***************
တာချီလိတ်ရှိ မြန်မာ - ထိုင်း ချစ်ကြည်ရေး အမှတ်(၁)တံတားတွင် စည်ပင်သာယာရေးဌာန၏ ဘီးခွန်လေလံရရှိထားသူမှ ဧပြီလအတွင်း သုံးဘီးဆိုင်ကယ်များအား မူလ ကောက်ခံသည့် ကျပ်(၂၀၀)မှ ကျပ်(၃၀၀)အဖြစ် တိုးမြှင့်ကောက်ခံနေရာမှ မေလ(၁)ရက်နေ့မှစ၍ မူလကောက်ခံနှုန်းဖြစ်သည့် ကျပ်(၂၀၀)သို့ ပြန်လည်ကောက်ခံနေပြီဖြစ်ကြောင်း သိရသည်။
"အခုတော့ သုံးဘီးဆိုင်ကယ်တွေကို အရင်အတိုင်းပဲ ကျပ်(၂၀၀)ပဲ ကောက်တော့တယ်၊ ကျပ်(၁၅၀၀)ပေးလိုက်တာ ကညနကြေး ကျပ်(၁၀၀၀)၊ ပို့/ဆက်ကြေး ကျပ် (၂၀၀) အပါဆိုရင် ကျပ်(၁၀၀)ပြန်အမ်းတယ်။"ဟု သုံးဘီးဆိုင်ကယ်မောင်းသူ ကိုနောင်နောင်က ပြောသည်။
စည်ပင်သာယာရေးဌာနမှ လေလံစနစ်ဖြင့် ရောင်းချပေးထားသော အပေါင်ဆိုင်များ၊ ဘီးကောက်လုပ်ငန်းများ၊ ဈေးကောက်လုပ်ငန်းများ စသည့် လုပ်ငန်းများအား သတ်မှတ်ထားသည့် ဈေးနှုန်းဖြင့်သာ ကောက်ခံခွင့်ရှိပြီး သတ်မှတ်ဈေးနှုန်းထက် ပိုမို ကောက်ခံခွင့်မရှိကြောင်း သိရသည်။
"လေလံကြေး ဘယ်လောက်နဲ့ပဲ ဆွဲဝယ်ယူယူ ကား၊ ဆိုင်ကယ်၊ စတာတွေကို သတ်မှတ်ထားတဲ့ ဈေးနှုန်းအတိုင်းပဲ ကောက်ခွင့်ရှိပါတယ်၊ ပိုကောက်လို့မရပါဘူး၊ အခုလည်း အသိပေးထားပါတယ်"ဟု တာချီလိတ်မြို့နယ်စည်ပင်သာယာရေးဌာနမှ တာဝန်ရှိသူ တစ်ဦးက ပြောသည်။
တာချီလိတ်မြို့ရှိ မြန်မာ - ထိုင်း ချစ်ကြည်ရေး အမှတ်(၁) နှင့် အမှတ်(၂) တံတားနှစ်စီးအပေါ် စည်ပင်ဘီးကောက်လုပ်ငန်းအား ၂၀၁၇ - ၂၀၁၈ဘဏ္ဍာနှစ်အတွက် ကြမ်းခင်းဈေး လေလံမှာ ကျပ်သိန်းပေါင်း (၂၃၂၅.၈၀)ဖြင့် ဈေးဖွင့်ထားရာမှ (၃)ကြိမ်တိုင်တိုင် ၀ယ်ယူသူ မရှိ၍ အခြားနည်းဖြင့် ကျပ်သိန်း (၁၇၂၀)ဖြင့်သာ လေလံရောင်းချထားရကြောင်းသိရသည်။
မြန်မာ - ထိုင်း ချစ်ကြည်ရေး အမှတ်(၁) နှင့် အမှတ်(၂) တံတားနှစ်စီးတွင် ဘီးခွန်ကောက်ခံရမည့် သတ်မှတ်နှုန်းထားများမှာ ဆိုင်ကယ် နှင့် သုံးဘီးဆိုင်ကယ်အား (၂၀၀) ကျပ်၊ ယာဉ်ငယ် (၃၀၀) ကျပ်၊ ယာဉ်လတ် (၅၀၀) ကျပ်၊ ယာဉ်ကြီး (၃တန်အထက် ) (၇၀၀)ကျပ်နှင့် ယာဉ်ကြီး(တန်ပို) (၃၀၀၀) ကျပ် အသီးသီးဖြစ်ကြောင်းနှင့် အဆိုပါ ဈေးနှုန်းများကို စည်ပင်သာယာရေးဌာနမှ သတ်မှတ်ထားပေးခြင်းဖြစ်ကြောင်းအပြင် သတ်မှတ် ကောက်ခံနှုန်းထားများ ထက်ပို၍ ကောက်ခံခြင်း ပြုလုပ်ပါက စည်ပင်သာယာရေးဌာနမှ အရေးယူနိုင်ကြောင်း သိရသည်။
သတင်း - ကိုဇောင်း
