~~~~~~~~⊰❂ Unicode Version ❂⊱~~~~~~~~

ယခုဆွေးနွေးပွဲတွင် ပဏာမအပစ်ရပ်သဘောတူစာချုပ်အတွက် အဓိကထားဆွေးနွေးနကြခြေင်းဖြစ်ပြီး နှစ်ဖက်သဘောထားကွဲလွဲနေမှုများအတွက် မြောက်ပိုင်းမဟာမိတ်(၄)ဖွဲ့က သီးခြားနှစ်ကြိမ်ဆွေးနွေးခဲ့ရခြင်းဖြစ်ကြောင်း သိရသည်။

အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန(NRPC) မှ ဒုဥက္ကဌ ဦးထွန်းထွန်းဦး ဦးဆောင်ပြီး တပ်မတော်သားကိုယ်စားလှယ်များဖြစ်သည့် ကာကွယ်ရေးဦးစီးချုပ်ရုံး(ကြည်း)မှ ဒုတိယဗိုလ်ချုပ်ကြီး ရာပြည့်၊ ဒုတိယဗိုလ်ချုပ်ကြီး မင်းနောင်၊ ဒုတိယဗိုလ်ချုပ်ကြီး တင်မောင်ဝင်း၊ ငြိမ်းချမ်းရေးကော်မရှင် ဒုတိယဥက္ကဌ ဦးသိန်းဇော်၊အတွင်းရေးမှူး ဒုတိယဗိုလ်ချုပ်ကြီး ဦးခင်ဇော်ဦး (အငြိမ်းစား)၊ အကြံပေးအဖွဲ့ဝင် ဦးမိုးဇော်ဦး၊ နိုင်ငံတော်သမ္မတရုံး ညွှန်ကြားရေးမှူးချုပ် ဦးဇော်ဌေး၊ ရှမ်းပြည်နယ်အစိုးရအဖွဲ့ဝင် နယ်စပ်ရေးရာနှင့် လုံခြုံရေးဝန်ကြီး ဗိုလ်မှူးကြီး လှဦး၊ ရှမ်းပြည်နယ်အစိုးရအဖွဲ့ အတွင်းရေးမှူး ဦးစိုးစိုးဇော်၊ အကျိုးဆောင် ဦးသက်နိုင်တို့ ပါဝင်သည့်အဖွဲ့ တက်ရောက်ခြင်းဖြစ်သည်။

မြောက်ပိုင်းမဟာမိတ်အဖွဲ့တွင် KIO/KIA မှ KIO အထွေထွေအတွင်းရေးမှူး ဦးကွမ်ထပ်ထိန်နန်၊ KIC အတွင်းရေးမှူး ဗိုလ်မှူးချုပ် ဇော်ရော်၊ ဒုစစ်ဦးစီးချုပ် ဗိုလ်ချုပ်ခေါင်လွမ်းနှင့် စစ်ဦးစီးအရာရှိချုပ် ဗိုလ်မှူးချုပ် ဇော်တောင်ဦးဆောင်သည့်အဖွဲ့၊ MNTJP/ MNDAA မှ ဒုစစ်ဦးစီးချုပ် ရန်ဝင်ကျုံး၊ ပြင်ပဆက်ဆံရေးဌာနမှူး ဖုန်ဝင်းနိုင်နှင့် ပြင်ပဆက်ဆံရေးဌာန ရုံးတာဝန်ခံ လီကြားခွမ်းတို့ဦးဆောင်သည့်အဖွဲ့၊ PSLF/TNLA မှ ဒုဥက္ကဌ - ၂ ဗိုလ်မှူးချုပ် တားခူးလန်း၊ အထွေထွေအတွင်းရေးမှူး ဗိုလ်မှူးချုပ် တားဘုန်းကျော်နှင့် မဟာမိတ် ဆက်ဆံရေးရုံး အရာရှိ ဒုဗိုလ်မှူးကြီး တားအိုက်ထွန်းဦးဆောင်သည့်အဖွဲ့၊ ULA/AA မှ အထွေထွေ အတွင်းရေးမှူး ဗိုလ်မှူးချုပ် ဒေါက်တာညိုထွန်းအောင်၊ အတွင်းရေးမှူး (၁) ဗိုလ်မှူးကြီးကျော်ဟန် ဦးဆောင်သည့်အဖွဲ့တို့ တက်ရောက်လာကြခြင်း ဖြစ်သည်။

အဆိုပါ မဟာမိတ်(၄)ဖွဲ့၏ ကျိုင်းတုံမြို့ ဆွေးနွေးပွဲများအတွက် တရုတ်နိုင်ငံ၊ ယူနန်ပြည်နယ်ရဲတပ်ဖွဲ့က လုံခြုံရေးလိုက်ပါပေးသည်ကို တွေ့ရပြီး စက်တင်ဘာလ (၁၇)ရက်နေ့ ဆွေးနွေးပွဲတွင်လည်း ယူနန်ပြည်နယ်ရဲတပ်ဖွဲ့ဝင် (၆)ဦး လိုက်ပါလာကြောင်း သိရသည်။

ငြိမ်းချမ်းရေးကော်မရှင်နှင့် မြောက်ပိုင်းမဟာမိတ် (၄)ဖွဲ့တို့၏ သြဂုတ်လ (၃၁)ရက်နေ့က ကျိုင်းတုံတွင် ကျင်းပခဲ့သည့် ဆွေးနွေးပွဲအပြီးတွင် တပ်မတော်က စစ်တိုင်းဒေသကြီး (၅)ခုတွင် စစ်ဆင်ရေးလှုပ်ရှားမှုများ ရပ်ဆိုင်းခြင်း သက်တမ်း ထပ်တိုးလိုက်ပြီး ရှမ်းပြည်နယ်မြောက်ပိုင်း ပြည်ထောင်စုလမ်းမကြီးတလျှောက် တိုက်ခိုက်နေသည့် ULA/AA၊ PSLF/TNLAနှင့် MNTJP/ MNDAA မဟာမိတ် (၃)ဖွဲ့ကလည်း အပစ်ရပ်သည်ဟု ကြေညာခဲ့သော်လည်း စက်တင်ဘာလ (၁၃)ရက်နေ့မှစ၍ TNLA နှင့် တပ်မတော်တို့ ကျောက်မဲမြို့နယ်အတွင်း တိုက်ခိုက်မှုများ ဖြစ်ပွားနေခဲ့ခြင်းဖြစ်သည်။

Tachileik News Agency