မြန်မာ - ထိုင်းနယ်စပ်ဒေသ တာချီလိတ်မြို့တွင် မူးယစ်ဆေးဝါးသတင်းအရ ဝင်ရောက်ရှာဖွေရာက နေအိမ်အတွင်း အမျိုးသားတစ်ဦးကို လက်နက်နှင့်တွေ့ရ၍ ဖမ်းဆီးအမှုဖွင့်လိုက်ကြောင်း သိရသည်။

တာချီလိတ်မြို့ ဆေခမ်း(ဟောင်လိတ်)ရပ်ကွက်အတွင်း ဝမ်ဟောင်ရွာရှိ နေအိမ်အား ၂၀၂၄ခုနှစ် ဇူလိုင်လ(၃)ရက်နေ့၏ နေ့လည်ပိုင်းအချိန်က ပူးပေါင်းအဖွဲ့ဖြင့် ဝင်ရောက်ရှာဖွေရာမှ ဖမ်းဆီးရမိခြင်း ဖြစ်ကြောင်း သိရသည်။

အဆိုပါ နေအိမ်အတွင်းမှ အောင်သူရဝင်းဆိုသူအား အသင့်တွေ့ရပြီး ဆက်လက်၍ နေအိမ်အတွင်းရှာဖွေရာ ကုတင်ခြေရင်းမှ တူရကီနိုင်ငံထုတ် BLOW TR 14 AUTO တံဆိပ်ပါသည့် ပစ္စတိုသေနတ် (၁)လက် နှင့် ကျည်ဆံ အတောင့်(၂၀)တို့ကို ရှာဖွေ တွေ့ရှိ သိမ်းဆည်းရှိကြောင်း သိရသည်။

ဆက်လက်၍ ၎င်းအား ဟောင်လိတ်နယ်မြေရဲစခန်းတွင် အမှုဖွင့် စစ်ဆေးနေလျှက်ရှိကြောင်း သိရသည်။

တာချီလိတ်မြို့တွင် များသောအားဖြင့် လုယက်မှု၊ မှုယစ်ဆေးဝါးမှုနှင့် ကိုယ်ကျိုးစီးပွားအတွက်သာ လက်နက်ကိုင်ဆောင်လေ့ရှိကြသလို အချို့ လုပ်ငန်းရှင်များမှာ စစ်တပ်နှင့် နားလည်မှုရယူပြီး လက်နက်ကိုင်ဆောင်ထားတတ်ကြသည်။