ကယားပြည်နယ် လွိုင်ကော်မြို့တွင်   Covid-19 အတည်ပြုလူနာ တစ်ဦးထပ်တိုး

ကယားပြည်နယ်၊ လွိုင်ကော်မြို့တွင် ရန်ကုန်မှပြန်လာ၍ ပညာရေးကောလိပ် quarantine center ၌ အသွားအလာ ကန့်သတ်ထားပြီး ဓာတ်ခွဲနမူနာ ရယူစစ်ဆေးရာမှ အမျိုးသမီး (၁) ဦး၌ COVID 19 ပိုးတွေ့ရကြောင်း ၂၀၂၀ ခုနှစ်၊ အောက်တိုဘာလ (၂၃)ရက်နေ့၌ ဓာတ်ခွဲအဖြေရလာ၍ ကယားပြည်နယ်တွင် အတည်ပြုလူနာ (၂)ဦး ရှိလာပြီဖြစ်သည်။

ထပ်တိုးလာသည့် အတည်ပြုလူနာအမျိုးသမီးမှာ ရန်ကုန်မြို့ရှိ အထည်ချုပ်လုပ်ငန်း၌ လုပ်ကိုင်နေသူတစ်ဦးဖြစ်ပြီး အောက်တိုဘာလ (၁၄)ရက်နေ့က ပြန်လာ၍ quarantine center ၌ အသွားအလာ ကန့်သတ်ထားခြင်းဖြစ်သည်။

ကယားပြည်နယ်၏ ပထမဆုံး Covid-19 အတည်ပြုလူနာကို အောက်တိုဘာလ (၁၅)ရက်နေ့၌ တွေ့ခဲ့ရခြင်းဖြစ်ပြီး အဆိုပါ အတည်ပြုလူနာမှာလည်း ရန်ကုန်မှပြန်လာ၍ လွိုင်ကော်ပညာရေးကောလိပ်ရှိ quarantine center တွင် ထားရှိကာ ဓာတ်ခွဲနမူနာစစ်ဆေးရာမှ တွေ့ခဲ့ရခြင်းဖြစ်သည်။

တောင်ကြီးမြို့ရှိ ပြည်သူ့ကျန်းမာရေးဓာတ်ခွဲဌာနတွင် အောက်တိုဘာလ (၂၃) ရက်နေ့က ရှမ်းပြည်နယ် တောင်ပိုင်း၊ အရှေ့ပိုင်းနှင့် ကယားပြည်နယ်တို့မှ ဓာတ်ခွဲနမူနာ (၄၅၉)ခုအား စစ်ဆေးခဲ့ရာ ကယားပြည်နယ်မှ အတည်ပြုလူနာ (၁)ဦးကို တွေ့ရခြင်းဖြစ်သည်။