်ဆိုင်ရာများနှင့် လူမှုကူညီရေးအသင်းများကို ဆက်သွယ် အကြောင်းကြားခဲ့ကြခြင်း ဖြစ်ကြောင်း သိရသည်။

၂၀၂၅ခုနှစ် ဇန်နဝါရီလ(၂၉)ရက်နေ့ ည(၁၀)နာရီ ဝန်းကျင်အချိန်တွင် ယာဉ်တိုက်မှု ဖြစ်ပွားပြီး လူသေဆုံးသည့် နေရာသို့ ကျိုင်းတုံ တိုင်းနေနာရေးကူညီမှုအသင်းက သွားရောက်ပြီး အလောင်းကို သယ်ဆောင်ကာ ကျိုင်းတုံဆေးရုံရှိ ရင်ခွဲရုံသို့ ပို့ဆောင်ပေးထားကြောင်း သိရသည်။

ယာဉ်တိုက်မှုကြောင့် သေဆုံးသူမှာ အမျိုးသားတစ်ဦးဖြစ်ပြီး ၎င်း၏ ဆိုင်ကယ်အမျိုးအစားမှာ Wave i အမျိုးအစားဖြစ်ကြောင်း သိရသည်။

ကျိုင်းတုံမြို့တွင် ပြီးခဲ့သည့် ဇန်နဝါရီလ(၂၇)ရက်နေ့ကလည်း ယာဉ်မတော်တဆမှုကြောင့် လူ(၃)ဦး ဒဏ်ရာရရှိသည့် ဖြစ်စဉ်လည်း ဖြစ်ပွားခဲ့သေးသည်။

 

Photo: တိုင်းနေနာရေးကူညီမှုအသင်း