တရုတ်နိုင်ငံ၏  COVID 19 ကာကွယ်ဆေး Sinovac ကို အရေးပေါ်သုံးကာကွယ်ဆေးအဖြစ် ကမ္ဘာ့ကျန်းမာရေးအဖွဲ့ကြီး (WHO) က အတည်ပြုပေးလိုက်ပြီဖြစ်ရာ  WHO အသိအမှတ်ပြုမှုရသည့် တရုတ်နိုင်ငံထုတ် COVID 19 ကာကွယ်ဆေး (၂) ခုရှိလာပြီဖြစ်သည်။

 WHO က ၂၀၂၁ ခုနှစ် ဇွန်လ (၁) ရက်နေ့တွင် အတည်ပြုပေးလိုက်သည့်  အဆိုပါကာကွယ်ဆေးမှာ (၂) ကြိမ်ထိုးနှံရမည့် ကာကွယ်ဆေးအမျိုးအစားဖြစ်ပြီး နိုင်ငံအတော်များများတွင် ရောက်ရှိအသုံးပြုနေပြီဖြစ်သည်။

တရုတ်နိုင်ငံထုတ် Sinopharm COVID 19 ကာကွယ်ဆေးကိုလည်း WHO က ပြီးခဲ့သည့်လအတွင်းက အသိအမှတ်ပြုထားပြီးဖြစ်သည်။

ကမ္ဘာ့ကပ်ရောဂါ COVID 19 ကိုထိန်းချုပ်ရေးအတွက် နိုင်ငံအသီးသီးက စမ်းသပ်ထုတ်လုပ်နေသည့် ကာကွယ်ဆေးများကို အများပြည်သူတွင် အသုံးပြုရန် ဘေးကင်းသည့်အဆင့်သတ်မှတ်ချက်များကို စစ်ဆေးပြီး ခွင့်ပြုပေးနေရာ ဥရောပသမဂ္ဂနိုင်ငံများ၊ တောင်ကိုရီးယားနှင့် အိန္ဒိယနိုင်ငံများမှ ထုတ်လုပ်သည့် COVID 19 ကာကွယ်ဆေးများဖြစ်ကြသည့် Pfizer/BioNTech၊ Moderna။ Johnson & Johnson နှင့် AstraZeneca တို့ကို WHO က အသိအမှတ်ပြုထားပြီးဖြစ်သည်။