ရှမ်းပြည်နယ်(အရှေ့ပိုင်း)တာချီလိတ်ခရိုင်အတွင်း မိုင်းဖြတ်မြို့ရှိ အခြေခံပညာအထက်တန်းကျောင်းများတွင် ၂၀၂၀ - ၂၀၂၁ ပညာသင်နှစ်အတွက် အထက်တန်းအဆင့်ဖြစ်သည့် နဝမတန်း နှင့် ဒဿမတန်း တို့အတွက် ဇူလိုင်လ(၁၃)ရက်နေ့ နံနက်ပိုင်းက စ၍ ကျောင်းအပ်လက်ခံနေပြီး ကျောင်းလာအပ်သည့် ကျောင်းသား ကျောင်းသူများကိုလည်း နှာခေါင်းစည်း(Mask) (၂)ခုစီထုတ်ပေးကြောင်း သိရသည်။
"COVID-19 ကာလမှာ ကျောင်းအပ်လက်ခံရတယ်ဆိုတော့ စနစ်တကျ ကျောင်းဝင်းထဲ ဝင်တာနဲ့ အပူချိန်တိုင်း၊ လက်ဆေးပြီးမှ သတ်မှတ်ထားတဲ့ အတန်းနေရာတွေကို သွားရောက်ပြီးကျောင်းအပ်ရမှာ ဖြစ်ပါတယ် စာသင်ခန်း တစ်ခန်းစီမှာလည်း ကျောင်းသား တစ်ဦးနှင့်တစ်ဦး (၆)ပေခန့်အကွာ အခန်း တစ်ခန်းစီမှာ ကျောင်းသား အယောက်(၂၀)ဦးထားပါမယ် " ဟု အထက(မိုင်းဖြတ်)ကျောင်းအုပ်ဆရာမကြီး ဒေါ်အမာကြည်က ပြောသည်။
ကျောင်းလာရောက်အပ်နှံသည့် ကျောင်းသား/ကျောင်းသူများအား ကျောင်းစာအုပ်များ အပြင် နှာခေါင်းစည်း(Mask) (၂)ခုစီထုတ်ပေးကြောင်းနှင့် အထက်တန်းအဆင့်အတွက် ကျောင်းအပ်နောက်ဆုံး လက်ခံမည့် ရက်မှာ ဇူလိုင် လ (၁၇)ရက်နေ့အထိဖြစ်ကြောင်း သိရသည်။
Tachileik News Agency
သတင်း/ဓါတ်ပုံ - ကိုသာ
