တာချီလိတ်ရှိ ချစ်ကြည်ရေး တံတား(၂)မှ တဆင့် ထိုင်းနိုင်ငံသား (၆)ဦး နေရပ်ပြန်၍ စုစုပေါင်း (၃၆)ဦးရှိလာ
မြန်မာ - ထိုင်းနယ်စပ်ဒေသ၊ တာချီလိတ်မြို့တွင် ရောက်ရှိနေထိုင်ပြီး နေရပ်ပြန်လိုသည့် ထိုင်းနိုင်ငံသားများကို နှစ်နိုင်ငံညှိနှိုင်း၍ ပြန်ခွင့်ပေးထားရာ ၂၀၂၀ခုနှစ် မေလ(၄)ရက်နေ့တွင် (၃၆)ဦးမြောက်အဖြစ် ထိုင်းနိုင်ငံသား (၆)ဦးသည် တာချီလိတ်ရှိ မြန်မာ - ထိုင်း ချစ်ကြည်ရေး အမှတ်(၂)တံတားမှ တဆင့် ပြန်လည်ထွက်ခွာသွားကြောင်း သိရသည်။
ထိုင်းနိုင်ငံသား အမျိုးသား(၁)ဦး နှင့် အမျိုးသမီး (၅)ဦးတို့မှ မေလ(၄)ရက်နေ့ နံနက်(၉)နာရီအချိန်တွင် ပြန်လည်ထွက်ခွာသွားရာ မြန်မာဘက်တာဝန်ရှိသူများက လိုက်ပါပို့ဆောင်ခဲ့ကြခြင်း ဖြစ်သည်။
မြန်မာနိုင်ငံတွင်း နယ်စပ်ဒေသများတွင် ရောက်ရှိနေသည့် ထိုင်းနိုင်ငံသားများ အနေဖြင့် မြန်မာ - ထိုင်း နယ်စပ်ဂိတ်များဖြစ်သည့် ရှမ်းပြည်နယ်အရှေ့ပိုင်းရှိ တာချီလိတ် - မယ်ဆိုင် နယ်စပ်ဂိတ်၊ ကရင်ပြည်နယ်ရှိ မြဝတီ - မဲဆောက်နယ်စပ်ဂိတ်နှင့် တနင်္သာရီတိုင်းဒေသကြီးရှိ ထီးခီး - ကန်ချနပူရီ နယ်စပ်ဂိတ်များမှ ထိုင်းနိုင်ငံဘက်သို့ ပြန်ဝင်ခွင့်ရကြမည်ဖြစ်ကြောင်း သိရသည်။
တာချီလိတ်မြို့တွင်း နေထိုင်နေသည့် ထိုင်းနိုင်ငံသားများအနေဖြင့် မယ်ဆိုင်ဘက်သို့ ပြန်လိုပါက မြန်မာ - ထိုင်း ချစ်ကြည်ရေး အမှတ်(၂)တံတားရှိ လဝက ထံတွင် မေးမြန်းစုံစမ်းနိုင်မည်ဖြစ်ကြောင်း ယခုလို ခွင့်ပြုပေးထားခြင်းသည် တာချီလိတ်မှ အထွက်တာဖြစ်ပြီး မယ်ဆိုင်မှ တာချီလိတ်သို့ လာရောက်လိုသူ ထိုင်းနိုင်ငံသားများကို ခွင့်မပြုပေးထားကြောင်း သိရသည်။
Tachileik News Agency
ဓါတ်ပုံ - CNCMC
