နောက်ဆုံးအယူခံရှုံးနိမ့်ထားသည့် မြန်မာနိုင်ငံသားနှစ်ဦးအနေဖြင့် အသက်ရှင်သန်ပိုင်ခွင့် ရရှိခံစားနိုင်ရေးအတွက် ထိုင်းနိုင်ငံအမျိုးသား လူ့အခွင့်အရေး ကော်မရှင်က ကူညီဆောင်ရွက်ပေးပါရန်နှင့် အဆိုပါ မြန်မာလုပ်သားနှစ်ဦးအတွက် ၂၀၁၄ ခုနှစ်၊ အောက်တိုဘာလက တစ်ကြိမ်၊ ၂၀၁၅ ခုနှစ်၊ ဒီဇင်ဘာလက တစ်ကြိမ် မေတ္တာရပ်ခံစဉ်ကလည်း ကူညီဆောင်ရွက်ပေးခဲ့မှုများအပေါ် မြန်မာ လူ့အခွင့်ရေး ကော်မရှင်အနေဖြင့် ကျေးဇူးတင်ကြောင်း ၂၀၁၉ ခုနှစ်၊ စက်တင်ဘာလ (၉)ရက်နေ့ နေ့စွဲဖြင့် ပေးပို့လိုက်သည့် ညှိနှိုင်းမေတ္တာရပ်ခံစာတွင် ဖေါ်ပြထားသည်။

အဆိုပါ မြန်မာလုပ်သားနှစ်ဦးကို ပြစ်ဒဏ် လျော့ပေါ့ရေးအတွက် အသနားခံစာတင်ရန် မြန်မာအစိုးရကိုယ်စား ထိုင်းနိုင်ငံ ဆိုင်ရာ မြန်မာသံအမတ်ကြီး ဦးမျိုးမြင့်သန်း ဦးဆောင်သည့် သံရုံးတာဝန်ရှိသူများကလည်း စက်တင်ဘာလ (၅)ရက်နေ့က ထိုင်းရှေ့နေများကောင်စီနှင့်တွေ့ဆုံပြီး ဆောင်ရွက်နေခြင်း ဖြစ်သည်။

ထိုင်းဘုရင်မင်းမြတ်ထံ အသနားခံစာတင်နိုင်ရေး မြန်မာအစိုးရက ကူညီဆောင်ရွက်ပေးရေး လုပ်ဆောင် နေကြောင်းနှင့် တပ်မတော်ကာကွယ်ရေး ဦးစီးချုပ်ကလည်း ထိုင်းနိုင်ငံရှိ တာဝန်ရှိသူများနှင့် တွေ့ဆုံကာ ကူညီဆောင်ရွက်ပေးရန် ဆွေးနွေးထားကြောင်းကို မြန်မာ့တပ်မတော်မှ ညှိနှိုင်းကွပ်ကဲရေးမှူး (ကြည်း၊ ရေ၊ လေ) ဗိုလ်ချုပ်ကြီး မြထွန်းဦးက အဆိုပါ  မြန်မာလုပ်သားနှစ်ဦးကို ထိုင်းနိုင်ငံ၊ နွန်ဌာဘူရီခရိုင်၊ ဘန်ခွမ်ဗဟို အကျဉ်းထောင်၌ ၂၀၁၉ ခုနှစ်၊ စက်တင်ဘာလ (၃)ရက်နေ့က သွားရောက်တွေ့ဆုံ အားပေးထားသည့်အပြင် ၎င်းတို့နှစ်ဦးလွတ်မြောက်ရေးအတွက် ကူညီဆောင်ရွက်ပေးနေသည့် ထိုင်းနိုင်ငံအခြေစိုက် MWRN ကလည်း သွားရောက်တွေ့ဆုံကာ လိုအပ်သည်များ ကူညီပေးနေကြောင်း သိရသည်။

ဝင်းဇော်ထွန်းနှင့် ဇော်လင်းတို့မှာ ၂ဝ၁၄ ခုနှစ်၊ စက်တင်ဘာလအတွင်းက ခိုတောင်ကျွန်းတွင် ဗြိတိန်နိုင်ငံသား နှစ်ဦး အသတ်ခံခဲ့ရသော ဖြစ်စဉ်၌ ကျူးလွန်ကြောင်း စွပ်စွဲချက်ဖြင့် သေဒဏ်ချမှတ်ခြင်းခံထားရပြီး နောက်ဆုံးအယူခံ ရှုံးနိမ့်ထားခြင်းဖြစ်သည်။

Tachileik News Agency
ဓါတ်ပုံ - MOFA