"လိုင်စင်မဲ့ယာဉ်တွေကို ဦးတည်ပြီး စစ်ဆေးဖမ်းဆီးတာမျိုးလုပ်ဖို့ စီမံချက်မပေးထားသေးပါဘူး။ လစဉ် လုပ်ဆောင်ရမယ့် စီမံချက်တွေတော့ ရှိတယ်။ လတ်တလောယာဉ်စစ်တာတွေ လုပ်တယ်ဆိုတာက ယာဉ်/ လမ်း စည်းကမ်း၊ ယာဉ်မောင်းလိုင်စင် စတာတွေကို စစ်ဆေးကြပ်မတ်နေတာ ဖြစ်ပါတယ်။
လားရှိုးမြို့တွင်းမှာက ဆိုင်ကယ်ကို (၃) ယောက်စီးပြီး လုယက်တာတွေ အဖြစ်များလာတဲ့အတွက်လည်း ဆိုင်ကယ်တွေကိုလည်း စစ်ဆေး ကြပ်မတ်တာ လုပ်နေပါတယ်။ ဖမ်းဆီးဖို့ စီမံချက် မရှိသေးဘူးဆိုပေမဲ့ ဥပဒေအရဆိုရင် လိုင်စင်မဲ့ယာဉ်တွေကို စီးနင်းခွင့်မရှိပါဘူး" ဟု အမှတ် (၂၀) ယာဉ်ထိန်းရဲဒုတပ်ဖွဲ့ခွဲ(ရှမ်း-မြောက်)၊ အမှတ် ( ၁၂၁ ) ယာဉ်ထိန်း ရဲတပ်ဖွဲ့စုမှူးရုံး(လားရှိုး)မှ ရဲမှူး မျိုးမင်းအောင်က တာချီလိတ်သတင်းအေဂျင်စီသို့ ပြောသည်။

လားရှိုးမြို့၌ အောက်တိုဘာလအတွင်း လိုင်စင်မဲ့မော်တော်ယာဉ်များအား ဖမ်းဆီးအရေးယူသွားမည်ဟု လူမှုကွန်ယက်တွင် ရေးသားဖြန့်ဝေမှုများကိုလည်း တွေ့နေရသော်လည်း အဆိုပါသတင်းမှာ မှားယွင်းနေကြောင်း ရဲမှူး မျိုးမင်းအောင်က ဆိုသည်။

ယာဉ်ထိန်းရဲတပ်ဖွဲ့၏ ပုံမှန် လုပ်ဆောင်ချက်ဖြစ်သည့် မော်တော်ယာဉ် မောင်းနှင်စီးနင်းသူများ ထိုင်ခုံခါးပတ် ပတ်ထားခြင်းရှိမရှိ၊ မော်တော်ယာဉ်မောင်းနှင်သူများ ယာဉ်မောင်းလိုင်စင် ရှိမရှိ၊ ယာဉ်/လမ်း စည်းကမ်းလိုက်နာမှုရှိမရှိ နှင့် မော်တော်ဆိုင်ကယ်စီးနင်းသူများကိုလည်း ဆိုင်ကယ်စီးဦးထုပ် ဆောင်းထားခြင်း ရှိမရှိ၊ မော်တော်ဆိုင်ကယ်တစ်စီးကိုနှစ်ဦးထက်ပို၍ စီးနင်းသူများအား တားမြစ်စစ်ဆေး သတိပေးခြင်း စသည်တို့ ကိုလုပ်ဆောင်နေခြင်းဖြစ်သည်ဟု သိရသည်။

" ကိုယ်တွေက တစ်ပိုင်တစ်နိုင်စီးပွားရှာစားနေရတဲ့အတွက် လိုင်စင်မဲ့မော်တော်ယာဉ်ကို လုပ်ငန်း လိုအပ်ချက်အရ ဝယ်စီးနေရတာဆိုတော့ စိုးရိမ်နေရတယ်။ တစ်မြို့လုံးမှာလည်း လိုင်စင်မဲ့ယာဉ်ကို လိုင်စင်ရှိသလို အယောင်ဆောင်ပြီး စီးနေတဲ့သူတွေအများသားပဲ။ အခုအဲဒီလိုသတင်းထွက်နေတော့ တစ်ချို့ တွေက ဖမ်းခံရမှာကြောက်လို့ ပြန်ရောင်းနေတာတောင်ရှိတယ်" ဟု လားရှိုးမှ လုပ်ငန်းရှင် တစ်ဦးက ပြောသည်။

မန္တလေးတိုင်းဒေသကြီး ပြင်ဦးလွင်မြို့နှင့် မန္တလေးမြို့အကြား ပြည်ထောင်စုလမ်းမကြီးပေါ်တွင် စက်တင်ဘာလနှင့် အောက်တိုဘာလများအတွင်း လိုင်စင်မဲ့မော်တော်ယာဉ်များ ဖမ်းဆီးခံရပြီးနောက် လားရှိုးတွင်လည်း လိုင်စင်မဲ့ယာဉ်များ ဖမ်းဆီးမည်ဟု သတင်းများထွက်ပေါ်နေခဲ့ခြင်းဖြစ်သည်။

သတင်း #နေဖြိုးမြင့်