ရှမ်းပြည်နယ်(မြောက်ပိုင်း) ကျောက်မဲမြို့တွင် စစ်တပ်အာဏာသိမ်းပြီးကတည်းက ဖြုတ်သိမ်းထားသည့် မြို့အဝင် COVID 19 စစ်ဆေးရေးဂိတ်ကို ၂၀၂၁ ခုနှစ်၊ ဇွန်လ (၁၁) ရက်နေ့မှစ၍ အာဏာသိမ်းအဖွဲ့က ပြန်ဖွင့်နေပြီဟု သိရသည်။
ယခင်က COVID 19 ထိန်းချုပ်ရေးအတွက် မြို့အဝင်ဂိတ်အားလုံး၌ ဌာနပေါင်းစုံပါဝင်သည့် စစ်ဆေးရေးအဖွဲ့ဖြင့် စစ်ဆေးရေးဂိတ်များ ဖွင့်လှစ်ခဲ့ခြင်းဖြစ်သော်လည်း လက်ရှိတွင် အခြားမြို့များမှ ကျောက်မဲမြို့သို့ ဝင်ရောက်နိုင်သည့် ပင်မဝင်ပေါက်လမ်းအများအပြားရှိသည့်အနက် မန္တလေး-လားရှိုး ပြည်ထောင်စုလမ်းမကြီးမှ ကျောက်မဲမြို့အတွင်း ဝင်ရောက်သည့် ပင်လုံလမ်းမကြီးတစ်ခုတည်း၌သာ ကိုဗစ်စစ်ဆေးရေးဂိတ်ပြန်ထားရှိလိုက်ခြင်းဖြစ်သည်။
စစ်ဆေးရေးဂိတ်ပြန်လည်ထားရှိလိုက်သော်လည်း ယခင်ကိုဗစ်ကာလများကဲ့သို့ ကျန်းမာရေး၊ အုပ်ချုပ်ရေး၊ ရဲတပ်ဖွဲ့၊ ယာဉ်ထိန်းတပ်ဖွဲ့၊ ပရဟိတအဖွဲ့ စသည့်အဖွဲ့စုံပါဝင်ခြင်းမရှိဘဲ ကျန်းမာရေးဌာနနှင့် ယာဉ်ထိန်းအချို့သာ ဂိတ်တွင်စောင့်ကြပ်စစ်ဆေးနေခြင်းဖြစ်သည်။
ပြည်သူ့အစိုးရလက်ထက်က ကိုဗစ်ထိန်းချုပ်ရေးလုပ်ဆောင်ရာတွင် ကျောက်မဲမြို့သို့ဝင်ရောက်နိုင်သည့် အဓိကလမ်းမကြီး အချို့သာဖွင့်ထားပေးပြီး မန္တလေး -လားရှိုး ပြည်ထောင်စုလမ်းမကြီးတွင် ကုန်တင်ယာဉ်မောင်းများအား ကိုဗစ်နှင့်ပတ်သက်၍ စစ်ဆေးမှု ဂိတ်အမှတ်(၂)၊ ကျောက်မဲမြို့ထဲဝင်သည့်ပင်လုံလမ်းမကြီးတွင် ခရီးသည်တင်ယာဉ်များအား ကိုဗစ်စစ်ဆေးရေး ဂိတ်၊ လားရှိုးဘက်မှ ကျောက်မဲဘက်သို့ဝင်သည့် နမ့်ဟူးတောင်း လမ်းဆုံတွင် ခရီးသည်များအား ကိုဗစ်စစ်ဆေးရေးဂိတ် ( ခိုးဝင်မှုမရှိစေရေး) စသည်တို့ကိုထားရှိပြီး အခြားလမ်းများကို ပိတ်ထားခဲ့ခြင်း ဖြစ်သည်။
