မကွေးတိုင်း၊ ကျောက်ထုမှ ချင်းပြည်နယ်၊ မတူပီသို့လာသည့် ယာဉ်(၈၀)ကျော်ပါ အာဏာသိမ်းစစ်ကောင်စီတပ်စစ်ကြောင်းကို ဧပြီလ(၅)ရက်နေ့ နေ့လည်ပိုင်းက မိုင်းခွဲတိုက်ခိုက်ခဲ့ကြောင်း CDF မတူပီက သတင်းထုတ်ပြန်လာသည်။

၎င်းစစ်ကြောင်းကို မတူပီမြို့မှ (၂၈)မိုင်အကွာတွင် CDF မတူပီမှ ထောင်ထားသည့် မိုင်းနင်းမိသဖြင့် မိုင်း(၄)လုံးကွဲကာ စစ်ကောင်စီတပ်သားများ သေဆုံး၊ ဒဏ်ရာရမှုရှိခဲ့ကြောင်း သိရသည်။

၎င်းစစ်ကြောင်းသည် ညဘက်တွင် မင်းတပ်-မတူပီ မိုင်တိုင်(၇၇) သို့ ရောက်ရှိနေပြီဖြစ်ပြီး တိုက်ပွဲ ဆက်လက်ဖြစ်ပွားနိုင်ကြောင်း ထုတ်ပြန်ထားသည်။

ဒါ့အပြင် ဧပြီလ(၅)ရက်နေ့ နံနက်ပိုင်းက ချင်းပြည်နယ်၊ တီးတိန်မြို့ အထက(၁)ကျောင်း၌ တပ်စွဲထားသည့် အာဏာသိမ်းစစ်ကောင်စီတပ်နှင့် ရဲများကို ဝင်ရောက်တိုက်ခိုက်ရန် ပြည်သူ့ကာကွယ်ရေးတပ် PDF Zoland က  စီစဉ်ခဲ့သော်လည်း (၁၀) တန်းစာမေးပွဲဖြေဆိုမည့် ကျောင်းသူ၊ ကျောင်းများ၊ CDM မဝင်သော ကျောင်းဆရာ၊ ဆရာမများနှင့်အတူ ရောက်လာသည့်အတွက် ပစ်ခတ်မည့် အစီအစဉ်အား ရပ်ဆိုင်းခဲ့ရကြောင်း PDF Zoland က ထုတ်ပြန်ထားသည်။

ထို့ကြောင့် ပြည်သူများ မထိခိုက်စေရန်နှင့် အာဏာသိမ်းစစ်ကောင် စီတပ်ဖွဲ့ဝင်များအား ခြောက်လှန့်ရန်အတွက် ၎င်းတို့နှင့်မနီးမဝေးတွင် ဖောက်ခွဲမှု(၂)ကြိမ်ပြုလုပ်ခဲ့ကြောင်း သိရသည်။