~~~~~~~~⊰❂ Unicode Version ❂⊱~~~~~~~~

“နောက်ထပ်ပေးဖို့ (၃၉) ဦးကျန်သေးတယ်။ တံတား (၂) နားက စည်ပင်ပန်းခြံရယ်၊ နကသမြေရယ် (၂)နေရာပေါ့။ အဲဒါက ဌာနဆိုင်ရာ လုပ်ထုံးလုပ်နည်းနဲ့အညီ ပြန်လည်စွန့်လွှတ်သွားမှာပါ။ လျော်ကြေးပေးဖို့က တောင်သူ (၃၉) ဦးပဲကျန်တော့တာ။ အခု တတိယအကြိမ်မှာ အသစ်လက်ခံယူတာ (၁၉) ဦး၊ အစိုးရက လျော်ကြေးထပ်ဆောင်းပေးတာ (၈) ဦး စုစုပေါင်း (၂၇) ဦးပါ”ဟု တာချီလိတ်မြို့နယ် စီမံခန့်ခွဲရေးကော်မတီ ဥက္ကဌ၊ မြို့နယ်အုပ်ချုပ်ရေးမှူး ဦးချမ်းမြေ့စောက တာချီလိတ်သတင်းအေဂျင်စီသို့ ပြောသည်။

မြို့ရှောင်လမ်းဖောက်လုပ်မည့်နေရာတွင် ပါဝင်မည့် မြေယာပိုင်ရှင် စုစုပေါင်း (၁၆၉)ဦးကို လျော်ကြေးပေးနေရာ ၂၀၁၉ ခုနှစ်၊ စက်တင်ဘာလ (၁၂)ရက်နေ့အထိ လျော်ကြေးလက်ခံပြီးသူ (၁၅၇)ဦးကို လျော်ကြေးငွေ စုစုပေါင်း ကျပ်သိန်း (၁၈,ဝဝဝ)ကျော် ပေးအပ်ထားပြီးဖြစ်သည်။

မြို့ရှောင်လမ်းဖောက်လုပ်ရာတွင် လမ်းနယ်တွင်ပါဝင်မည့် လယ်ယာမြေနှင့် အိမ်ခြံမြေများအတွက် မြေယာလျော်ကြေးနှင့် သီးနှံလျော်ကြေးပေးအပ်ရာ လန-၃၉ ကျပြီးသည့် အိမ်ခြံမြေ(၄၀x၆၀)တစ်ကွက်လျှင် ကျပ်သိန်း(၁၉၀)၊ လန-၃၉ ကျပြီးသည့် လယ်ယာဥယျာဉ်ခြံမြေ နှင့် မြေလွတ်မြေရိုင်းများအား တစ်ဧကလျှင် ကျပ်သိန်း(၁၉၀)နှုန်းဖြင့် ပေးအပ်ခြင်းဖြစ်သည်။

တာချီလိတ်မြို့ရှောင်လမ်းကို မြန်မာ - ထိုင်းချစ်ကြည်ရေးတံတား (၂)အနီးမှနေ၍ မယ်ဆိုင်ချောင်းတလျှောက် စက်မှုဇုန်နှင့် ဝမ်ပုံဖြတ်လမ်း ဦးထွန်းအောင်ဂိတ်အထိ ဖောက်လုပ်မည်ဖြစ်သည်။

Tachileik News Agency
သတင်း - ဟန်စိုးထိုက်
ဓာတ်ပုံ - ကျော်ဇင်ဟိန်း