တရုတ်နိုင်ငံတွင် အပူလှိုင်းနှင့် မိုးခေါင်ခြောက်သွေ့မှုတို့ကြောင့် ယန်ဇီမြစ်ကြောင်းတစ်လျှောက် မြစ်ရေ လျော့ကျခဲ့ရာမှ တစ်ချိန်က နစ်မြုပ်နေခဲ့သော နိုင်ငံအနောက်တောင်ပိုင်း Chongqing မြို့ရှိ ကျွန်းတစ်ကျွန်း ပြန်ပေါ်လာခဲ့ရာ ဗုဒ္ဓရုပ်ပွားတော် (၃) ဆူကိုလည်း ပြန်ဖူးတွေ့လာရကြောင်း တရုတ်အစိုးရသတင်းဌာန Xinhua က ဖော်ပြသည်။

ယန်ဇီမြစ် (Yangtze River)၏ မြစ်ရေလျော့ကျသွားရာမှ ပြန်ပေါ်ထွက်လာသည့် ဗုဒ္ဓရုပ်ပွားတော်များမှာ သက်တမ်း နှစ်ပေါင်း (၆၀၀) ရှိမည်ဟု ယူဆရသည်။ 

မြစ်ထဲမှ ပြန်ပေါ်လာသည့် Foyeliang ခေါ် ကျွန်း၏ အမြင့်ဆုံးနေရာတွင် ဗုဒ္ဓရုပ်ပွားတော်များကို ပြန်ဖူးတွေ့ခဲ့ရသည်ဟု ဆိုသည်။ 

အဆိုပါ ဗုဒ္ဓရုပ်ပွားတော်များကို Ming နှင့် Qing မင်းဆက်များ လက်ထက်က ထုလုပ်ခဲ့ခြင်းဖြစ်ကြောင်း သိရသည်။

ယန်ဇီမြစ်ရေ၏ ရေမျက်နှာပြင်မှာ တရုတ်အနောက်တောင်ပိုင်းတွင် မိုးခေါင်ခြောက်သွေ့မှုနှင့် အပူလှိုင်းတို့ကြောင့် လျင်မြန်စွာ လျော့ကျနေခဲ့သည်။ 

ယန်ဇီမြစ်ဝှမ်းတွင် ဇူလိုင်လမှစပြီး မိုးရွာသွန်းမှုမှာ ပုံမှန်ထက် (၄၅) ရာခိုင်နှုန်း လျော့နည်းခဲ့ကြောင်းနှင့် အပူချိန်များ မြင့်တက်နေမှုမှာ အနည်းဆုံး နောက်တစ်ပတ်ကြာ ဆက်ဖြစ်နေနိုင်ကြောင်း မိုးလေဝသဌာနက ခန့်မှန်းထားသည်။

Chongqing တစ်လျှောက် ဒေသ (၃၄) ခုရှိ မြစ် (၆၆) စင်းအထိတွင် ရေများခမ်းခြောက်နေကြောင်း တရုတ်အစိုးရသတင်းဌာန CCTV က ဩဂုတ်လ (၁၉) ရက်နေ့၌ ပြောခဲ့သည်။ 

တရုတ်အပြင် ဥရောပတစ်လွှားတွင်လည်း မိုးခေါင်ခြောက်သွေ့မှုကြောင့် မြစ်ရေများခမ်းခြောက်ခဲ့ရာ ကာလရှည်ကြာ နစ်မြုပ်နေသည့် ရှေးဟောင်းအရာဝထ္ထုများ ပြန်ပေါ်လာသည်ကို တွေ့ရသည်။

စပိန်နိုင်ငံတွင် မြစ်ရေခမ်းခြောက်သွားပြီး စပိန် Stonehenge ဟု အမည်ပေးခေါ်ဝေါ်ကြသည့် သမိုင်းမတင်မီခေတ်က ကျောက်တုံးအဝိုင်း ပြန်ပေါ်လာခဲ့ရာ ရှေးဟောင်သုတေသနပညာရှင်များ ဝမ်းမြောက်ဝမ်းသာဖြစ်နေကြသည်။ 

ဥရောပတွင် Danube မြစ်၏ ရေမျက်နှာပြင်မှာလည်း ရာစုနှစ်တစ်ခုအတွင်း အနိမ့်ဆုံးကျဆင်းသွားခဲ့ရာ ဒုတိယကမ္ဘာစစ်အတွင်း ဆာဘီးယားနိုင်ငံ၏ Prahovo မြို့အနီး နစ်မြုပ်ခဲ့သည့် ဂျာမန်စစ်သင်္ဘော အစီး (၂၀) ကျော် ပြန်ပေါ်လာခဲ့ကြောင်း သိရသည်။

Source: CNN