[ျပည္ေထာင္စုလမ္းမႀကီးတေလွ်ာက္ ပစ္ခတ္တုိက္ခုိက္မႈအတြင္း မီးရိႈ႕ဖ်က္ဆီးခံထားရသည့္ ကားမ်ားျဖစ္ပါသည္။]

~~~~~~~~⊰❂ Unicode Version ❂⊱~~~~~~~~

ပြည်ထောင်စုလမ်းမကြီးတွင် ထပ်မံမီးရှို့ခံရသည့် အရပ်ဖက်ကားများမှ လူဦးရေ (၁၄)ဦးကို လူမှုကူညီရေး အသင်းများက ကွတ်ခိုင်သို့ ခေါ်ဆောင်ပေးထား
***********
ရှမ်းပြည်နယ်(မြောက်ပိုင်း) ပြည်ထောင်စုလမ်းမကြီးတွင် ၂၀၁၉ ခုနှစ်၊ စက်တင်ဘာလ (၃)ရက်နေ့ ညပိုင်းက မီးရှို့ခံလိုက်ရသည့် ကုန်တင်ကားနှင့် အိမ်စီးကား (၇)စီးမှ လူဦးရေ (၁၄)ဦးကို လူမှုကူညီရေး အသင်းများက (၆)မိုင်အကွာရှိ ကွတ်ခိုင်မြို့တွင်းသို့ စက်တင်ဘာလ (၄)ရက်နေ့ နံနက်ပိုင်းတွင် ခေါ်ဆောင်ထားပြီဖြစ်ကြောင်း သိရသည်။

ပြည်ထောင်စုလမ်းမကြီး ကွတ်ခိုင် - မူဆယ်လမ်းပိုင်းရှိ နမ့်ကွတ်ကျေးရွာ ဆေးခန်းရှေ့တွင် စက်တင်ဘာလ (၃) ရက်နေ့ညပိုင်းက ကုန်တင်ကားနှင့် အိမ်စီးကားအပါအဝင် စုစုပေါင်း ကား (၉) စီး မီးရှို့ဖျက်ဆီးခံရသည့်အနက် ကား(၂)စီးမှာ လွတ်မြောက်လာခဲ့ပြီး မီးလောင်သွားသည့် ကား(၇)စီးမှ ယာဉ်မောင်း၊ ယာဉ်နောက်လိုက်နှင့် ခရီးသည် (၁၄)ဦးမှာ နမ့်ကွတ်ရွာတွင် ခိုလှုံနေရာမှ လူမှုကူညီရေးအသင်းများထံ ဆက်သွယ်အကူအညီတောင်းခံလာ၍ စက်တင်ဘာလ (၄)ရက်နေ့ နံနက်ပိုင်းတွင် ကွတ်ခိုင်မြို့ရှိ လူမှုကယ်ဆယ်ရေးကွန်ယက်နှင့် နယ်စည်းမခြားပရဟိအသင်း(သီပေါ)တို့မှ သွားရောက် ခေါ်ဆောင်ပေးထားပြီး ခရီးဆက်နိုင်ရေး ကူညီထားကြောင်း သိရသည်။

"နမ့်ကွတ်ကျေးရွာက ကျန်းမာရေးဆေးပေးခန်းရှေ့ တည့်တည့်မှာပဲ ကားတွေကို မီးရှို့ထားတာ။ စုစုပေါင်း (၉) စီး မီးရှို့ခံရတာကို သစ်သီးတင်တဲ့ကား (၂) စီးက ဇွတ်မောင်းပြီး ထွက်ပြေးလို့ လွတ်သွားတယ်လို့ သိရတယ်။ ကျန် (၇) စီးကတော့ လုံးဝမီးလောင်သွားတယ်။ မီးလောင်သွားတဲ့ ကားတွေပေါ်က ယာဉ်မောင်း၊ ယာဉ်နောက်လိုက်နဲ့ အိမ်စီးကားတစ်စီးက ခရီးသည်မိသားစုတစ်စုကို ဒီမနက်ပဲ လူမှုကူညီရေးကွန်ယက်နဲ့ နယ်စည်းမခြားပရဟိတအသင်းတို့ပေါင်းပြီး သွားခေါ်ပေးခဲ့တယ်" ဟု ကွတ်ခိုင်မြို့ရှိ ဗြမ္မစိုရ်နှလုံးသား လူမှုကူညီရေးအသင်းမှ အသင်းဥက္ကဌ ဦးတင်ဝင်းက စက်တင်ဘာလ (၄) ရက်နေ့ နံနက် (၁၀) နာရီတွင် တာချီလိတ်သတင်းအေဂျင်စီသို့ ပြောသည်။

မီးရှို့ခံရသည့် ကား (၇) စီးတွင် အိမ်စီးကားငယ် AD ဗင်ကား တစ်စီး၊ အအေးခန်းကား တစ်စီးနှင့် ၁၂ ဘီးကား (၄) စီးနှင့် ဟိုက်ဂျက် ယာဉ် (၁) စီးတို့ပါဝင်သွားကြောင်း သိရသည်။

ရှမ်းပြည်နယ်မြောက်ပိုင်းရှိ တရုတ်နယ်စပ်ကုန်သွယ်ရေးလမ်းမကြီဖြစ်သည့် ပြည်ထောင်စု လမ်းမကြီးတလျှောက်တွင် AA၊ TNLA နှင့် MNDAA တို့အဖွဲ့က ၂၀၁၉ ခုနှစ်၊ သြဂုတ်လ (၁၅)ရက်နေ့မှစ၍ ပစ်ခတ်တိုက်ခိုက်မှုများ လုပ်ဆောင်နေခြင်းဖြစ်ပြီး လမ်းတလျှောက် တံတားများအား မိုင်းခွဲဖျက်ဆီးခြင်းများ လုပ်ဆောင်နေရာမှ သြဂုတ်လ (၃၀)ရက်နေ့တွင် ကွတ်ခိုင်အနီး ပြည်ထောင်စုလမ်းမတွင် ဖြတ်သန်းသွားလာသည့် ခရီးသည်တင်ယာဉ်အပါအဝင် မော်တော်ယာဉ် (၃)စီးနှင့် ဈေးလှည့်ရောင်းသည့် ဆိုင်ကယ်(၁)စီးတို့ကိုလည်း မီးရှို့ဖျက်ဆီးခဲ့သည့်အပြင် ကားဘီးများ ပစ်ဖေါက်တားဆီးခြင်းများကိုလည်း လုပ်ဆောင်နေခြင်းဖြစ်သည်။

အဆိုပါ မဟာမိတ်(၃)ဖွဲ့က သြဂုတ်လ (၁၅) ရက်နေ့ကစတင်၍ မန္တလေးတိုင်းဒေသကြီး ပြင်ဦးလွင်မြို့ရှိ တပ်မတော်နည်းပညာသင်တန်းကျောင်း ၊ ရှမ်းပြည်နယ်(မြောက်ပိုင်း) ပြည်ထောင်စုလမ်းမကြီးပေါ်ရှိ မူးယစ်ဆေးဝါးစစ်ဆေးရေး X Ray စက်၊ နောင်ချို မြို့ရှိ မူးယစ်စစ်ဆေးရေးဂိတ်၊ ဂုတ်တွင်းရဲကင်း၊ ရေပူစစ်ဆေးရေးစခန်း စသည်တို့ကို တိုက်ခိုက်ခြင်းအပြင် မန္တလေး - လားရှိုး လမ်းပိုင်းရှိ ဂုတ်တွင်းတံတား၊ သိန်းနီ-ချင်းရွှေဟော်လမ်းပိုင်းရှိ တံတား (၃) စင်းကိုလည်း မိုင်းခွဲဖျက်ဆီးခဲ့ခြင်းဖြစ်သည်။

ပြည်ထောင်စုလမ်းမကြီးတွင် ပစ်ခတ်တိုက်ခိုက်နေမှုများကြောင့် လမ်းပန်းဆက်သွယ်ရေး ပြတ်တောက်နေသည့်အပြင် တရုတ်နယ်စပ် ကုန်သွယ်ရေးမှာလည်း ရပ်ဆိုင်းသွားခဲ့ခြင်းဖြစ်သည်။

မဟာမိတ်(၃)ဖွဲ့၏ တိုက်ခိုက်နေမှုများနှင့်ပတ်သက်၍ လက်ရှိ ပစ်ခတ်တိုက်ခိုက်မှုများ လုပ်ဆောင်နသည့် AA၊ TNLA နှင့် MNDAA တို့အပြင် မဟာမိတ်အဖွဲ့ဝင်ဖြစ်သည့် KIA ပါဝင်သည့် တိုင်းရင်းသားလက်နက်ကိုင် အဖွဲ့ (၄)ဖွဲ့နှင့် အစိုးရ ငြိမ်းချမ်းရေးကော်မရှင်တို့ ၂၀၁၉ ခုနှစ်၊ သြဂုတ်လ (၃၁)ရက်နေ့တွင် ရှမ်းပြည်နယ် အရှေ့ပိုင်း ကျိုင်းတုံမြို့၌ တစ်ရက်တာတွေ့ဆုံဆွေးနွေးမှုအတွင်း ပြည်ထောင်စုလမ်းမကြီးတလျှောက် တိုက်ခိုက်မှုများ ရပ်ဆိုင်းရန် အစိုးရ၏ ဆွေးနွေးမှုကို ဆွေးနွေးပွဲတက်လာသည့် မဟာမိတ်(၄)ဖွဲ့က သက်ဆိုင်ရာ အဖွဲ့အသီးသီးမှ ဆုံးဖြတ်နိုင်သူများထံ ပြန်လည်တင်ပြရန် ယူဆောင်သွားကြကြောင်း သိရသည်။

သတင်း #နေဖြိုးမြင့်
ဓါတ်ပုံ - HA, NM
[ပြည်ထောင်စုလမ်းမကြီးတလျှောက် ပစ်ခတ်တိုက်ခိုက်မှုအတွင်း မီးရှို့ဖျက်ဆီးခံထားရသည့် ကားများဖြစ်ပါသည်။]
⊰❂ #TachileikNewsAgency #TNA #TachileikOnlineNews  #တာခ်ီလိတ္သတင္းေအဂ်င္စီ www.tachileik.net  ❂⊱