ကယားပြည်နယ်၊ လွိုင်ကော်မြို့တွင် ဖွင့်လှစ်မည့်ဒေသဆိုင်ရာ ဧည့်လမ်းညွှန် သင်တန်း တက်ရောက်လိုသူများ ၂၀၁၈ ခုနှစ်၊ နိုဝင်ဘာလ (၁၁)ရက်နေ့ လျှောက်ထားနိုင်ပြီး သင်တန်းပြီးဆုံးပါက ဒေသဧည့်လမ်းညွှန် လိုင်စင် ထုတ်ပေးမည်ဖြစ်ကြောင်း သိရသည်။
ကယားပြည်နယ် ဟိုတယ်နှင့် ခရီးသွားညွှန်ကြားမှုဦးစီးဌာနက ဖွင့်လှစ်သည့်အဆိုပါ သင်တန်းတွင် သင်တန်းသား (၁၂၀) ဦး လက်ခံသွားမည်ဖြစ်ကာ ကယားပြည်နယ်အတွင်း မြန်မာနိုင်ငံသား အသက်(၁၈)နှစ်ပြည့်ပြီး အနိမ့်ဆုံး တက္ကသိုလ်ဝင်တန်းအောင်မြင်ပြီးသူများ လျှောက်ထားနိုင်ကြောင်း သိရသည်။
"သင်တန်းပြီးရင် သုံးနှစ်သက်တမ်းလိုင်စင်ပေးမယ်။ ဒါကို သူတို့ လုပ်သည်ဖြစ်စေ၊ မလုပ်သည်ဖြစ်စေ (၃)နှစ်ပြည့်ရင် သက်တမ်းပြန်တိုးရပါမယ်။ မတိုးရင် အလိုလျောက် ပျက်ပြယ်သွားနိုင်ပါတယ် " ကယားပြည်နယ် ဟိုတယ်နှင့် ခရီးသွား ညွှန်ကြားမှုဦးစီးဌာန ဦးစီးမှူး ဦးဝင်းမြင့်ဦးက တာချီလိတ်သတင်း အေဂျင်စီသို့ ပြောသည်။
လျှောက်ထားသူများ အနေဖြင့် မှတ်ပုံတင်မိတ္တူ ၊ တက္ကသိုလ်ဝင်တန်းအောင်လက်မှတ် (သို့မဟုတ်) ဘွဲ့လက်မှတ် မိတ္တူ ၊ ရပ်ကွက်ထောက်ခံစာ ၊ ရဲစခန်းထောက်ခံစာများဖြင့် သင်တန်းကြေး တစ်ဦးလျှင် ကျပ်တစ်သိန်းပေးသွင်း၍ ကယားပြည်နယ်ဟိုတယ်နှင့်ခရီးသွားညွှန်ကြားမှုဦးစီးဌာန လွိုင်ကော်ရုံးသို့ နိုဝင်ဘာလ (၁၁) ရက်နေ့ နောက်ဆုံးထား၍ လျှောက်ထားရမည် ဖြစ်ကြောင်း သိရသည်။
ဒေသဆိုင်ရာ ဧည့်လမ်းညွှန်သင်တန်းအား နိုဝင်ဘာလ (၁၂) ရက်နေ့စ၍လွိုင်ကော်တက္ကသိုလ်တွင် စတင်ဖွင့်လှစ်သင်ကြားပေးသွားမည်ဖြစ်ပြီး လက်ရှိတွင် လာရောက်လျှောက်ထားသူ (၁၀၀)နီးပါး ရှိနေပြီဖြစ်ကြောင်း သိရသည်။
လျှောက်ထားလိုသူများအနေဖြင့် အသေးစိတ်သိရှိလိုပါက ကယားပြည်နယ် ဟိုတယ်နှင့် ခရီးသွားညွှန်ကြားမှု ဦးစီးဌာန လွိုင်ကော်ရုံး ဖုန်း 0832221078 ၀၈၃ ၂၂၂ ၁၀၇၈ သို့ ဆက်သွယ်မေးမြန်းနိုင်ကြောင်း သိရသည်။
သတင်း ဆန်းဖြိုးထွန်း
~~~~~~~~~~~~~~~~~~ ကြော်ငြာ ~~~~~~~~~~~~~~~~~~~~ 
