~~~~~~~~⊰❂ Unicode Version ❂⊱~~~~~~~~

အဆိုပါချောင်းအတွင်း မျောလာသည့် ၀က်သေများမှာ ဝက်ရောဂါများဖြစ်နေသည့် မိုင်းဟဲကျေးရွာအုပ်စုအတွင်းက မျောလာခြင်းဖြစ်မည်ဟု ခန့်မှန်းထားပြီး အဆိုပါကျေးရွာအုပ်စုအတွင်း ဝက်များသေဆုံးပါက ချောင်းအတွင်းမမျှောဘဲ မြေမြုပ်ရန် အသိပညာပေးလုပ်ထားပြီးဖြစ်သည်။

"မိုင်းဟဲကျေးရွာအုပ်စုပေါ့နော်။ အဲဒီမှာ ကြိုကြားကြိုကြား ၀က်သေဆုံးမှုတွေရှိပါတယ်။ ဒေသတွင်းမှာ ၀က်သေရင် ချောင်းထဲကို မမျှောဖို့ကို လူထုအသိပညာပေးတွေ၊ ဟောပြောပွဲတွေလည်း လုပ်ခဲ့သလို လုပ်နေလျှက်ဖြစ်ပါတယ်ခင်ဗျ။ ၀က်တွေသေရင် အလွယ်လိုက်တဲ့ သဘောမျိုးနဲ့ ချောင်းထဲကို မျှောချတာမျိုးဆိုရင် ချောင်းထဲမှာ အနံ့အသက်မကောင်းတာအပြင်  ရောဂါကူးစက်နိုင်တဲ့ အနေအထားမျိုးတွေလည်းရှိတဲ့အတွက်ကြောင့်မို့ ကျွန်တော်တို့က ချောင်းထဲကို မမျှောဖို့ လူအထုအသိပညာပေးတွေ ဆောင်ရွက်လျှက်ရှိပါတယ်" မွေးမြူရေးနှင့်ကုသရေးဦးစီးဌာနမှ တာချီလိတ်မြို့နယ် လက်ထောက်ညွှန်ကြားရေးမှူး ဒေါက်တာကျော်ကျော်စိုးက တာချီလိတ်သတင်းအေဂျင်စီသို့ ပြောသည်။

ချောင်းအတွင်း မျောလာသည့် ၀က်အသေများအား မွေးမြူရေးနှင့်ကုသရေးဦးစီးဌာနမှ တာချီလိတ်မြို့နယ် လက်ထောက်ညွှန်ကြားရေးမှူး ဒေါက်တာကျော်ကျော်စိုး နှင့် ၀န်ထမ်းများ၊ တာချီလိတ်မြို့နယ်စည်ပင်သာယာရေးဌာနမှ ဒုတိယဦးစီးမှူး ဦးအားထူယာတို့က စက်ယန္တရားအကူအညီရယူကာ ၂၀၁၉ခုနှစ် သြဂုတ်လ(၅)ရက်နေ့ နေ့လယ်ပိုင်းကတည်းက ဆယ်ယူရာ ည(၆)နာရီတွင် ဆယ်ယူပြီးစီးသွားသဖြင့် ဆေးဖျန်းပြီး မြေမြှုပ်ခဲ့ကြခြင်းဖြစ်သည်။

အဆိုပါ ချောင်းအတွင်း၌ သြဂုတ်လ ပထမပတ်အတွင်းကတည်းက ဝက်သေများ မကြာခဏမျောလာဖူးပြီး စုစုပေါင်း အကောင်ရေ (၂၀)ကျော်ရှိမည်ဟု ချောင်းဘေးနေထိုင်သူများက ပြောသည်။

 ဖျားနာနေသည့် ၀က်များရှိနေပါက မွေးမြူရေးနှင့်ကုသရေးဦးစီးဌာနသို့ လည်းကောင်း၊ ရပ်ကွက်/ကျေးရွာ နှင့် မြို့နယ်အုပ်ချုပ်ရေးမှူးများသို့လည်းကောင်း ဆက်သွယ်အကူအညီတောင်းခံနိုင်ပြီး တစ်နိုင်တစ်ပိုင်ဝက်မွေးမြူသူများနှင့် စီးပွားဖြစ်ဝက်မွေးမြူသူများအနေဖြင့် ဝက်ရောဂါကာကွယ်ရေးနှင့်ပတ်သက်၍ အကြံဉာဏ်ရယူခြင်းနှင့် ခြံဖျန်းဆေးများရယူလိုပါက မွေးမြူရေးနှင့် ကုသရေးဦးစီးဌာန ဖုန်း ၀၈၄ ၅၁၉၀၅ သို့ ဆက်သွယ်အကူအညီရယူနိုင်ကြောင်း သိရသည်။

Tachileik News Agency
ဓာတ်ပုံ - ကျော်ဇင်ဟိန်း