~~~~~~~~⊰❂ Unicode Version ❂⊱~~~~~~~~

ထိုင်းနိုင်ငံတွင် ပုဂ္ဂလိကဆေးရုံများ၏ ဆေး၊ဆေးပစ္စည်းနှင့်ကုသစရိတ်များကို အများပြည်သူအနေဖြင့် စစ်ဆေးကြည့်ရှုနိုင်ရန် စီစဉ်နေ
**********
ဆေးနှင့်ဆေးကုသစရိတ်များ မတန်တဆရယူနေမှုကို ဟန့်တားသည့်အနေဖြင့် ထိုင်းနိုင်ငံမှ ပုဂ္ဂလိကဆေးရုံများ၏ ဆေး၊ဆေးပစ္စည်းနှင့် ဆေးကုသစရိတ်များအား ပြည်တွင်းကုန်သွယ်ရေးဌာနသို့ ၂၀၁၉ ခုနှစ်၊ ဇူလိုင်လ (၃၁)ရက်နေ့ နောက်ဆုံးထားတင်ပြရန် ညွှန်ကြားထားသော်လည်း ဆေးရုံ (၄၈)ခုက တင်ပြလာခြင်းမရှိသေးကြောင်း သိရသည်။

ဆေးရုံပေါင်း (၃၀၅)ခုက တင်ပြထားပြီးဖြစ်သော်လည်း ဆေးရုံ (၄၈)ခုက တင်ပြရန်ကျန်နေရာ အဆိုပါကျန်ရှိဆေးရုံများအနေဖြင့် သတ်မှတ်ချိန်အတွင်း မတင်ပြနိုင်သည့်အကြောင်းရင်းကိုပါ တင်ပြသွားကြရမည်ဖြစ်ကြောင်း သိရသည်။

အဆိုပါ ပုဂ္ဂလိကဆေးရုံများ၏ ဆေးနှင့်ဆေးပစ္စည်းများ၊ ဆေးကုသစရိတ်များကို အများပြည်သူအနေဖြင့် QR ကုဒ်ဖြင့် စစ်ဆေးနိုင်ရန် ဝန်ကြီးဌာနက ဆောင်ရွက်ပေးရန် ရည်ရွယ်ထားသည့် ဇူလိုင်လ (၂၉)ရက်အစား သြဂုတ်လ (၁၅)ရက်နေ့သို့ ရွှေ့ဆိုင်းလိုက်ကြောင်း သိရသည်။

ထိုင်းနိုင်ငံရှိ ပုဂ္ဂလိကဆေးရုံအများစုမှာ ဆေးကုသစရိတ်များ အဆမတန်ရယူနေသည်ကို ၂၀၁၉ ခုနှစ်၊ ဧပြီလအတွင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာနက စစ်ဆေးတွေ့ရှိရသည့်အတွက် ဆေးရုံများ၏ ဆေးနှင့်ဆေးပစ္စည်းစျေးနှုန်း၊ ကုသစရိတ်စျေးနှုန်းများ တင်ပြစေရန် ညွှန်ကြားထားခြင်းဖြစ်သည်။

ပုဂ္ဂလိကဆေးရုံများအား ညွှန်ကြားချက်ထုတ်ပြီးနောက် သွားဆေးကုသခန်းများမှာလည်း သွားဆေးခန်းသုံး ဆေးနှင့် ဆေးပစ္စည်းများ၊ ပစ္စည်းကိရိယာများနှင့် ကုသမှုဝန်ဆောင်ခနှုန်းထားများကို တင်ပြကြရမည်ဖြစ်ကြောင်း သိရသည်။

ဇူလိုင်လ (၂)ရက်နေ့ကကျင်းပသည့် ဝန်ကြီးများအစည်းအဝေးတွင် ဆေး၊ဆေးပစ္စည်းထုတ်ကုန် (၅၄)မျိုးကို စျေးနှုန်းထိန်းချုပ်မည့်စာရင်းတွင် ထပ်မံထည့်သွင်းလိုက်ခြင်းဖြစ်ကြောင်း သိရသည်။

Tachileik News Agency
Ref: Bangkok Post