ရှမ်းပြည်နယ်တွင်း ပိတ်မိနေသည့် ကုန်တင်ယာဉ်များမှ ယာဉ်မောင်း၊ ယာဉ်နောက်လိုက်များကို COVID 19 rapid test kit ဖြင့် အခမဲ့ စစ်ဆေးပေးနေ
ရှမ်းပြည်နယ်အတွင်း COVID 19 ထိန်းချုပ်ရေးအတွက် ၂၀၂၀ ခုနှစ်၊ အောက်တိုဘာလ ဒုတိယပတ်အထိ ပြည်နယ်တွင်း ဖြတ်သန်းသည့် ကုန်တင်ယာဉ်များမှ ယာဉ်မောင်း၊ ယာဉ်နောက်လိုက်တို့အား COVID 19 rapid test kit ဖြင့် အခမဲ့စစ်ဆေးခြင်းကို ၂၀၂၀ ခုနှစ်၊ အောက်တိုဘာလ (၃)ရက်နေ့၌ စတင်လုပ်ဆောင်ပေးနေသည်။
“ကုန်တင်ယာဉ်နဲ့ ပတ်သက်လို့ ကျန်းမာရေးဝန်ကြီးဌာနက test kit ပေးလာလို့ စစ်ဆေးပေးဖို့ ကျွန်တော်တို့ အစည်းအဝေးဆုံးဖြတ်ကြတယ်။ နိုင်ငံတော်အဆင့်က ထုတ်ပြန်ထားတဲ့ SOP guideline မှာကိုက တိုင်းကျော်၊ ပြည်နယ်ကျော်ရင် COVID ကင်းစင်ကြောင်းလက်မှတ်ပါရမယ်ဆိုတာ ပါတယ်။ ဒီလက်မှတ်မပါရင် ဘယ်တိုင်းဒေသကြီး၊ ပြည်နယ်ကိုမှ ဖြတ်သန်းလို့ရမှာမဟုတ်ဘူး။ test kit က ရှမ်းတောင်ကို (၇၅၀)နဲ့ ရှမ်းမြောက် (၂၂၅၀) ပဲ ပေးတာလေ။ အဲဒီနှုန်းနဲ့ဆိုရင် အခုလက်ရှိကတော့ လမ်းပေါ်မှာ ဒုက္ခရောက်နေတဲ့ကားကိုပဲ စစ်ပေးနိုင်မှာ။ အသစ်ဝင်လာတဲ့ကားကို စစ်ပေးနိုင်မလား၊ မစစ်ပေးနိုင်ဘူးလားဆိုတာ ပြောမရသေးဘူး။ အကယ်၍ test kit ထပ်ရရင် ကျွန်တော်တို့ စစ်မှာက နှစ်ဂိတ်ရှိတယ်။ ရှမ်းမြောက်က နောင်ချိုဂိတ်စစ်မယ်။ ရှမ်းတောင်အတွက်ကတော့ ရေယားဂိတ်မှာ စစ်မယ်။ အဲဒီလိုတော့ ကျွန်တော်တို့ ဆုံးဖြတ်ထားတယ်”ဟု ရှမ်းပြည်နယ်အစိုးရအဖွဲ့ဝင် လူမှုရေးဝန်ကြီး ဒေါက်တာ မျိုးထွန်းက တာချီလိတ်သတင်းအေဂျင်စီသို့ ပြောသည်။
လက်ရှိတွင် ပြည်နယ်တွင်း ပိတ်မိနေသည့် ကုန်တင်ယာဉ်များမှ ယာဉ်မောင်းနှင့် ယာဉ်နောက်လိုက်များအား ကျန်းမာရေးနှင့် အားကစားဝန်ကြီးဌာနက ရှမ်းပြည်နယ်အတွက် ပံ့ပိုးပေးသည့် test kit များဖြင့် အခမဲ့စစ်ဆေးပေးခြင်းကို လုပ်ဆောင်နေပြီး test kit များရရှိပါက ပြည်နယ်တွင်း ဝင်လာမည့် ကုန်တင်ယာဉ်များမှ ယာဉ်မောင်း၊ ယာဉ်နောက်လိုက်များအား စစ်ဆေးပေးသွားမည်ဖြစ်ကြောင်း သိရသည်။
ရှမ်းပြည်နယ်တွင်း အခြားတိုင်းဒေသကြီးနှင့် ပြည်နယ်များမှ ဝင်လာသည့် ကုန်တင်ယာဉ်များမှ ယာဉ်မောင်းများ၊ ယာဉ်နောက်လိုက်များကို COVID 19 ကင်းရှင်းကြောင်း ထောက်ခံချက်ပါမှ ဝင်ခွင့်ပြုမည်ဖြစ်ပြီး ပြည်နယ်တွင်းမှ ကုန်တင်ယာဉ်များ အခြားတိုင်းဒေသကြီးနှင့် ပြည်နယ်များသို့ ဖြတ်သန်းခွင့် ကန့်သတ်ခြင်းကို အောက်တိုဘာလ (၁)ရက်နေ့မှ (၁၄)ရက်နေ့အထိ သတ်မှတ်လိုက်ရာ ပြည်နယ်တွင်း နယ်စပ်ကုန်သွယ်ရေးလမ်းကြောင်း၌ ကုန်တင်ယာဉ်အများအပြား ပိတ်မိနေခြင်းဖြစ်သည်။
COVID 19 ထိန်းချုပ်နိုင်ရေးအတွက် တိုင်းဒေသကြီးနှင့် ပြည်နယ်အသီးသီး၌ ဖြတ်သန်းသွားလာမည့် ကုန်တင်ယာဉ်များမှ ယာဉ်မောင်းများ၊ ယာဉ်နောက်လိုက်များအား COVID 19 ကင်းစင်ကြောင်း (၁၄)ရက်အတွင်း စစ်ဆေးထားသည့် ကျန်းမာရေးထောက်ခံချက်များ ပါဝင်ရမည်ဖြစ်ရာ rapid test kit များဖြင့် စစ်ဆေးပေးခြင်းကို စတင်ဆောင်ရွက်နေခြင်းဖြစ်သည်။
Tachileik News Agency
သတင်း - ချယ်ရီထိုက်
