~~~~~~~~⊰❂ Unicode Version ❂⊱~~~~~~~~

ကမ္ဘောဒီးယားနှင့် ထိုင်းနှစ်နိုင်ငံ နယ်စပ်ဖြတ်ကျော်ရထားခရီးစဉ် ဇူလိုင်လဆန်းတွင် စတင်ပြေးဆွဲတော့မည်
******************
ကမ္ဘောဒီးယားနိုင်ငံ၏ ပြည်တွင်းစစ်ကြောင့် (၄၅)နှစ်ကြာ ရပ်ဆိုင်းထားခဲ့ရသည့် ကမ္ဘောဒီးယား - ထိုင်း နှစ်နိုင်ငံနယ်စပ်ဖြတ်ကျော် ရထားခရီးစဉ်ကို ၂၀၁၉ ခုနှစ်၊ ဇူလိုင်လ (၁)ရက်နေ့တွင် စတင်ပြေးဆွဲမည်ဖြစ်ကြောင်း သိရသည်။

ဘန်ကောက်နှင့် ဘန်ခလောင်းလခ်ကြားပြေးဆွဲမည့် ရထားခရီးစဉ်ကို နေ့စဉ် ခရီးစဉ်လေးကြောင်း ပြေးဆွဲပေးသွားမည်ဖြစ်ပြီး နှစ်နိုင်ငံဖြတ်ကျော်လည်ပတ်ကြမည့် နှစ်နိုင်ငံမှ ဒေသခံများအပြင် နိုင်ငံခြားသားများလည်း ဖြတ်သန်းသွားလာနိုင်မည်ဖြစ်ကြောင်း သိရသည်။

ရထားခရီးစဉ် တစ်ကြောင်းလျှင် (၄၉)ဘတ်ကျသင့်မည်ဖြစ်ကြောင်း သိရပြီး  ဘန်ကောက်မှ အစောဆုံးထွက်ခွာမည့်ရထားမှာ နံနက် (၅)နာရီ (၅၅)မိနစ်တွင် ထွက်ခွာမည်ဖြစ်ပြီး ဘန်ခလောင်းလခ်သို့ နေ့လယ် (၁၁)နာရီ (၁၇)မိနစ်တွင်ရောက်မည်ဖြစ်ကြောင်း သိရသည်။

ကမ္ဘောဒီးယားဘက်မှ အစောဆုံးထွက်ခွာမည့်ရထားမှာ နံနက် (၆)နာရီ (၅၈)မိနစ်တွင် စတင်ထွက်ခွာမည်ဖြစ်ပြီး ရထားလက်မှတ်များကို အွန်လိုင်းမှလည်း ရောင်းချပေးနေခြင်းဖြစ်ကြောင်း သိရသည်။

ထိုင်းနိုင်ငံသည် ၂၀၁၉ ခုနှစ်၊ ဇွန်လ (၁၈)ရက်နေ့ကလည်း မလေးရှားနယ်စပ်ဂိတ်မှ ကုန်စည်များ၊ကွန်တိန်နာသယ်ယာဉ်များ (၂၄)နာရီ ဖြတ်သန်းသွားလာခွင့်ပြုထားပြီး အိမ်နီးချင်းနိုင်ငံများဖြစ်သည့် မြန်မာ၊ ကမ္ဘောဒီးယား၊ လာအိုနှင့် ဗီယက်နမ်နိုင်ငံများသို့ နယ်စပ်ဖြတ်ကျော်ခရီးစဉ်များ ဖေါ်ဆောင်နိုင်ရေးအတွက် ထိုင်းပို့ဆောင်ရေးဝန်ကြီးဌာနက တိုက်တွန်းထားကြောင်း သိရသည်။

Tachileik News Agency
Ref: Bangkok Post