COVID 19 ကပ်ဘေးခံစားနေရသည့် ပြည်သူများအတွက် APTERR Tler-3 2020 အစီအစဉ်အရ ကိုရီးယားသမ္မတနိုင်ငံက လှူဒါန်းထားသော ဆန်များကို မကွေးတိုင်းဒေသကြီးအတွင်းမှ quarantine ဝင်နေရသူများအတွက် ဖြန့်ဝေပေးထားရာ ၂၀၂၀ ခုနှစ်၊ ဒီဇင်ဘာလ (၂၂) ရက်နေ့အထိ ဆန် (၈၈) တန်ကျော် ပေးဝေထားပြီးဖြစ်ကြောင်း သိရသည်။

ဟု မကွေးတိုင်းစိုက်ပျိုးရေး ဦးစီးဌာန ၊ ဦးစီးအရာရှိ ဦးစိုးသိန်းက တာချီလိတ်သတင်းအေဂျင်စီသို့ ပြောသည်။

ကိုရီးယားသမ္မတနိုင်ငံ က APTERR Tler-3 2020 အစီအစဉ်အဖြစ်  ဆန်တန်ချိန် (၆၀၀) ကို စစ်ကိုင်း၊ မကွေး၊ တနင်္သာရီ၊ ဧရာဝတီ၊ ရှမ်း၊ မွန်၊ ချင်း၊ ကရင်၊ ကယား၊ ကချင် တိုင်းဒေသကြီးနှင့် ပြည်နယ်(၁၀)ခုအတွက် ထောက်ပံ့ထားရာ မကွေးတိုင်းဒေသကြီးအတွက် ခွဲတမ်း တန်ချိန် (၁၀၀) ရရှိထားခြင်းဖြစ်ကြောင်း သိရသည်။

အဆိုပါ ဆန်တန်ချိန် (၁၀၀)အားဖြန့်ဝေရေးအတွက် တိုင်းအစိုးရအဖွဲ့  အစည်းအဝေးဖြင့်ဆုံးဖြတ်ရာ မကွေး ၊ မင်းဘူး ၊ အောင်လံ ၊ ပခုက္ကူ နှင့် ဂန့်ဂေါ မြို့ နယ်များအတွက် (၄၀)ကီလို အိတ် (၁၂၀)စီ၊ တောင်တွင်း နှင့် မြို့သစ်မြို့နယ်များအတွက် (၄၀)ကီလိုအိတ် (၁၀၀)စီ ၊ နတ်မောက် ၊ ပွင့်ဖြူ ၊ စလင်း ၊ သရက် ၊ မင်းလှ ၊ဆင်ပေါင်ဝဲ ၊ ရေစကြို ၊ မြိုင် ၊ ချောက်၊ ရေနံချောင်း၊ ပေါက် နှင့် ဆိပ်ဖြူမြို့နယ်များ အတွက် (၄၀)ကီလိုအိတ် (၈၀)စီ ၊ ငဖဲ၊ စေတုတ္တရာ ၊ ကံမ ၊မင်းတုန်း ၊ ထီးလင်း နှင့် ဆော မြို့နယ်များအတွက် (၄၀)ကီလိုအိတ် (၄၀)စီ လတ်တလော ဖြန့်ဝေသွားမည်ဟု သိရသည်။

အဆိုပါဆန်များ ဒီဇင်ဘာ (၆) ရက်နေ့တွင် မကွေးတိုင်းစိုက်ပျိုးရေးရုံးသို့ ရောက်ရှိကာ တိုင်းအတွင်း Quarantine စင်တာအသီးသီးရှိ လူဦးရေပေါ်မူတည်၍ ခွဲဝေထောက်ပံ့ရန် ဒီဇင်ဘာ (၁၀)ရက်နေ့တွင် မကွေးတိုင်းအစိုးရအဖွဲ့ က အစည်းအဝေးခေါ်ယူ ဆုံးဖြတ်ခဲ့ကြောင်း စိုက်ပျိုးရေးဦးစီးဌာနထံမှ သိရသည်။

မကွေးတိုင်းဒေသကြီးအတွင်းရှိ မြို့နယ်ပေါင်း (၂၅) ခုတွင် Quarantine စင်တာ (၅၀၀) ကျော်ရှိပြီး လတ်တလော ကန့်သတ်စောင့်ကြည့်ထားသူ ဦးရေ (၃၀၀၀) ဝန်းကျင်ရှိကြောင်း မကွေးတိုင်းပြည်သူ့ ကျန်းမာရေးဦးစီးဌာနမှ သိရသည်။

Tachileik News Agency

သတင်း/ဓာတ်ပုံ- ဖီးနစ်