“မကွေးမှာ သမားတော်ကြီးတွေ အစုံရှိနေတယ်ဆိုပေမဲ့ ရောဂါစုံနဲ့ လာပြကြတာဆိုတော့ ရောဂါတစ်ခုကို ထောင့်ပေါင်းစုံကနေ အချိန်ပေးပြီး မကြည့်နိုင်ဘူး။ ဒီဆေးရုံကိုဖွင့်လိုက်တဲ့အတွက် ဆီးချို သွေးချိုရောဂါ ရှင်တွေကို သီးသန့်အချိန်ပေးပြီး ကြည့်နိုင်မယ်။ လိုအပ်တဲ့စစ်ဆေးမှုတွေကို အပြည့်အဝ လုပ်ပေးနိုင်မယ်။ ဆီးချို သွေးချို ရောဂါကုသရေးနဲ့ ပတ်သက်ပြီး မကွေးက ဆရာဝန်တွေကို မြောက်ဥက္ကလာဆေးရုံကိုခေါ်ပြီး တစ်လလောက် သင်တန်းပေးသွားဖို့ အစီအစဉ်လည်းရှိပါတယ်”ဟု ဆေးတက္ကသိုလ်(၁)မှ ဆီးချိုနှင့်ဟိုမုန်း ရောဂါအထူးကုဌာန ပါမောက္ခ ဒေါက်တာကိုကိုက တာချီလိတ်သတင်းအေဂျင်စီသို့ ပြောသည်။

မြန်မာတစ်နိုင်ငံလုံး၌ ၂၀၁၄ ခုနှစ် စစ်တမ်းအရ အသက် (၂၅) နှစ်မှ (၆၅)နှစ်ကြားတွင် ဆီးချို သွေးချိုဖြစ်ပွားသူ (၁၀.၅ ) ရာခိုင်နှုန်းရှိပြီး မကွေးတိုင်းသည် ဆီးချို သွေးချို ဖြစ်ပွားမှု အဆင့် (၅)တွင် ရှိနေကြောင်း သိရသည်။

ယခုအဆောက်အဦးကို ဒိန်းမတ်နိုင်ငံ NOVO Nordisk ကုမ္ပဏီက Myanmar Diabetes Care Program ဖြင့် ၂၀၁၇  ခုနှစ်မှ ၂၀၂၀ ခုနှစ်အထိ(၄)နှစ်တာ စီမံချက်ကာလအတွင်း (၅) ခု မြောက်ဖွင့်လှစ်ခြင်းဖြစ်ပြီး ကျပ်သိန်း(၄၅၀)ဝန်းကျင် သုံးစွဲထားခြင်းဖြစ်ကြောင်းသိရသည်။

အလားတူ ကုသဆောင်များကို ရန်ကုန်မြို့ရှိ သင်္ကန်းကျွန်းစံပြဆေးရုံကြီးနှင့် မော်လမြိုင်ပြည်သူ့ဆေးရုံကြီး တို့တွင် ဆက်လက်ဆောက်လုပ်ပေးသွားမည်ဖြစ်သည်။

စီမံချက်ကာလအတွင်း အင်ဆူလင်ဆေးများ၊ ဆီး ချိုရောဂါရှိ၊ မရှိ စစ်ဆေးသည့်စက်များကိုလည်း ထောက်ပံ့ပေးသွားမည်ဖြစ်ပြီး ဆီးချို သွေးချိုရောဂါနှင့်ပတ်သက်သည့် လုပ်ငန်းများအတွက် အမေရိကန်ဒေါ်လာ (၂.၂)သန်း သုံးစွဲရန်လျာထားကြောင်း ဒိန်းမတ်သံအမတ် ကြီး Mr John Nielsen ၏ ပြောကြားချက်အရ သိရသည်။

ဆီးချိုသွေးချိုရောဂါကာကွယ်ရန်အတွက် အချို၊ အငံနှင့် အဆီအဆိမ့်များအား အလွန် အမင်းစားသုံးကြခြင်းကို ရှောင်ကြဉ်၍ ကိုယ်လက်လှုပ်ရှားမှု ပြုလုပ်ခြင်းဖြင့် ကာကွယ်နိုင်မည်ဖြစ်ကြောင်း သိရသည်။

သတင်း၊ဓာတ်ပုံ #ဖီးနစ်