နှစ်သစ်ကူးနေ့တွင် စစ်ကောင်စီတပ်၏ ဗုံးကြဲတိုက်ခိုက်မှုကြောင့် အရပ်သားသေဆုံးသူ (၁၉)ဦးအထိရှိသည်ဟု ရရှိထားသည့် စာရင်းများအရ သိရသည်။
၂၀၂၄ခုနှစ် ဒီဇင်ဘာလ(၃၁)ရက်နေ့တွင် စစ်ကောင်စီတပ်သည် မန္တလေးတိုင်း ငါးန်ဇွန်မြို့နယ်၊ ကရင်နီပြည်နယ် လွိုင်ကော်မြို့နယ်နှင့် ရခိုင်ပြည်နယ် ပုဏ္ဏားကျွန်းမြို့နယ်တို့ကို ပေါင်(၅၀၀)ဗုံးများအပါအဝင် ဗုံးများကြဲချတိုက်ခိုက်ခြင်းဖြစ်သည်။
နေ့လယ် (၁)နာရီခွဲဝန်းကျင်တွင် စစ်ကောင်စီတပ်သည် ပုဏ္ဏားကျွန်းမြိုနယ်၊ ယိုးတရုပ်ရွာကို ဂျက်ဖိုက်တာတစ်စီးနှင့် နှစ်ကြိမ် ဗုံးကြဲတိုက်ခိုက်မှုကြောင့် အရပ်သား (၅)ဦး ပွဲချင်းပြီး သေဆုံးသည်။
တိုက်ခိုက်မှုအတွင်း ကျောင်းထိုင်ဆရာတော်တစ်ပါးအပါအဝင် အရပ်သား(၉)ဦးထက်မနည်း ဒဏ်ရာရရှိသွားရာက ယနေ့ ၂၀၂၅ခုနှစ် ဇန်နဝါရီလ(၁)ရက်နေ့တွင် (၂)ဦးထပ်မံသေဆုံးသည်ဟု ဒေသခံများထံမှ သိရသည်။
သေဆုံးသူများမှာ ယိုးတရုပ်ရွာမှ ဒေါ်မသာလှ (၇၆)နှစ်၊ တန်းခိုးရွာမှ မဦးဆန်းနွယ် (၂၅)နှစ်၊ ယိုးတရုပ်ရွာတွင် စစ်ဘေးလာရှောင်နေသည့် ကွမ်းတောင်ရွာမှ ကိုမျိုးဇော်ထွန်း(၁၈)နှစ်တို့ ပွဲချင်းပြီးသေဆုံးကာ ယိုးတရုပ်ရွာတွင် စစ်ဘေးရှောင်နေသည့် ပုဏ္ဏားကျွန်းမြို့၊ စံပြရပ်ကွက်မှ မောင်မျိုးဟိန်းအောင် (၉)နှစ်နှင့် ယိုးတရုပ်ရွာမှ ဦးလှဖြူ (၄၈)နှစ်တို့ဖြစ်သည်။
ညနေ(၄)နာရီတွင် လွိုင်ကော်မြို့နယ် အရှေ့ဖက်ခြမ်းရှိ ဆင်စခန်း စစ်ဘေးရှောင်စခန်းကို စစ်ကောင်စီတပ်က လေကြောင်းမှ ပေါင်(၅၀၀)ဗုံး ကြဲချရာ စစ်ဘေးရှောင် ကလေးများဖြစ်သည့် အမျိုးသားတစ်ဦးနှင့် အမျိုးသမီး (၂)ဦး သေဆုံးပြီး ဒဏ်ရာရသူ (၃)ဦးရှိသည်ဟု သိရသည်။
သေဆုံးသူကလေး(၃)ဦး၏ အမည်နှင့် အသက်များကို Tachileik News Agency အနေဖြင့် ထပ်မံစုံစမ်းနေဆဲ ဖြစ်သည်။
ထို့အပြင် ည(၈)နာရီခွဲတွင် ငါန်းဇွန်မြို့နယ် သာကျင်ကျေးရွာကို လေကြောင်းမှတိုက်ခိုက်ရာ ကိုကောင်းမြတ်သူ(အသက်မသိရသေး)၊ ဦးသန်းတင့် (၅၂)နှစ်၊ မသန်းတင့် (၅၂)နှစ်၊ ကိုအောင်မျိုးခန့် (၂၀)နှစ်၊ ကိုအောင်မျိုးသန့် (၁၇)နှစ်တို့ သေဆုံးသည်။
ဒဏ်ရာရသူများမှာ ဦးမြင့်အေး (၅၈)နှစ်၊ လမ်းပုံ (၃၃)နှစ်၊ ပြည့်စုံလျှန်၊ မောင်ဆန်း၊ မနေခြည်၊ ဦးအောင်ကျော် (၄၇)နှစ်တို့ဒဏ်ရာရကာ နွား(၈)ကောင်သေဆုံးပြီး နေအိမ်များပျက်စီးသွားသည်။
၂၀၂၄ခုနှစ်အတွင်း စစ်ကောင်စီတပ်၏ လေကြောင်းတိုက်ခိုက်မှုကြောင့် အရပ်သား(၄၀၀၀)ကျော် ထိခိုက်သေဆုံးခဲ့ရကြောင်း NUG က ထုတ်ပြန်ထားသည်။
အာဏာသိမ်းစစ်ခေါင်းဆောင် မင်းအောင်လှိုင်၏ နှစ်သစ်ကူးမိန့်ခွန်းတွင် မြန်မာနိုင်ငံသားများ တစ်ဦးအပေါ်တစ်ဦး အပြန်အလှန်မေတ္တာထားရန် ပြောဆိုထားသည်။
#TachileikNewsAgency
#TNA_MAT
Photo:ငါန်းဇွန်တွင် စစ်ကောင်စီက ဗုံးကြဲတိုက်ခိုက်စဥ်
