ပြည်ပမှ ပြန်လာ၍ ရန်ကုန်၌ အသွားအလာကန့်သတ်ထားသူ (၉)ဦးအပါအဝင် COVID 19 ပိုးတွေ့ရသူ (၁၉)ဦး ထပ်တိုးလာသဖြင့် ၂၀၂၀ ခုနှစ်၊ စက်တင်ဘာလ (၂)ရက်နေ့ နံနက်အထိ မြန်မာနိုင်ငံတွင် အတည်ပြုလူနာ (၉၃၈)ဦးရှိလာပြီဖြစ်သည်။

ထပ်တိုးတွေ့ရသည့် COVID 19 ကူးစက်ခံရသူများတွင် ပြည်ပမှပြန်လာ၍ ရန်ကုန်၌ အသွားအလာကန့်သတ်ထားသည့် ရှမ်းပြည်နယ်တွင်းမှ (၃)ဦး၊ ကချင်ပြည်နယ်မှ (၂)ဦး၊ မန္တလေးမှ (၁)ဦးနှင့် ရန်ကုန်မှ (၃)ဦးတို့လည်းပါဝင်ခြင်းဖြစ်သည်။

အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) (NHL) မှ (ဒုတိယအသုတ် ) ဓာတ်ခွဲ နမူနာ (၅၆၈)ခု နှင့် ဆေးသုတေသနဦးစီးဌာန (DMR)မှ (ဒုတိယအသုတ် )  ဓာတ်ခွဲနမူနာ (၁၂၀) ခု စုစုပေါင်း (၆၈၈)ခု အား စက်တင်ဘာလ (၁)ရက်နေ့ညနေက စစ်ဆေးရာ COVID-19 ရောဂါ ဓာတ်ခွဲအတည်ပြုလူနာသစ် (၁၉) ဦး တွေ့ရှိရခြင်းဖြစ်ကြောင်း ကျန်းမာရေးနှင့် အားကစားဝန်ကြီးဌာနက စက်တင်ဘာလ (၂)ရက်နေ့ နံနက်ပိုင်း၌ သတင်းထုတ်ပြန်သည်။

စက်တင်ဘာလ (၁)ရက်နေ့ တစ်ရက်တာအတွင်း   အမျိုးသားကျန်းမာရေးဓာတ်ခွဲမှုဆိုင်ရာဌာန (ရန်ကုန်) (NHL) မှ ဓာတ်ခွဲ နမူနာ (၁,၃၁၄)ခု၊ ဆေးသုတေသနဦးစီးဌာန (DMR)မှ  ဓာတ်ခွဲနမူနာ (၂၂၂) ခု၊ ပြည်သူ့ကျန်းမာရေးဓာတ်ခွဲမှုဆိုင်ရာဌာန (မန္တလေး) မှ ဓာတ်ခွဲနမူနာ (၂၈၀) ခု၊ ပြည်သူ့ကျန်းမာရေးဓာတ်ခွဲမှုဆိုင်ရာဌာန (မော်လမြိုင်) မှ ဓာတ်ခွဲနမူနာ (၂၅၆) ခု၊ ပြည်သူ့ဆေးရုံကြီး၊ စစ်တွေမြို့မှ ဓာတ်ခွဲနမူနာ (၉၈) ခု၊ ပြည်သူ့ဆေးရုံကြီး၊ ကျောက်ဖြူမြို့မှ ဓာတ်ခွဲနမူနာ (၂၄) ခု၊  နေပြည်တော် ပြည်သူ့ဆေးရုံကြီး ခုတင် (၁၀၀၀)မှ ဓာတ်ခွဲနမူနာ (၁၅) ခု၊ ပြည်သူ့ဆေးရုံကြီး၊ မြောင်းမြမြို့မှ ဓာတ်ခွဲနမူနာ (၄) ခု၊ ပြည်သူ့ဆေးရုံကြီး၊ ဘားအံမြို့မှ ဓာတ်ခွဲနမူနာ (၁၂) ခု၊ ပြည်သူ့ဆေးရုံကြီး၊ ပုသိမ်မြို့မှ ဓာတ်ခွဲနမူနာ (၁၀) ခု နှင့် ရန်ကုန်မြို့၊ အမှတ် (၁) တပ်မတော်ဆေးရုံကြီး ခုတင် (၁,၀၀၀) မှ ဓာတ်ခွဲနမူနာ (၂၀၆) ခု စုစုပေါင်း (၂,၄၄၁)ခု အား စစ်ဆေးပြီးစီးခဲ့ကြောင်း သိရသည်။