စစ်တပ်က နိုင်ငံတော်အာဏာသိမ်းသည့် ၂၀၂၁ ခုနှစ်၊ ဖေဖေါ်ဝါရီလ (၁) ရက်နေ့မှစ၍ ယာယီပိတ်ထားသည့် ရှမ်းပြည်နယ် (အရှေ့ပိုင်း) တာချီလိတ်မြို့မှ လေဆိပ်တွင် ဖေဖော်ဝါရီလ (၄) ရက်နေ့၌ ပြည်တွင်းလေကြောင်းလိုင်း (၂) ခုမှ လေကြောင်းခရီးစဉ် (၂) ခု ပျံသန်းပြေးဆွဲသည်။

Air KBZ လေကြောင်းလိုင်းသည် ရန်ကုန်- ဟဲဟိုး - မန္တလေး - တာချီလိတ် ခရီးစဉ်ဖြင့် နေ့လယ် (၁၁) နာရီ (၅၀) မိနစ်တွင် တာချီလိတ်လေဆိပ်သို့ ရောက်ရှိကာ ခရီးသည် (၃၉) ဦးကို ဝင်ရောက်လာခဲ့ပြီး တာချီလိတ်မှ ခရီးသည် (၄၁) ဦးကို တင်ဆောင်ကာ နေ့လယ် (၁၂) နာရီ (၂၅) မိနစ်တွင် တာချီလိတ် - မန္တလေး - ဟဲဟိုး - ရန်ကုန်ခရီးစဉ်ကို ပျံသန်းသွားခဲ့သည်။

မြန်မာ့အမျိုးသားလေကြောင်းလိုင်းသည်  ရန်ကုန်-ဟဲဟိုး-လားရှိုး-တာချီလိတ် ခရီးစဉ်ဖြင့် နေ့လယ် (၁) နာရီခွဲ၌ ခရီးသည် (၂၄) ဦးဖြင့် တာချီလိတ်လေဆိပ်သို့ ရောက်ရှိလာပြီး နေ့လယ် (၂) နာရီအချိန်တွင် ခရီးသည် (၂၆) ဦးဖြင့် တာချီလိတ်-ဟဲဟိုး-ရန်ကုန်ခရီးစဉ်ကို ပျံသန်းသွားခြင်းဖြစ်သည်။

တာချီလိတ်လေဆိပ်ကို ၂၀၂၁ ခုနှစ် ဇန်နဝါရီလ (၁၆) ရက်နေ့တွင် COVID-19 စည်းကမ်းချက်များနှင့် အညီ ပြန်လည်ဖွင့်လှစ်ခဲ့ပြီးနောက် ဖေဖော်ဝါရီလ (၁) ရက်နေ့တွင် စစ်တပ်မှ အာဏာသိမ်းလိုက်သဖြင့် လေဆိပ်ကို ပြန်လည်ပိတ်ပင်ထားခဲ့ရကာ ဖေဖော်ဝါရီလ (၄) ရက်နေ့တွင် ပြန်လည်ဖွင့်လှစ်လာခြင်းဖြစ်သည်။

Tachileik News Agency