ကရင်ပြည်နယ်၊ ကော့ကရိတ်မြို့နယ်၊ မောခီးတွင် ၂၀၂၂ ခုနှစ် မတ်လ(၁၃)ရက်နေ့က အာဏာသိမ်းစစ်ကောင်စီတပ်မှ ဗိုလ်ကြီးတစ်ဦးအပါအဝင် (၄)ဦးကို KNLA နှင့်ပူးပေါင်းအဖွဲ့က ဖမ်းဆီးထားကြောင်းသိရသည်။
မောခီးမှ ဝေါ်လေဘက်သို့ထွက်လာသည့် ခြေမြန်တပ်ရင်း (ခမရ-၅၅၅)နှင့် ခြေလျင်တပ်ရင်း (ခလရ-၃၂)မှ ဒုစစ်ကြောင်းမှူး နှစ်ဦးအပါအဝင် ၎င်းတို့ကို လုံခြုံရေး လိုက်ပါရယူပေးသည့် တပ်သား (၂) ဦးကို KNLA တပ်ရင်း(၂၀၁)နှင့် ပူးပေါင်းတပ်ဖွဲ့က ဖမ်းဆီးရမိခြင်းဖြစ်ကြောင်း သိရသည်။
ဖမ်းဆီးရမိသူများမှာ ခမရ-၅၅၅ မှ ဒုစစ်ကြောင်းမှူး ဇေယျာမင်းနှင့် ၎င်း၏ ကိုယ်ရံတော်အဖြစ်လိုက်ပါလာသူ ဒုတပ်ကြပ်ချစ်သူ၊ ခလရ-၃၂ မှ စခန်းမှူး ဗိုလ်ကြီးတစ်ဦးနှင့် ကိုယ်ရံတော်တပ်သားတစ်ဦးအပြင် ၎င်းတိုနှင့်လိုက်ပါလာသည့် ဒေသခံနှစ်ဦးကိုပါ ဖမ်းဆီးရမိခဲ့ခြင်းဖြစ်ကြောင်း သိရသည်။
ကရင်ပြည်နယ်တွင်း တိုက်ခိုက်နေသည့် အာဏာသိမ်း စစ်ကောင်စီတပ်မှ တပ်ခွဲမှူးအဆင့်အပါအဝင် (၂၇)ဦးကိုလည်း မတ်လ (၁၁)ရက် KNU တပ်မဟာ (၅) နယ်မြေအတွင်း လက်နက်ခဲယမ်း အမြောက်အများဖြင့် ဖမ်းဆီးရမိထားခြင်းဖြစ်သည်။
