နေဖြိုးမြင့် - Tachileik News Agency
ကျောက်မဲ၊ အောက်တိုဘာလ ( ၈ ) ရက်
ရှမ်းပြည်နယ်မြောက်ပိုင်း ကျောက်မဲမြို့တွင် မွေးမြူရေးကြက်စာအဖြစ်အသုံးပြုသည့် ကုန်ကြမ်းပြောင်းများကို တရုတ်ကအဝယ်ရပ်ထားသဖြင့် ပြောင်းဆံအသစ်အဟောင်းရောနှော ရောင်းချလာရာ ဒေသတွင်း ကြက်စာအရည်အသွေးကျလာသဖြင့် ဒေသတွင်းမွေးမြူရေးသမားများထိခိုက်လာကြောင်း သိရသည်။
“မနှစ်ကပြောင်းဆံအဟောင်းက ဒီနှစ်ပေါ်တဲ့ ပြောင်းထက် ဈေးပိုရတယ်လေ။ အဲဒါကြောင့် တချို့က လူလည်ကျတာ။ တရုတ်က အဝယ်ပိတ်ထားတော့ ကြက်ခြံသမားတွေပဲ သုံးဖို့ရှိတာ။ အဲဒီလို (ပြောင်းဆံ) အဟောင်းနဲ့အသစ် ရောထားတာမိတော့ နစ်နာတာပေါ့။ မလုပ်သင့် ဘူး “ ဟု ကျောက်မဲမြို့ ခိုမုန်းကျေးရွာမှ ပြောင်းဆံ ဝယ်ရောင်းလုပ်ကိုင်သူ ဦးအိုက်လန်း ကပြောသည်။
ကြက်စာအရည်အသွေးကျဆင်းမှုကြောင့် ကြက်များတွင် အစာလမ်းကြောင်းဆိုင်ရာရောဂါများ ပိုမိုဖြစ်ပွား လာကြောင်း ကျောက်မဲရှိ မွေးမြူရေးသမားများ ထံမှသိရသည်။
“ပြောင်းကလည်း မနှစ်ကပြောင်းနဲ့ ဒီနှစ်ပြောင်း ရောထည့်ခံရတာတွေရှိတယ်။ စိုထိုင်းဆမညီတော့ ကြက်တွေ အစာလမ်းကြောင်းရောဂါ အဖြစ်များလာတယ် “ ဟု ကြက်မွေးမြူရေး လုပ်ကိုင်သူ ကိုဌေးက ပြောသည်။
အချို့ပြောင်းပွဲစားများက ယခင်နှစ်လက်ကျန် ပြောင်းဆံအဟောင်းနှင့် ယခုနှစ် ပြောင်းဆံအသစ်အား ရောနှောရောင်းချခြင်းကြောင့် ပြောင်းဆံစိုထိုင်းဆ မညီမမျှဖြစ်ရသဖြင့် အစာလမ်းကြောင်းရောဂါ ဖြစ်ပွားကာ ကြက်များဥနှုန်း ကျဆင်းခြင်း၊ သေဆုံးခြင်းများ ဖြစ်ပွားနေကြောင်း သိရသည်။
“အရင်ကတော့ အစာကို ကိုယ်တိုင်စပ်ကြတယ်။ အဲဒါက သန့်သေးတယ်။ အခုက ကိုယ်တိုင်စပ်တာ သိပ်မရှိတော့ဘူး။ ဗီယက်နမ်ကဝင်တဲ့ အစာနုကို ဒီက ကုန်ကြမ်းနဲ့အချိုးကျရောပြီး ပြန်ကျွေးရတာ။ အဓိကကုန်ကြမ်းဖြစ်တဲ့ ပြောင်းဆံက အရောဖြစ်နေရင် ခုနက ကြက်ရောဂါဖြစ်တော့တာပဲ “ ဟု မွေးမြူရေးသမား ကိုရဲလင်း ကပြောသည်။
ရှမ်းပြည်နယ်အတွင်း ဥစားကြက်၊ အသားစား ကြက် မွေးမြူရေးလုပ်ငန်းကို တောင်ကြီးနှင့် ကျောက်မဲ မြို့များ၌ အများဆုံးလုပ်ကိုင်ပြီး ရှမ်းပြည်နယ်မှထွက်ရှိသည့် ကြက်ဥများမှာ ပြည်တွင်း၌ အရည်အသွေးအကောင်းမွန်ဆုံး ဟု အသိအမှတ်ပြုခံထားရကြောင်း မွေးမြူရေးသမားများထံမှ သိရသည်။
