မြန်မာ- ထိုင်းနယ်စပ်တစ်လျှောက် KNPP (ကရင်နီအမျိုးသားတိုးတက်ရေးပါတီ) ထိန်းချုပ်နယ်မြေများနှင့် ကရင်နီဒုက္ခသည် စခန်းတွင် နေထိုင်သူများ အနေဖြင့် အခြားဒေသများသို့ ခရီးသွားလာခြင်းအား ၂၀၂၀ ခုနှစ်၊ မတ်လ (၁၇)ရက်နေ့မှစ၍ ရပ်နားထားရန်နှင့် အခြားဒေသမှ ပြန်လာလိုသူများ မတ်လကုန်တွင် အရောက်ပြန်လာရန် KNPP က ထုတ်ပြန်ထားသည်။
မြန်မာ - ထိုင်းနယ်စပ်နှင့် ကရင်နီဒုက္ခသည်စခန်းရှိ ကရင်နီလူမျိုးများ ကိုရိုနာဗိုင်းရပ်စ် ကာကွယ်နိုင်ရန် ယင်းကဲ့သို့ ကန့်သတ်ခြင်းဖြစ်သည်ဟု ထုတ်ပြန်ချက်တွင် ဖေါ်ပြထားသည်။
မြန်မာ - ထိုင်းနယ်စပ်ဒေသရှိ KNPP ထိန်းချုပ်နယ်မြေမှ ပြေးဆွဲနေသည့် လိုင်းကားများ ဧပြီလ (၁)ရက်နေ့မှ (၃၀) ရက်နေ့အထိ ခရီးစဉ်ပြေးဆွဲမှုရပ်နားထားရန်နှင့် ထုတ်ပြန်ချက်အား တိတိကျကျလိုက်နာကြရန် တိုက်တွန်းထားသည်။
ကန့်သတ်ထားသည့် ကာလအတွင်း လိုအပ်ချက်အရ ခရီးသွားလာသူများနှင့် ပြန်လည်ရောက်ရှိ လာသူများအား ကရင်နီကျန်းမာရေးအဖွဲ့က ကျန်းမာရေးစစ်ဆေးမှုပြုလုပ်မည်ဖြစ်ကြောင်း သိရသည်။
Tachileik News Agency
သတင်း - ဆန်းဖြိုးထွန်း
