ဒီပါဝလီပွဲတော်အခမ်းအနားကို ပြည်ထောင်စုမြန်မာနိုင်ငံတော်အလံအား အလေးပြုခြင်းဖြင့် စတင်ဖွင့်လှစ်ပြီးနောက် ပြည်သူ့လွှတ်တော်ကိုယ်စားလှယ် ဦးဌေးဝင်းနှင့် တာချီလိတ်ဂေါ်ရခါးအဖွဲ့၏ အကြံပေးပုဂ္ဂိုလ် ဦးဆူရာပါ(ချ်) တို့က ရိုးရာဆီမီးကို ထွန်းညှိပူဇော်ခဲ့ကြသည်။

အခမ်းအနားတက်ရောက်လာသည့် တြိဂံတိုင်းစစ်ဒေသ တိုင်းဦးစီးမှူး ဗိုလ်မှူးကြီး ဇော်ပိုင်ထွန်းက အဖွင့်အမှာစကားပြောကြားရာတွင် ဂေါ်ရခါးလူမျိုးများသည် လွတ်လပ်ရေးသမိုင်းတွင် ဗမာ့တပ်မတော်နှင့်အတူ တိုက်ပွဲဝင်ခဲ့ကြသူများဖြစ်ပြီး ရှမ်းပြည်နယ် မိုင်းဆတ်၊ လွယ်လမ်း၊ မိုင်းယောင်း၊ တာချီလိတ်ဒေသများ၌ ကျူးကျော်လာသည့် ကူမင်တန်တရုတ်ဖြူများကို တိုက်ခိုက်ရာတွင်လည်း ပါဝင်ခဲ့သူများဖြစ်သည်ဟု ထည့်သွင်း ပြောကြားသွားသည်။

ဂေါ်ရခါးလူမျိုးများတွင် အောင်ဆန်းသူရိယဘွဲ့ (၁) ဦး၊ သီဟသူရဘွဲ့ (၃) ဦး၊ သူရဘွဲ့ (၁၅) ဦးနှင့် သူရဲကောင်းမှတ်တမ်းဝင် (၆၁) ဦးတို့ ရရှိခဲ့သည့်အပြင် မြန်မာပြည်သူများ၏ ဘောလုံးဘုရင်အဖြစ် သတ်မှတ်ခံထားရသည့် ဘောလုံးအားကစားသမား မဟာဒူး၊ မြန်မာနိုင်ငံရဲတပ်ဖွဲ့၏ ပထမဆုံးအမျိုးသမီးရဲမှူးကြီး ဒေါ်ဥမ္မာရင်မီတို့မှာ ဂေါ်ရခါးလူမျိုးများဖြစ်ကြသည်ဟု ဂုဏ်ပြုပြောကြားသွားသည်။

တာချီလိတ်ဂေါ်ရခါး ဟိန္ဒူဓမ္မအဖွဲ့ ဥက္ကဌ ဦးတင်ရွှေက နှုတ်ခွန်းဆက်အမှာစကားပြောကြားပြီး တာချီလိတ်ဂေါ်ရခါးဟိန္ဒူဓမ္မအဖွဲ့၏ ဂေါ်ရခါးစာပေပညာရေးမှူး ဦးဌာနေဆိုင်မှ ဒီပါဝလီပွဲတော်အကြောင်း ရှင်းလင်းပြောကြားကာ မြန်မာနိုင်ငံလုံးဆိုင်ရာဂေါ်ရခါးအမျိုးသားအဖွဲ့ချုပ်(ဗဟို)မှ ဒုဥက္ကဌ ဆရာမကြီးဒေါ်ဘီစနူးက ကျေးဇူးတင်စကားပြောကြားခဲ့သည်။

အခမ်းအနားတွင် ဂေါ်ရခါးရိုးရာအစားသောက်များဖြင့် ဧည့်ခံပြီး ဂေါ်ရခါးရိုးရာအကများဖြင့် ကပြဖျော်ဖြေခဲ့ကြသည်။

 ဒီပါဝလီပွဲတော်အခမ်းအနားသို့ တြိဂံတိုင်းစစ်ဒေသ တိုင်းဦးစီးမှူး ဗိုလ်မှူးကြီး ဇော်ပိုင်ထွန်း၊ ပြည်သူ့လွှတ်တော်ကိုယ်စားလှယ် ဦးဌေးဝင်း၊ တာချီလိတ် ဒုခရိုင်ရဲတပ်ဖွဲ့မှူး ရဲမှူး အုန်းလွင်၊ တာချီလိတ်ခရိုင်ဆေးရုံအုပ်ကြီး ဒေါက်တာရွှေဝင်း၊ တာချီလိတ်မြို့နယ် ဒုမြို့နယ်အုပ်ချုပ်ရေးမှူး ဦးမင်းအောင်နှင့် ဌာနဆိုင်ရာများ၊ ဖိတ်ကြားထားသူများ တက်ရောက်ခဲ့ကြသည်။

Tachileik News Agency
သတင်း #ဟန်စိုးထိုက်
ဓါတ်ပုံ -ကျော်ဇင်ဟိန်း