~~~~~~~~⊰❂ Unicode Version ❂⊱~~~~~~~~

ထိုင်းနိုင်ငံရှိ မြန်မာဒုက္ခသည်စခန်း (၃)ခုမှ မြန်မာ (၁၅၇)ဦး နေရပ်ပြန်လာ
***********
ထိုင်းနိုင်ငံရှိ ဒုက္ခသည်စခန်း(၃)ခုမှ မြန်မာနိုင်ငံသား (၁၅၇)ဦးသည် ၂၀၁၉ ခုနှစ်၊ ဇူလိုင်လ (၁)ရက်နေ့က မြန်မာ - ထိုင်းနယ်စပ် ကရင်ပြည်နယ် မြဝတီနယ်စပ်ပေါက်မှတစ်ဆင့် နေရပ်ပြန်လာရာ မြန်မာနိုင်ငံမှ တာဝန်ရှိသူများက ကြိုဆိုလက်ခံပြီး လိုအပ်သည်များပံပိုးခြင်းကို ဆက်လက်ဆောင်ရွက်နေကြောင်း သိရသည်။

မြန်မာနိုင်ငံနှင့် ထိုင်းနိုင်ငံနှစ်နိုင်ငံ ပူးပေါင်းဆောင်ရွက်မှုဖြင့် ထိုင်းနိုင်ငံမှ မိမိဆန္ဒအလျောက် နေရပ်ပြန်လိုသူ မြန်မာနိုင်ငံသားများ ပြန်လည်လက်ခံရေးလုပ်ငန်းဆောင်ရွက်နေခြင်းဖြစ်ပြီး နို့ပိုးဒုက္ခသည်စခန်းမှ (၁၅၁)ဦး၊ မယ်လဒုက္ခသည်စခန်းမှ (၅)ဦး၊ အုန်းပြန်ဒုက္ခသည်စခန်းမှ(၁)ဦး စုစုပေါင်း(၁၅၇)ဦးတို့ နေရပ်ပြန်လာခြင်းဖြစ်ကြောင်း သိရသည်။

အဆိုပါ မြန်မာနိုင်ငံသားများအား မဲဆောက် - မြဝတီဆက်သွယ်ထားသည့် မြန်မာ-ထိုင်း ချစ်ကြည်ရေးတံတား အမှတ်(၁)မှတစ်ဆင့် ခေါ်ဆောင်လာခဲ့ပြီး မြဝတီမြို့ရှိ ကျောက်လုံးကြီးစခန်းတွင် လက်ခံထားကြောင်း သိရသည်။

နေရပ်ပြန်လာသူများကို မူလဇာတိအရောက်ပို့ဆောင်ခြင်းကို သက်ဆိုင်ရာဝန်ကြီးဌာနများ၊ တိုင်းဒေသကြီးနှင့် ပြည်နယ်လက်ခံရေး ကော်မတီဝင်များက ဆက်လက်ဆောင်ရွက်မည်ဖြစ်ပြီး လတ်တလောတွင် အိမ်ထောင်စုသုံးပစ္စည်းအချို့နှင့် ငွေကြေးများထောက်ပံ့ပေးထားကြောင်း သိရသည်။

မြန်မာနိုင်ငံသားဆိုင်ရာ အိမ်ထောင်စုဇယားပုံစံ-၁၀နှင့် နိုင်ငံသားခိုင်မာမှုအဆင့်အလိုက် နိုင်ငံသားစိစစ်ရေးကတ်များ ဆောင်ရွက်ခြင်း၊ ပညာရေး၊ ကျန်းမာရေးဆိုင်ရာ ကူညီပံ့ပိုးပေးခြင်းတို့အတွက် သက်ဆိုင်ရာတိုင်းဒေသကြီးနှင့် ပြည်နယ်အစိုးရများက ဆက်လက်ကူညီပေးမည်ဖြစ်ကြောင်း သိရသည်။

မြန်မာနိုင်ငံသားများ နေရပ်ပြန်နိုင်ရေးအတွက် ထိုင်းနိုင်ငံဆိုင်ရာ မြန်မာသံအမတ်ကြီး ဦးမျိုးမြင့်သန်းနှင့် မြန်မာသံရုံးအဖွဲ့ဝင်များ၊ ကရင်ပြည်နယ်အစိုးရအဖွဲ့၊ လုံခြုံရေးနှင့်နယ်စပ်ရေးရာပြည်နယ်ဝန်ကြီး၊ ကရင်ပြည်နယ် ပြည်သူ့လွှတ်တော်ကိုယ်စားလှယ်၊ ပြည်နယ်လွှတ်တော်ကိုယ်စားလှယ်တို့နှင့်အတူ ရန်ကုန်၊ မန္တလေး၊ စစ်ကိုင်း တိုင်းဒေသကြီးအစိုးရအဖွဲ့၏ လက်ခံရေးကော်မတီအဖွဲ့ဝင်များ၊ သက်ဆိုင်ရာဝန်ကြီးဌာန ကိုယ်စားများက လိုအပ်သည့်ကူညီပံ့ပိုးမှုများကို ဆောင်ရွက်ပေးခဲ့ကြကြောင်း သိရသည်။

Tachileik News Agency
Photo:Assawin Pinitwong