~~~~~~~~⊰❂ Unicode Version ❂⊱~~~~~~~~

တာချီလိတ်မြို့တွင်း ကူးစက်ရောဂါကာကွယ်ရေးလုပ်ငန်းများအတွက် GMS-HS Project ဆွေးနွေးပွဲကျင်းပ
*********
ရှမ်းပြည်နယ် (အရှေ့ပိုင်း) တာချီလိတ်မြို့နယ်အတွင်း ကူးစက်ရောဂါများ ကြိုတင်ကာကွယ်ရေးလုပ်ငန်းများ အတွက် GMS-HS Project ဆွေးနွေးပွဲအခမ်းအနားကို ၂၀၁၉ ခုနှစ် စက်တင်ဘာလ (၃) ရက်နေ့တွင် ပြည်သူ့ဆေးရုံဟောင်းအတွင်းရှိ အစည်းအဝေးခန်းမ၌ ကျင်းပသည်။

"ကူးစက်ရောဂါဖြစ်ပွားတဲ့ သတင်းအချက်အလက်တွေ ပူးပေါင်းမျှဝေကြဖို့ပေါ့။ နယ်စပ်ဒေသဖြစ်တဲ့အတွက် နယ်စပ်ဖက်က ဝင်လာနိုင်တဲ့ရောဂါတွေကို သတင်းရယူပြီးတော့ ကာကွယ်တာတို့၊ တုံ့ပြန်ဆောင်ရွက်တာတို့ အချိန်နဲ့တစ်ပြေးညီ လုပ်နိုင်အောင်လို့ ဌာနဆိုင်ရာတွေနဲ့ လူမှုရေးအသင်းအဖွဲ့တွေ ပူးပေါင်းဆွေးနွေးတာ ဖြစ်ပါတယ်။ ဒီအစည်းအဝေးကို ကျန်းမာရေးနဲ့ အားကစားဝန်ကြီးဌာနနဲ့ Greater Maekhong Subregion Health Security Project(ADB)  အဲဒီက အထောက်အပံ့နဲ့ နှစ်ခုပူးတွဲပြီး လုပ်တာပါ။ ကူးစက်ရောဂါတွေနဲ့ ပတ်သက်ပြီးတော့မှ သတင်းမြန်မြန်ရရှိဖို့တို့၊ ပြန်လည် တုန့်ပြန်ဆောင်ရွက်ဖို့တို့၊ ဖြစ်ပွားလာလို့ရှိရင် ရောဂါကို အမြန်ဆုံးနဲ့ ထိရောက်ဆုံး ကုသနိုင်အောင်ပေါ့။ ကူးစက်ရောဂါကြောင့် လူတွေအသက်ဆုံးရှုံးမှု နည်းနိုင်သမျှ နည်းအောင် ရည်ရွယ်ပြီး ကျင်းပတာပါ"ဟု တာချီလိတ်ခရိုင်ဆေးရုံအုပ်ကြီး ဒေါက်တာရွှေဝင်းက တာချီလိတ်သတင်းအေဂျင်စီသို့ ပြောသည်။

Greater Maekhong Subregion Health Security Project(ADB) က ကျန်းမာရေးနှင့် အားကစားဝန်ကြီးဌာနဖြင့် ပူးပေါင်းပြီး ရှမ်းပြည်နယ်(အရှေ့ပိုင်း)ရှိ ကျိုင်းတုံနှင့် တာချီလိတ်၊ ရှမ်းပြည်နယ်(မြောက်ပိုင်း)ရှိ လားရှိုးနှင့် မူဆယ်၊ တနင်္သာရီတိုင်းဒေသကြီးရှိ ထားဝယ်နှင့် ကော့သောင်း၊ ကရင်ပြည်နယ်အတွင်းရှိ ဘားအံနှင့် မြဝတီ၊ မွန်ပြည်နယ်ရှိ မော်လမြိုင်နှင့် ရေး၊ ကယားပြည်နယ်ရှိ လွိုင်ကော်နှင့် မယ်စဲ့မြို့များတွင် ကူးစက်ရောဂါများ ကြိုတင်ကာကွယ်ရေး ဆောင်ရွက်နေကြောင်း သိရသည်။

GMS-HS Project ဆွေးနွေးပွဲသို့ မြို့နယ်အုပ်ချုပ်ရေးမှူး ဦးချမ်းမြေ့စောနှင့် မြို့နယ်အဆင့် ဌာနဆိုင်ရာများ၊ တာချီလိတ်ခရိုင် ဆေးရုံအုပ်ကြီး ဒေါက်တာရွှေဝင်းနှင့် ခရိုင်၊ မြို့နယ်အဆင့် ကျန်းမာရေးဝန်ထမ်းများ၊ ရပ်ကွက် အုပ်ချုပ်ရေးမှူးများနှင့် ADB မှ တာဝန်ရှိသူများ တက်ရောက်ကြခြင်းဖြစ်သည်။

Tachileik News Agency
ဓါတ်ပုံ - ကျော်ဇင်ဟိန်း