~~~~~~~~⊰❂ Unicode Version ❂⊱~~~~~~~~

တာချီလိတ်တွင် စတင်ကျင့်သုံးနေသည့် လမ်းဘေးအမှိုက်ပုံးစနစ်မှ စွန့်ပစ်အမှိုက်များကို စည်ပင်က သီးသန့်အစီအစဉ်ဖြင့် သိမ်းဆည်းပေးမည်
***********
ရှမ်းပြည်နယ် (အရှေ့ပိုင်း) တာချီလိတ်မြို့တွင် အမှိုက်များ စနစ်တကျစွန့်ပစ်သည့်အလေ့အကျင့်ဖြစ်စေရန် ရပ်ကွက်များများအလိုက် ထားရှိပေးထားသည့် လမ်းဘေးအမှိုက်ပုံးများမှ အမှိုက်များသိမ်းဆည်းရန် မြို့နယ်စည်ပင်သာယာရေးဌာနက သီးသန့်အစီအစဉ်ဖြင့် ဆောင်ရွက်မည်ဖြစ်ကြောင်း သိရသည်။

ရပ်ကွက်များအတွင်း အမှိုက်သိမ်းခြင်းကို စည်ပင်သာယာရေးဌာနထံမှ လုပ်ကိုင်ခွင့် ရရှိထားသည့် ပုဂ္ဂလိက ကုမ္ပဏီတစ်ခုက လိုက်လံသိမ်းဆည်းခြင်းဖြစ်သော်လည်း စီမံချက်ဖြင့် ထားရှိပေးထားသည့် ရပ်ကွက်တွင်းမှ အမှိုက်ပုံးများကို အဆိုပါ ကုမ္ပဏီက တာဝန်ယူမည်မဟုတ်ဘဲ စည်ပင်သာယာရေးဌာနကသာ အမှိုက်သိမ်းဆည်းမည်ဖြစ်ကြောင်း သိရသည်။

"လမ်းသွားလမ်းလာ ခရီးသွားပြည်သူတွေ လွယ်လင့်တကူ အမှိုက်ပစ်လို့ရအောင် အမှိုက်ပုံးတွေ ချထားပေးတာပေါ့။ ကျွန်တော်တို့ စီမံချက်နဲ့ လမ်းသွားလမ်းလာတွေ အမှိုက်ပစ်လို့ရအောင် ချထားပေးတဲ့ အမှိုက်ပုံးတွေက အမှိုက်တွေကို သီးခြားအမှိုက်ကားနဲ့ သိမ်းပေးသွားမှာ ဖြစ်ပါတယ်။ ကျွန်တော်တို့ ဒီဘတ်ဂျက်ထဲမှာ အမှိုက်သိမ်းယာဉ်တစ်စီး ဝယ်ယူဖို့ စီစဉ်ထားပြီးဖြစ်ပါတယ်။ ဒီ (၁၀) လပိုင်းထဲမှာ ဝယ်ယူပြီးသွားရင် ဒီလုပ်ငန်းတွေကိုအကောင်အထည်ဖော်သွားမှာ ဖြစ်ပါတယ်"ဟု တာချီလိတ်မြို့နယ် စည်ပင်သာယာရေးဌာန အမှုဆောင်အရာရှိ ဦးစိုင်းခွန်ဇော်ဦးက တာချီလိတ်သတင်းအေဂျင်စီသို့ ၂၀၁၉  ခုနှစ်၊ စက်တင်ဘာလ (၆)ရက်နေ့တွင် ပြောသည်။

နယ်စပ်မြို့ တာချီလိတ်တွင် မြို့သာယာလှပရေးဆောင်ရွက်နေခြင်းဖြစ်ပြီး မြို့နယ်အထွေထွေ အုပ်ချုပ်ရေးဦးစီးဌာန၊ စည်ပင်သာယာရေးဌာနနှင့် မဇ္ဇျိမလူမှုကူညီရေးအသင်းတို့က မြို့ပေါ်ရပ်ကွက် (၁၁) ခုတွင် လမ်းသွားလမ်းလာများ အမှိုက်စွန့်ပစ်နိုင်မည့် အမှိုက်ပုံး (၆၄) ပုံးကို သြဂုတ်လအတွင်းက ထားရှိပေးခဲ့ခြင်းဖြစ်သည်။

"ဒါတွေက အိမ်ကထွက်တဲ့ အမှိုက်တွေ ပစ်ဖို့မဟုတ်ပါဘူး။ လမ်းမပေါ်မှာသွားလာနေတဲ့ပြည်သူတွေ အစားအသောက်လေးတွေ စားလာမယ်။ ကြွပ်ကြွပ်အိတ်လေးတွေ ပါလာမယ်။ ရေသန့်သောက်မယ်။ လမ်းမှာသွားရင်းလာရင်း အမှိုက်ရှိလာရင် အမှိုက်ပုံးမှာ လွှင့်ပစ်ဖို့ပဲဖြစ်ပါတယ်။ အိမ်ကထွက်တဲ့ အမှိုက်တွေရော၊ စီးပွားရေးလုပ်ငန်းက အမှိုက်တွေ လာရောက်စွန့်ပစ်လို့ မရပါဘူး"ဟု တာချီလိတ်မြို့နယ် စည်ပင်သာယာရေးဌာန အမှုဆောင်အရာရှိ ဦးစိုင်းခွန်ဇော်ဦးက တာချီလိတ်သတင်းအေဂျင်စီသို့ ပြောသည်။

သြဂုတ်လအတွင်းမှစ၍ ထားရှိပေးထားသည့် လမ်းဘေးအမှိုက်ပုံးများတွင် စနစ်တကျအမှိုက်စွန့်ပစ်ရေး အသိပညာပေး စတေကာများ ကပ်ထားပေးသော်လည်း ကားတာယာဟောင်းများကဲ့သို့ အိမ်နှင့် ဆိုင်များမှ ထွက်ရှိသည့်အမှိုက်စွန့်ပစ်မှုအချို့ ရှိခဲ့သည်ကို တွေ့ရသည်။
လမ်းဘေးအမှိုက်ပုံးများ ထားရှိပေးပြီးနောက် ယခုလတွင် အခြေခံပညာကျောင်းများ၌ အမှိုက်ပုံးများ ထားရှိနိုင်ရေး ဆက်လက်စီစဉ်နေခြင်း ဖြစ်သည်။

သတင်း #ဟန်စိုးထိုက် - Tachileik News Agency