~~~~~~~~⊰❂ Unicode Version ❂⊱~~~~~~~~

ထိုင်းရဲအရာရှိ၏ဝက်ခြံမှ ဝက်ခိုးယူသူ (၂)ဦးကို ရဲတပ်ဖွဲ့က တစ်ရက်အတွင်း ဖမ်းဆီးရမိ
*****************
ထိုင်းရဲအရာရှိ၏ဝက်ခြံမှ ဝက်တစ်ကောင်ခိုးယူလာသည့် အမျိုးသားနှစ်ဦးအား တစ်ရက်အတွင်း ရဲတပ်ဖွဲ့က ဖမ်းဆီးထိန်းသိမ်းလိုက်ကြောင်း သိရသည်။

ဆရာဝပ်နှင့် ဆူချရတ်တို့နှစ်ဦးကို ၂၀၁၉ ခုနှစ်၊ ဇွန်လ (၃၀)ရက်နေ့က ၎င်းတို့၏ နေအိမ်အသီးသီး၌ သွားရောက်ဖမ်းဆီးချိန်တွင် ခိုးယူလာသည့်ဝက်မှာ ကားပေါ်တွင်ရှိနေဆဲဖြစ်ကြောင်း သိရသည်။

ရဲအရာရှိ၏ ဝက်ခြံမှ ဝက် (၁၃)ကောာင်အနက် တစ်ကောင်ပျောက်နေသည်ကို ဇွန်လ (၂၉)ရက်နေ့ညပိုင်းတွင်  စစ်ဆေးသိရှိရပြီး ပစ်ကပ်ကားတစ်စီး ဝင်လာသည်ကို တွေ့မိကြောင်း အိမ်နီးချင်းများထံမှ ရရှိသည့်သတင်းအချက်အလက်အရ စုံစမ်းရှာဖွေခဲ့ခြင်းဖြစ်ကြောင်း သိရသည်။

ဝက်တစ်ကောင်တင်လာသည့် ပစ်ကပ်ကားတစ်စီး မောင်းခရိုင်ကိုဖြတ်သွားကြောင်း သတင်းအရ လိုက်လံဖမ်းဆီးရာ ခိုးယူခံရသည့် ဝက်ကို ကားပေါ်မှ မချသေးဘဲထားသဖြင့် ခိုးယူသူနှစ်ဦးအား သက်သေခံပစ္စည်းနှင့်အတူ ဖမ်းဆီးနိုင်ခဲ့ခြင်းဖြစ်ကြောင်း သိရသည်။

ခိုးယူလာသည့် ဝက်အား ရောင်းချပြီး နှစ်ယောက်ခွဲဝေယူရန် စီစဉ်ခဲ့ကြခြင်းဖြစ်သော်လည်း ဇနီးဖြစ်သူက ကန့်ကွက်သဖြင့် ဝက်ကိုမရောင်းဖြစ်တော့ဘဲ မည်သို့ဆက်လုပ်ရမည်ကို စဉ်းစားနေကြစဉ် ဖမ်းဆီးခံရခြင်းဖြစ်သည်ဟု ဆူရာချတ်က ထွက်ဆိုကြောင်း သိရသည်။

Tachileik News Agency
Ref: Bangkok Post