မိုင်းလားဒေသအတွင်း ဝူဟန်အဆုတ်ရောင်ရောဂါ ကာကွယ်ရေးအတွက် ပွဲလမ်းသဘင်များနှင့် ပျော်ပွဲရွှင်ပွဲများ လူစုလူဝေးများ ယာယီ တားမြစ်ထား
ပျံ့နှံ့ကူးစက်မှုမြန်ဆန်သည့် ဝူဟန်အဆုတ်ရောင်ရောဂါ(နိုဗယ်ကိုရိုနာဗိုင်းရပ်စ်) ရှမ်းပြည်နယ်အရှေ့ပိုင်း၊ အထူးဒေသ(၄)မိုင်းလားတွင် ကူးစက်ဖြစ်ပွားမှု မရှိစေရေးအတွက် ပျော်ပွဲရွှင်ပွဲ ကျင်းပသည့်နေရာများနှင့် လူစုလူဝေးလှုပ်ရှားမှုများကို ယာယီရပ်တန့် ဖျက်သိမ်းရမည်ဖြစ်ပြီး နယ်စပ်ဂိတ်တွင်လည်း ကျန်းမာရေးစစ်ဆေးမှုများကို ပူးပေါင်းပါဝင် ကူညီပေးကြရန် အထူးဒေသ(၄)မိုင်းလား၏ ငြိမ်းချမ်းရေးနှင့် စည်းလုံးရေးကော်မတီက ၂၀၂၀ခုနှစ် ဇန်နဝါရီလ(၂၆)ရက်နေ့ ရက်စွဲဖြင့် အသိပေးထားရှိသည်။
ဝူဟန်အဆုတ်ရောင်ရောဂါ(နိုဗယ်ကိုရိုနာဗိုင်းရပ်စ်)ကူးစက်မှု မရှိစေရေးအတွက် အများပြည်သူ ကစားကွင်းများနှင့် ပျော်ပွဲရွှင်ပွဲနေရာများအားလုံး လုပ်ငန်းယာယီရပ်နားထားရမည်ဖြစ်ပြီး ဖျော်ဖြေပွဲများ ဘာသာရေးဆိုင်ရာ လုပ်ငန်းများ နှင့် လူစုလူဝေးလှုပ်ရှားမှုများ ကို လတ်တလော အခြေအနေအရ ဖျက်သိမ်းရမည်ဖြစ်ကြောင်း အသိပေးထားသည်။
မည်သည်ဒေသကမဆို အထူးဒေသ(၄)မိုင်းလားသို့ ဝင်ရောက်လာသည့်အခါ နယ်စပ်ဂိတ်တွင် သက်ဆိုင်ရာမှ စစ်ဆေးရေးဆောင်ရွက်သည့်အခါ ပြည်သူများအနေဖြင့် ပူးပေါင်းပါဝင်ပေးရန်လည်း မေတ္တာရပ်ခံထားရှိသည်။
မိုင်းလာအတွင်းရှိ မြို့မဈေးနှင့် စားသောက်ဆိုင်များတွင် တောရိုင်းတိရစ္ဆာန်များ ရောင်းချခြင်း မပြုလုပ်ရန်လည်း တားမြစ်ထားရှိသည်။
ဆေးရုံ၊ ဆေးခန်းများနှင့် စစ်ဆေးရေးဂိတ်များတွင် ဝူဟန်အဆုတ်ရောင်ရောဂါ(နိုဗယ်ကိုရိုနာဗိုင်းရပ်စ်)ပတ်သက်၍ သံသယဖြစ်ဖွယ် လူနာတွေ့ရှိရပါက မိုင်းလားဒေသ၏ ကျန်းမာရေးဦးစီးဌာန ၏ဖုန်း ၁၅၉၀၈၈၁၀၈၁၁ သို့ အမြန်ဆုံး ဆက်သွယ်အကြောင်းကြားရန်လည်း အသိပေးထားရှိသည်။
တရုတ်နိုင်ငံနှင့် အခြားနိုင်ငံများတွင် ၂၀၂၀ ခုနှစ်၊ ဇန်နဝါရီလ (၂7) ရက်နေ့ မြန်မာစံတော်ချိန် နံနက်(၁၀)နာရီခွဲ အချိန်ထိ ဝူဟန်အဆုတ်ရောင်ရောဂါ(နိုဗယ်ကိုရိုနာဗိုင်းရပ်စ်)ကူးစက်ခံရသူ (၂၈၀၀)ဦး ရှိနေပြီး သေဆုံးသူ (၈၀) ဦးရှိရာ ရောဂါကူးစက်ခံရသူများ (၂၈၀၀)ဦးအနက် တရုတ်ပြည်မကြီးတွင် (၂၇၄၄)ဦး၊ ဟောင်ကောင်တွင် (၈)ဦး၊ မကာအို (၅)ဦး၊ ထိုင်ဝမ် (၄)ဦး၊ အခြားအာရှနိုင်ငံများတွင် (၂၆)ဦး၊ ဥရောပတွင် (၃)ဦး၊ မြောက်အမေရိကတွင် (၃)ဦးနှင့် သြစတေးလျတွင် (၄)ဦးတို့ ရှိနေခြင်းဖြစ်ပြီး သေဆုံးသူ (၈၀)ဦးမှာ တရုတ်ပြည်မကြီးမှဖြစ်ကြောင်း သိရသည်။
Tachileik News Agency
