ယခု သီတင်းပတ်အတွင်း Meta ကုမ္ပဏီပိုင် Facebook နှင့် Instagram ဆိုရှယ်မီဒီယာ ဝန်ဆောင်မှုများ ကမ္ဘာတဝန်း မိနစ်ပိုင်းမှ နာရီပိုင်းကြာ အသုံးပြုမရ ဖြစ်သွားမှုက ကုမ္ပဏီအတွက် အမေရိကန်ဒေါ်လာ သန်းရာနှင့်ချီသည့် ဆုံးရှုံးရသည့် ကိစ္စဖြစ်ကြောင်း ကျွမ်းကျင်သူများက ဆိုသည်။

Facebook အပါအဝင် Meta ၏ ဝန်ဆောင်မှုများ ကမ္ဘာတဝန်း အသုံးပြုမရ ဖြစ်သွားမှုကြောင့် စီအီးအိုဖြစ်သူ မာ့ခ်ဇူကာဘတ်မှာ ခန့်မှန်းခြေ ဒေါ်လာ သန်း (၁၀၀) ဆုံးရှုံးနစ်နာခဲ့ကြောင်း ရင်းနှီးမြှုပ်နှံမှုနှင့် ဘဏ္ဏာရေး ဝန်ဆောင်မှုကုမ္ပဏီ Wedbush Securities ၏ မန်နေဂျင်းဒါရိုက်တာ ဒန်အိုင်ဗီးစ်က Daily Mail ကို ပြောသည်။

ထိုပမာဏမှာ Meta အတွက် မဖြစ်စလောက်သာ ဖြစ်နိုင်ပြီး ၂၀၂၃ ခုနှစ် စာရင်းအရ ကုမ္ပဏီ၏ ဝင်ငွေမှာ ဒေါ်လာ (၁၃၄) ဘီလီယံရှိကြောင်း သိရသည်။ 

၎င်း၏ ဆိုရှယ်မီဒီယာဝန်ဆောင်မှုများ ပြတ်တောက်မှုကြောင့် ဘဏ္ဏာရေးပိုင်းဆိုင်ရာ မည်မျှ ထိခိုက်ဆုံးရှုံးကြောင်းကိုတော့ Meta က ထုတ်ဖော်ပြောနိုင်ဖွယ် မရှိကြောင်းလည်း အိုင်ဗီးစ်က ဆိုသည်။ 

Meta က ၎င်း၏ ဝင်ငွေအများစုကို ဆိုရှယ်မီဒီယာများပေါ်ရှိ ကြော်ငြာများမှတစ်ဆင့် ရရှိနေခြင်း ဖြစ်သည့်အတွက် ထိုဖြစ်ရပ်ကြောင့် Meta ၏ စတော့ရှယ်ယာဈေးနှုန်းလည်း ကျဆင်းသွားခဲ့သည်။ 

၂၀၂၄ ခုနှစ် မြန်မာစံတော်ချိန် မတ်လ (၅) ရက်နေ့ ည (၁၀) နာရီဝန်းကျင်မှစ၍ Facebook နှင့် Instagram အပါအဝင် Meta ၏ ထုတ်ကုန်မှန်သမျှ အားလုံး  ကမ္ဘာတဝန်း (၂) နာရီနီးပါးကြာ အသုံးပြုမရ ဖြစ်သွားခဲ့ရာ Meta ၏ ဝင်ငွေလည်း ကျဆင်းသွားခဲ့သည်။

Facebook နှင့် Instagram အသုံးပြုမရ ဖြစ်သွားပြီးနောက် Meta စီအီးအို ဇူကာဘတ်က မိနစ်အနည်းငယ် စောင့်ဆိုင်းရန်နှင့် အားလုံး ဖြေရှင်းသွားနိုင်မည်ဟု ၎င်း၏ X အကောင့်တွင် ချက်ချင်းပင် ပို့စ်တင်ခဲ့သည်ကို တွေ့ရသည်။

Facebook နှင့် Instagram အသုံးပြုမရဖြစ်မှုကြောင့် Meta ၏ ဝင်ငွေ လျော့ကျသွားခဲ့သော်လည်း ဇူကာဘတ်မှာ ကမ္ဘာ့အချမ်းသာဆုံး ဘီလျံနာစာရင်းတွင် ယခင်အတိုင်း နံပါတ် (၄) နေရာ၌ ဆက်လက် ရပ်တည်နေသည်။ 

Bloomberg Billionaires Index ၏ ၂၀၂၄ ခုနှစ် မတ်လ (၇) ရက်နေ့အထိ စာရင်းအရ ဇူကာဘတ်က အသားတင် ချမ်းသာကြွယ်ဝမှု ဒေါ်လာ (၁၇၈) ဘီလီယံဖြင့် နံပါတ် (၄) နေရာ၌ ရပ်တည်နေသည်ကို တွေ့ရသည်။

ဇူကာဘတ်အထက်တွင် ကမ္ဘာ့အကြီးဆုံး တန်ဖိုးကြီး ဇိမ်ခံပစ္စည်းထုတ်ကုန် ကုမ္ပဏီ LVMH ဥက္ကဌနှင့် စီအီးအို Bernard Arnault က ဒေါ်လာ (၁၉၇) ဘီလီယံဖြင့် နံပါတ် (၁)၊ ကမ္ဘာ့အကြီးဆုံး e-commerce ကုမ္ပဏီ Amazon ၏ စီအီးအို Jeff Bezos က ဒေါ်လာ (၁၉၆) ဘီလီယံဖြင့် နံပါတ် (၂) နှင့် Telsa Motors နှင့် X ဆိုရှယ်မီဒီယာ ပိုင်ရှင်ဖြစ်သူ Elon Musk က ဒေါ်လာ (၁၈၉) ဘီလီယံဖြင့် နံပါတ် (၃) နေရာတို့၌ အသီးသီး ရပ်တည်နေသည်။

 

Source: Daily Mail